ອາເມຣິກາສັ່ງຫ້າມ… ບໍ່ໃຫ້ກອງທັບໃຊ້ແອັບຕິກຕ໋ອກ “TikTok”

0
136

ລັດຖະບານແຫ່ງອາເມຣິກາປະກາດຫ້າມນຳໃຊ້ແອັບພລີເຄເຊິນຕິກຕ໋ອກ “TikTok” ເທິງໂທລະສັບມືຖືຂອງໜ່ວຍງານທີ່ລັດເປັນເຈົ້າຂອງຢ່າງເດັດຂາດ, ເນື່ອງຈາກວ່າອາດກາຍເປັນໄພຄຸກຄາມຕໍ່ຄວາມໝັ້ນຄົງຂອງຊາດ.

ເມື່ອລະຫວ່າງຕົ້ນເດືອນມັງກອນຜ່ານມາ ເວັບໄຊຂ່າວ military.com ໄດ້ລາຍງານວ່າ: ກອງທັບບົກ ແລະ ກອງທັບເຮືອຂອງອາເມຣິກາໄດ້ອອກນະໂຍບາຍສັ່ງຫ້າມເຈົ້າໜ້າທີ່ທຸກຄົນບໍ່ໃຫ້ໃຊ້ແອັບພລີເຄເຊິນ TikTok ພາຍຫຼັງທີ່ມີການພິຈາລະນາວ່າແອັບດັ່ງກ່າວຊຶ່ງເປັນແອັບສັນຊາດຈີນ ແລະ ເປັນແອັບພລີເຄເຊິນທີ່ໄດ້ຮັບຄວາມນິຍົມທົ່ວໂລກໃນປັດຈຸບັນ ອາດກາຍເປັນໄພຄຸກຄາມຕໍ່ຄວາມໝັ້ນຄົງ ແລະ ສ່ຽງຕໍ່ການເປີດເຜີຍຂໍ້ມູນສ່ວນຕົວຂອງບຸກຄົນ.

ພັນຕີຍິງ ໂຣບິນ ໂອຊົວ ໂຄສົກຍິງຂອງກອງທັບບົກອາເມຣິກາຢືນຢັນວ່າ: ແອັບ TikTok ຖືກພິຈາລະນາວ່າ: “ເປັນໄພຄຸກຄາມ” ທາງໄຊເບີ, ດັ່ງນັ້ນ ທາງກອງທັບຈຶ່ງບໍ່ອະນຸຍາດໃຫ້ເຈົ້າໜ້າທີ່ໃຊ້ງານແອັບດັ່ງກ່າວເທິງໂທລະສັບມືຖືທີ່ລັດຖະບານເປັນເຈົ້າຂອງລິຂະສິດ. ຢ່າງໃດກໍຕາມ ກອງທັບກໍບໍ່ສາມາດຫ້າມເຈົ້າໜ້າທີ່ທຸກຄົນໃຫ້ເຊົາໃຊ້ແອັບດັ່ງກ່າວຊຶ່ງເປັນພື້ນທີ່ສ່ວນຕົວໄດ້, ດັ່ງ ນັ້ນ ຈຶ່ງມີການແນະນຳເຈົ້າໜ້າທີ່ໃຫ້ເພີ່ມຄວາມລະມັດລະວັງໃນເວລາດາວໂຫຼດແອັບດັ່ງກ່າວ, ເຝົ້າລະວັງໂທລະສັບຫາກໄດ້ຮັບຂໍ້ ຄວາມທີ່ຜິດປົກກະຕິ ຫຼື ຂໍ້ຄວາມທີ່ບໍ່ເພິ່ງປະສົງ ລວມເຖິງແນະນຳໃຫ້ຖອນການຕິດຕັ້ງແອັບ TikTok ອອກຈາກອຸປະກອນທັນທີເພື່ອຫຼີກລ້ຽງການເປີດເຜີຍຂໍ້ມູນສ່ວນບຸກຄົນ.

ຊຶ່ງເມື່ອລະຫວ່າງ 2 ເດືອນກ່ອນໜ້າທີ່ຈະປະກາດຫ້າມດັ່ງກ່າວ, ທາງກອງທັບອາເມຣິກາເຄີຍໃຊ້ແອັບ TikTok ເປັນຊ່ອງທາງທີ່ມີປະສິດທິພາບໃນການເຂົ້າເຖິງກຸ່ມຄົນລຸ້ນໃໝ່ເພື່ອເຊີນຊວນໃຫ້ມາເຂົ້າຮ່ວມກອງທັບ, ເຖິງແມ່ນວ່າຝ່າຍນິຕິບັນຢັດຈະຮຽກຮ້ອງໃຫ້ມີການກວດສອບວ່າແອັບດັ່ງກ່າວຊຶ່ງມີຖານຢູ່ໃນ ສປ ຈີນນັ້ນຈະມີຄວາມປອດໄພສໍ່າໃດ?.

 

 

ຮຽບຮຽງ: ເພັງສະຫວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.