ອາເມຣິກາເລື່ອນເວລາໃຫ້ “ຮົວເຫວີຍ” ອີກ 90 ວັນ

0
38

ລັດຖະບານອາເມຣິກາຕໍ່ເວລາໃຫ້ບໍລິສັດ ຮົວເຫວີຍ ຂອງຈີນສາມາດຄ້າຂາຍຮ່ວມກັບຜູ້ປະກອບການໃນອາເມຣິຕໍ່ໄປໄດ້ອີກ 90 ວັນ ແຕ່ກໍຂຶ້ນບັນຊີດຳບໍລິສັດຍ່ອຍຂອງຮົວເຫວີຍ ເພີ່ມອີກເກືອບ 50 ບໍລິສັດ ສຳນັກຂ່າວຕ່າງປະເທດລາຍງານເມື່ອວັນທີ 19 ສິງຫາຜ່ານມາວ່າ ລັດຖະມົນຕີກະຊວງອຸດສາຫະກຳຂອງອາເມຣິກາໄດ້ອອກມາຖະແຫຼງກ່ຽວກັບການຂະຫຍາຍເວລາຜ່ອນຜັນໃຫ້ແກ່ບໍລິສັດຮົວເຫວີຍຂອງຈີນເພີ່ມອີກພາຍຫຼັງທີ່ໝົດກຳນົດ 90 ວັນຄັ້ງທຳອິດເມື່ອຕົ້ນອາທິດທີ່ຜ່ານມາ.

ທັງນີ້ ການຖະແຫຼງຢືນຢັນດັ່ງກ່າວໝາຍຄວາມວ່າ ກະຊວງອຸດສາຫະກຳຂອງອາເມຣິກາຈະຍັງຄົງໃຊ້ເວລາໃນຊ່ວງທີ່ຜ່ອນຜັນນີ້ເດີນໜ້າພິຈາລະນາໃບອະນຸຍາດໃຫ້ແກ່ຜູ້ປະກອບການໃນປະເທດຕໍ່ໄປໃນການຄ້າຂາຍ ແລະ ທຸລະກຳຮ່ວມກັບຮົວເຫວີຍຖ້າຫາກການຮ່ວມມື ດັ່ງກ່າວບໍ່ສ້າງຄວາມສ່ຽງ ແລະ ສົ່ງຜົນກະທົບຕໍ່ຄວາມໝັ້ນຄົງ ແລະ ເພື່ອໃຫ້ເປັນໄປຕາມໜຶ່ງໃນເງື່ອນໄຂຂອງຂໍ້ ຕົກລົງສະຫງົບເສິກລະຫວ່າງຜູ້ນຳທັງ 2 ປະເທດ ຊຶ່ງໄດ້ພົບປະຫາລືກັນລະຫວ່າງການປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ ຫຼື G20 ທີ່ນະຄອນໂອຊາກາ ປະເທດຍີ່ປຸ່ນເມື່ອທ້າຍເດືອນມິຖຸນາຜ່ານມາ.

ຢ່າງໃດກໍຕາມ ລັດຖະມົນຕີກະຊວງອຸດສາຫະກຳຂອງອາເມຣິກາກ່າວອີກວ່າ ເຖິງແມ່ນວ່າການຕໍ່ເວລາໃຫ້ກັບຮົວເຫວີຍຕື່ມອີກ 90 ວັນ ແຕ່ລັດຖະບານອາເມຣິກາຈະເພີ່ມລາຍຊື່ ບໍລິສັດທີ່ເປັນຕົວແທນ ຫຼື ຄູ່ສັນຍາຂອງຮົວເຫວີຍອີກ 46 ແຫ່ງເຂົ້າໃນບັນຊີດຳ ຊຶ່ງສົ່ງຜົນໃຫ້ຂະນະນີ້ລາຍຊື່ບໍລິສັດທີ່ກ່ຽວຂ້ອງກັບຮົວເຫວີຍທີ່ຢູ່ໃນບັນຊີດຳຂອງອາເມຣິກາເພີ່ມຂຶ້ນຫຼາຍວ່າ 100 ແຫ່ງ ຂະນະທີ່ຮົວເຫວີຍກໍຍັງບໍ່ມີທ່າທີຕອບໂຕ້ແຕ່ຢ່າງໃດ.

ໂດຍຜູ້ນຳອາເມຣິກາໄດ້ລົງນາມໃນຄຳສັ່ງຝ່າຍບໍລິຫານເມື່ອວັນທີ 15 ພຶດສະພາຜ່ານມາ ຊຶ່ງປະກາດສະຖານະການສຸກເສີນດ້ານເຕັກໂນໂລຊີເພື່ອປົກປ້ອງລະບົບເຄືອຂ່າຍອິນເຕີເນັດ ແລະ ເຕັກໂນໂລຊີສື່ສານຕ່າງໆຂອງປະເທດ ຊຶ່ງມີເນື້ອໃນໝາຍເຖິງ “ການຮຸກຮານໂດຍສັດຕູ” ເຖິງແມ່ນວ່າຜູ້ນຳອາເມຣິກາຈະຢືນຢັນວ່າບໍ່ມີເຈຕະນາເຈາະຈົງໄປທີ່ບໍລິສັດໃດໂດຍກົງກໍຕາມ ແຕ່ທຸກຝ່າຍກໍເຊື່ອວ່າເປັນຄຳສັ່ງທີ່ເຈາະຈົງເຖິງຮົວເຫວີຍຊຶ່ງພັດທະນາແບບກ້າວກະໂດດ ແລະ ຂຶ້ນມາຢູ່ແຖວໜ້າຂອງການເປັນຜູ້ພັດທະນາລະບົບເຄືອຂ່າຍ 5G ແລະ ອຸປະກອນດ້ານການສື່ສານໂທລະຄົມມະນາຄົມອີກຫຼາຍປະເທດ.

 

 

 

ຮຽບຮຽງ: ພ.ສະຫວັນ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.