ຮອງປະທານປະເທດໄດ້ຮັບຫຼຽນລະດັບຊາດຈາກຈັກກະພັດຂອງຍີ່ປຸ່ນ

0
3088

ໃນວັນທີ 7 ພະຈິກ 2019 ນີ້, ຢູ່ສຳນັກພຣະຣາຊະວັງຍີ່ປຸ່ນ, ທ່ານ ພັນຄຳ ວິພາວັນ ຮອງປະທານປະເທດແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໄດ້ເຂົ້າຮັບຫຼຽນ “Grand Cordon of the Order of the Rising Sun” ຈາກເຈົ້າຈັກກະ ພັດ ນາຣຸຮິໂຕະ ຊຶ່ງຫຼຽນດັ່ງກ່າວຖືເປັນຫຼຽນລະດັບຊາດຂອງຍີ່ປຸ່ນ, ຂັ້ນສູງສຸດທີ່ມອບໃຫ້ຊາວຕ່າງຊາດ.

ທ່ານ ພັນຄໍາ ວິພາວັນ ໄດ້ມີຜົນງານຫລາຍດ້ານໃນການປະກອບສ່ວນເຂົ້າໃນການພົວພັນຮ່ວມມືລະຫວ່າງລາວ-ຍີ່ປຸ່ນ ໃນໄລຍະດຳ ລົງຕຳແໜ່ງຮອງນາຍົກລັດຖະມົນຕີ, ລັດຖະມົນຕີກະຊວງສຶກສາທິການ ແລະ ກີລາ ໂດຍລວມແລ້ວທ່ານຮອງປະທານປະເທດ ສປປ ລາວ ໃຫ້ຄວາມສໍາຄັນຕໍ່ການພົວພັນຮ່ວມມືກັບຍີ່ປຸ່ນໃນຂະແໜງການສຶກສາ, ກີລາ, ວັດທະນະທໍາ ແລະ ສັງຄົມ.

ໂດຍສະເພາະໄລຍະຜ່ານມາທ່ານໄດ້ສະໜັບສະໜູນຍີ່ປຸ່ນລົງສະໝັກເປັນເຈົ້າພາບຈັດງານແຂ່ງຂັນກີລາໂອແລມປິກ 2020, ຊຶ່ງ ສປປ ລາວ ເປັນປະເທດອັນດັບຕົ້ນທີ່ແຈ້ງເຈດຈຳນົງໃຫ້ການສະໜັບສະໜູນຍີ່ປຸ່ນ ແລະ ຍີ່ປຸ່ນໄດ້ຮັບເລືອກຕັ້ງ, ສົ່ງເສີມການຮ່ວມມືດ້ານກີລາລາວ ແລະ ຍີ່ປຸ່ນ, ການຝຶກແອບນັກກີລາລາວທີ່ຈະເຂົ້າຮ່ວມງານມະຫາກຳກີລາໂອແລມປິກ 2020 ທີ່ໂຕກຽວ, ສະໜັບສະໜູນການສ້າງຕັ້ງຫ້ອງການຜູ້ຕາງໜ້າສູນອາຊີມູນນິທິຍີ່ປຸ່ນປະຈໍາ ສປປ ລາວ.

ປັດຈຸບັນ, ຫ້ອງການດັ່ງກ່າວໄດ້ປະຕິບັດໜ້າທີ່ຢ່າງຕັ້ງໜ້າໃນການສົ່ງເສີມການແລກປ່ຽນທາງວັດທະນະທໍາ ແລະ ສັງຄົມສອງປະ ເທດໄດ້ເປັນຢ່າງດີ, ແລກປ່ຽນຄໍາຄິດເຫັນຢ່າງຕັ້ງໜ້າ ແລະ ຮ່ວມກັບ ທ່ານ ຕາເກໂອະ ຄາວາມູຣະ ປະທານສະມາຄົມມິດຕະພາບ ຍີ່ປຸ່ນ-ລາວ ຝ່າຍສະພາ, ເຂົ້າຮ່ວມພິທີປູກຕົ້ນຊາກູຣະ (ປະມານ 220 ຕົ້ນ) ໃນປີ 2015 ທີ່ແຂວງຫົວພັນ ຊຶ່ງເປັນກິດຈະກໍາສະ ເຫຼີມສະຫຼອງວັນສ້າງຕັ້ງສາຍພົວພັນການທູດ “ລາວ-ຍີ່ປຸ່ນ” ຄົບຮອບ 60 ປີ ແລະ ໄດ້ມີການພັດທະນາສະຖານທີ່ປູກຕົ້ນຊາກູຣະໃຫ້ເປັນສວນສາທາລະນະຕົ້ນຊາກູຣະມິດຕະພາບ “ລາວ ແລະ ຍີ່ປຸ່ນ”.

ໃນໄລຍະດຳລົງຕຳແໜ່ງ ທ່ານຮອງປະທານປະເທດໄດ້ໃຫ້ຄວາມສໍາຄັນຕໍ່ການເສີມຂະຫຍາຍສາຍພົວພັນມິດຕະພາບ ລາວ-ຍີ່ປຸ່ນ, ມີການແລກປ່ຽນຄໍາຄິດເຫັນແບບກົງໄປກົງມາ ແລະ ສ້າງສັນກັບການນໍາຂັ້ນສູງຍີ່ປຸ່ນ, ອັນໄດ້ເຮັດໃຫ້ບັນຍາກາດການຮ່ວມມືສອງຝ່າຍມີບາດກ້າວຂະຫຍາຍຕົວຍິ່ງຂຶ້ນ ເປັນຕົ້ນແມ່ນການພົບປະສອງຝ່າຍ ນອກນັ້ນ, ທ່ານຍັງໃຫ້ຄວາມສໍາຄັນຕໍ່ການເຄື່ອນໄຫວ, ການລົງທຶນ ແລະ ຢ້ຽມຢາມບໍລິສັດຍີ່ປຸ່ນທີ່ລົງທຶນ ຢູ່ ລາວ, ພາຍໃຕ້ການຊີ້ນໍາຂອງທ່ານເຮັດໃຫ້ລະດັບທ້ອງຖິ່ນຂອງລາວເຂົ້າໃຈ ແລະ ຮັບຮູ້ວິທີການບໍລິຫານສວນກະສິກໍາ ແລະ ເຕັກນິກການລ້ຽງສັດແບບຍີ່ປຸ່ນ, ເຮັດໃຫ້ສາຍພົວພັນມິດຕະພາບ ແລະ ການຮ່ວມມືສອງປະເທດມີການຂະຫຍາຍຕົວຢ່າງຕໍ່ເນື່ອງ ແລະ ຂະຫຍາຍຕົວຢ່າງຕໍ່ເນື່ອງ ເວົ້າລວມ, ເວົ້າສະເພາະ ພາບລວມຂອງບໍລິສັດຍີ່ປຸ່ນທີ່ມາລົງທຶນຢູ່ລາວໄດ້ຮັບການຍົກລະດັບສູງຂຶ້ນ.

ສຳລັບຫຼຽນ Order of the Rising Sun ແມ່ນຫຼຽນລະດັບຊາດທີ່ລັດຖະບານຍີ່ປຸ່ນມອບໃຫ້ແກ່ຊາວຕ່າງຊາດເລີ່ມແຕ່ປີ 1875 ເປັນຕົ້ນມາ. ໂດຍປະດັບໃຫ້ແກ່ຜູ້ທີ່ມີຜົນງານດີເດັ່ນໃນຂົງເຂດວຽກງານການທູດ, ການພົວພັນສອງຝ່າຍ, ດ້ານເສດຖະ ກິດ, ວັດທະນະທຳ-ສັງຄົມ, ການຮັກສາສິ່ງແວດລ້ອມ ແລະ ອື່ນໆ ໂດຍແມ່ນເຈົ້າຈັກກະພັດຍີ່ປຸ່ນເປັນຜູ້ມອບ 2 ຄັ້ງຕໍ່ປີ (ລະດູໃບໄມ້ປົ່ງ “ຕັ້ນປີ” ແລະ ລະດູໃບໄມ້ຫຼົ່ນ “ທ້າຍປີ”), ຊຶ່ງປະກອບມີ 6 ຂັ້ນ (ຂັ້ນ 1 ແມ່ນຂັ້ນສູງສຸດ) ຄື:

  1. ຂັ້ນ 1 : Grand Cordon of the Order of the Rising Sun
  2. ຂັ້ນ 2 : The Order of the Rising Sun, Gold and Silver Star
  3. ຂັ້ນ 3 : The Order of the Rising Sun, Gold Rays with Neck Ribbon
  4. ຂັ້ນ 4 : The Order of the Rising Sun, Gold Rays with Rosette
  5. ຂັ້ນ 5 : The Order of the Rising Sun, Gold and Silver Rays
  6. ຂັ້ນ 6 : The Order of the Rising Sun, Silver Rays

 

ໂດຍ: ດອກຕາເວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.