ອິນໂດ… ປຸກລະດົມປະຊາຊົນກິນເຂົ້າ 1 ມື້ຕໍ່ອາທິດ ແລ້ວຫັນມາກິນອາຫານປະເພດອື່ນແທນ!!

0
3663

ຊາວອິນໂດເນເຊຍຕື່ນຕົວຮ່ວມກັນປຸກລະດົມ “ຫຼຸດ-ເລີກ” ການກິນເຂົ້າພາຍຫຼັງພົບວ່າມີຜູ້ປ່ວຍພະຍາດເບົາຫວານຈາກການກິນເຂົ້າອັນເປັນສາເຫດຫຼັກຂອງພະຍາດເພີ່ມຂຶ້ນຈົນໜ້າຕົກໃຈ.

ໂຄງການປຸກລະດົມດັ່ງກ່າວໃນອິນໂດເນເຊຍມີຊື່ວ່າ: “No Rice Movement” ເປັນການປຸກລະດົມໃຫ້ປະຊາຊົນຫຼຸດ-ລະ-ເລີກນິດໄສຕິດການກິນເຂົ້າແລ້ວຫັນມາກິນອາຫານປະເພດອື່ນໆເຊັ່ນ: ຜັກ, ຊີ້ນສັດ ແລະ ຖົ່ວໃຫ້ຫຼາຍຂຶ້ນ ໂດຍມີການປຸກລະດົມຜ່ານທາງໂຊຊຽນມີເດຍ ແລະ ຈາກລັດຖະບານທ້ອງຖິ່ນ ລວມທັງລັດຖະບານເມືອງຢ໋ອກຢາກາຕາ ເມືອງຫຼວງດ້ານກະສິກຳຂອງປະເທດ ໂດຍຂໍຮ້ອງໃຫ້ປະຊາຊົນຢຸດກິນເຂົ້າຢ່າງໜ້ອຍ 1 ວັນຕໍ່ອາທິດ.

ຢ່າງໃດກໍຕາມ ການຫຼຸດ-ລະ-ເລີກການກິນເຂົ້າເປັນເລື່ອງທີ່ຍາກສຳລັບຊາວອິນໂດເນເຊຍ ຊຶ່ງຖືກປູກຝັງເປັນນິດໄສຕິດການກິນ ເຂົ້າມາແຕ່ຍາວນານ, ໂດຍສະພາະສະໄໝອະດີດປະທານາທິບໍດີ ຊູຮາຣໂຕ ໃນຍຸກສະຕະວັນ 1970 ຊຶ່ງປຸກລະດົມໃຫ້ປະຊາຊົນກິນ ເຂົ້າເປັນອາຫານຫຼັກແທນເຂົ້າສາລີ, ມັນຝຣັ່ງ ແລະ ທັນຍາພືດອື່ນໆ.

ທັງນີ້, ໃນວັນເບົາຫວານໂລກເມື່ອວັນທີ 14 ພະຈິກຜ່ານມາ, ຜູ້ຊ່ຽວຊານໄດ້ເປີດເຜີຍວ່າ: ປັດຈຸບັນມີຜູ້ປ່ວຍເປັນພະຍາດເບົາ ຫວານທົ່ວໂລກປະມານ 425 ລ້ານຄົນ ໃນນັ້ນ ຈຳນວນ 20 ລ້ານຄົນແມ່ນຢູ່ໃນອິນໂດເນເຊຍຊຶ່ງມີປະຊາກອນປະມານ 260 ລ້ານຄົນ, ອິນໂດເນເຊຍເປັນຊາດທີ່ນິຍົມບໍລິໂພກເຂົ້າຫຼາຍທີ່ສຸດເປັນອັນດັບ 3 ຂອງໂລກ ແລະ ພະຍາດເບົາຫວານກໍເປັນສາເຫດການເສຍຊີວິດອັນດັບ 3 ຮອງຈາກພະຍາດຫຼອດເລືອດສະໝອງ ແລະ ພະຍາດຫົວໃຈ.

ສ່ວນຜູ້ຊ່ຽວຊານໄດ້ອອກມາລະບຸວ່າ: ຜູ້ປ່ວຍພະຍາດເບົາຫວານສ່ວນໃຫຍ່ຢູ່ໃນປະເທດທີ່ມີລາຍໄດ້ຕໍ່າ ແລະ ປານກາງເຊັ່ນ: ອິນ ໂດເນເຊຍ ທັງນີ້, ເຖິງແມ່ນວ່າເຂົ້າຈະເປັນອາຫານທີ່ມີກາກໄຍ, ຄາໂບໄຮເດຣດ ແລະ ວິຕາມິນຕ່າງໆສູງ ແຕ່ຖ້າກິນຫຼາຍເກີນໄປກໍຈະນຳໄປສູ່ການເກີດພະຍາດເບົາຫວານ ເພາະວ່າເຂົ້າແມ່ນຈະເຮັດໃຫ້ລະດັບນໍ້າຕານໃນເລືອດສູງ ແລະ ຮ່າງກາຍຕໍ່ຕ້ານສານອິນຊູລິນ, ພະຍາດເບົາຫວານຍັງນຳໄປສູ່ພະຍາດຮ້າຍອື່ນໆບໍ່ວ່າຈະເປັນຫຼອດເລືອດສະໝອງຕີບ ຫຼື ແຕກ, ຫົວໃຈວາຍ, ຕາບອດ ຫຼື ຖ້າອາການໜັກກໍອາດຖືກຕັດອະໄວຍະວະໃດໜຶ່ງໃນຮ່າງກາຍ.

 

ຮຽບຮຽງ: ເພັງສະຫວັນ

ຮູບພາບ: thairath

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.