ອີຢູສະໜັບສະໜູນ 50 ລ້ານເອີໂຣແກ່ຍຸດທະສາດດ້ານໂພຊະນາການໃນລາວ

0
55

ສະຫະພາບເອີຣົບ (ອີຢູ) ໄດ້ໃຫ້ທຶນຈຳນວນ 50 ລ້ານເອີໂຣ ຫຼື ປະມານ 484 ຕື້ກວ່າກີບ ເພື່ອສະໜັບສະໜູນຍຸດທະສາດແຫ່ງ ຊາດດ້ານໂພຊະນາການຂອງ ສປປ ລາວ ໂດຍສະເພາະການຫຼຸດຜ່ອນການຂາດສານອາຫານຂອງເດັກນ້ອຍໃນລາວ ໂຄງການດັ່ງກ່າວຈະໄດ້ຮັບຈັດຕັ້ງປະຕິບັດເປັນເວລາ 4 ປີ (2019-2022) ໂດຍຈະສຸມໃສ່ແກ້ໄຂສາເຫດທີ່ແຕກຕ່າງກັນຂອງການຂາດສານອາຫານໃນເຂດຊົນນະບົດ ແລະ ເຂດຫ່າງໄກສອກຫຼີກ ເປັນຕົ້ນແມ່ນບົດບາດຍິງ-ຊາຍ ກຸ່ມຄົນທີ່ດ້ອຍໂອກາດ ລວມທັງການປັບ ປຸງຄຸນນະພາບຂອງການໄດ້ຮັບສານອາຫານ ເພີ່ມການເຂົ້າເຖິງ ແລະ ຄຸນນະພາບການບໍລິການ-ການບໍລິຫານທີ່ກ່ຽວຂ້ອງກັບໂພຊະນາການ.

ພິທີເປີດໂຄງການສະໜັບສະໜູນຍຸດທະສາດແຫ່ງຊາດດ້ານໂພຊະນາການຂອງ ສປປ ລາວ ໄດ້ຈັດຂຶ້ນເມື່ອວັນທີ 9 ກັນຍາຜ່ານມາທີ່ໂຮງແຮມ ຄຣາວ ພລາຊາ ນະຄອນຫຼວງວຽງຈັນ ໂດຍການຮ່ວມມືທີ່ເຂັ້ມແຂງລະຫວ່າງລັດຖບານລາວ ແລະ ສະຫະພາບເອີ ຣົບຊຶ່ງເປັນຄວາມມຸ່ງໝັ້ນທີ່ແຂງແກ່ນຂອງສະຫະພາບເອີຣົບທີ່ຈະສະໜັບສະໜູນ ສປປ ລາວ ໃຫ້ຫຼຸດພົ້ນອອກຈາກສະຖານະປະ ເທດດ້ອຍພັດທະນາ ແລະ ນຳໄປສູ່ເປົ້າໝາຍລວມໃນປີ 2030.

ທ່ານ ດຣ ບຸນເພັງ ພິລາວົງ ຫົວໜ້າກົມອະນາໄມ ແລະ ສົ່ງເສີມສຸຂະພາບກະຊວງສາທາລະນະສຸກ ໄດ້ກ່າວວ່າ ສະພາບການຂາດອາຫານຊຳເຮື້ອ ລວງສູງບໍ່ໄດ້ມາດຕະຖານ (ປະເພດເຕ້ຍ) ຢູ່ໃນ ສປປ ລາວ ຍັງມີລະດັບສູງ ໂດຍ 1 ໃນ 3 ຂອງເດັກອາຍຸຕ່ຳກວ່າ 5 ປີຍັງຂາດອາຫານຊຳເຮື້ອ ແລະ ມີ 11 ແຂວງມີອັດຕາເດັກຂາດອາຫານຊຳເຮື້ອສູງ ຫຼື ເທົ່າກັບ 30% ໃນປີ 2017 ສ່ວນ ເດັກນ້ອຍໃນເຂດຊົນນະບົດໃນຄອບຄົວທຸກຍາກຂາດອາຫານຊຳເຮື້ອສູງກວ່າ 3 ເທົ່າ ທຽບໃສ່ເດັກໃນຄອບຄົວຕົວເມືອງທີ່ມີເສດ ຖະກິດດີ ທັງນີ້ ລັດຖະບານລາວກໍໄດ້ວາງເປົ້າໝາຍໃນປີ 2025 ໃຫ້ຫຼຸດລົງເຫຼືອ 25% ຫຼື 1 ໃນ 4 ຂອງເດັກອາຍຸຕ່ຳກວ່າ 5 ປີ ທີ່ຂາດອາຫານຊຳເຮື້ອ.

ດຣ ບຸນເພັງ ພິລາວົງ ກ່າວຕື່ມວ່າ ສະພາວະໂພຊະນາການໃນເດັກອາຍຸຕ່ຳກວ່າ 5 ປີທີ່ພວກເຮົາປະເຊີນໃນປັດຈຸບັນແມ່ນມີສອງບັນຫາຄື ສະພາວະໂພຊະນາການຕ່ຳ ແລະ ໂພຊະນາການເກີນ ຊຶ່ງຈະພົບວ່າເດັກນ້ອຍຫຼາຍກວ່າ 59.000 ຄົນ ມີຄວາມສ່ຽງທີ່ຈະເສຍຊີວິດໃນທຸກໆປີຈາກການຂາດອາຫານກະທັນຫັນຮ້າຍແຮງ ນອກຈາກນີ້ ການຂາດວິຕາມິນ ແລະ ແຮ່ທາດກໍຍັງມີໂຕເລກທີ່ຍສູງເປັນຕົ້ນແມ່ນການເປັນພະຍາດເລືອດຈາງ ລວມທັງການບໍລິໂພກເກືອທີ່ປະສົມໄອໂອດິນຍັງບໍ່ບັນລຸຄາດໝາຍ ການຂາດສານອາຫານແບບທັບຊ້ອນ ມີທັງນ້ຳໜັກເກີນ ແລະ ກະທັນຫັນ ແບບຈ່ອຍກໍຍັງມີທ່າອຽງທີ່ຈະເພີ່ມຂຶ້ນ.

 

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.