ອາເມຣິກາຂວໍ້າບາດຫຼາຍກະຊວງສຳຄັນຂອງຕວັກກີ

0
148

ລັດຖະບານອາເມຣິກາອອກມາດຕະການຂວໍ້າບາດບັນດາກະຊວງສຳຄັນໆຂອງຕວັກກີ ເພື່ອຫວັງເພີ່ມແຮງກົດດັນໃຫ້ລັດຖະບານ ອັງກາຣາ ຍຸດຕິປະຕິບັດການທາງທະຫານຕໍ່ກອງກຳລັງຊາວເຄີດໃນພາກເໜືອຂອງຊີເຣຍ.

ສຳນັກຂ່າວຕ່າງປະເທດລາຍງານຈາກນະຄອນວໍຊິງຕັນ ອາເມຣິກາເມື່ອວັນທີ 14 ຕຸລາຜ່ານມາວ່າ ອາເມຣິກາອອກຖະແຫຼງການປະກາດມາດຕະການຂວໍ້າບາດທາງເສດຖະກິດ ຕໍ່ເຈົ້າໜ້າທີ່ລະດັບສູງຂອງຫຼາຍກະຊວງທີ່ສຳຄັນຂອງຕວັກກີດ້ວຍການອາຢັດຊັບ ສິນຂອງບຸກຄົນຊຶ່ງມີຊື່ຢູ່ໃນບັນຊີດຳທີ່ຄອບຄອງສິນຊັບໃນອາເມຣິກາ ແລະ ການປະກາດໃຫ້ບຸກຄົນ ແລະ ບໍລິສັດໃດກໍຕາມໃນອາ ເມຣິກາທີ່ເຮັດທຸລະກຳຮ່ວມກັບບຸກຄົນເຫຼົ່ານີ້ຖືວ່າເປັນ “ອາຊະຍາກຳທາງເສດຖະກິດ”.

ພ້ອມນີ້ ທຳນຽບຂາວກໍໄດ້ເຜີຍແຜ່ຖະແຫຼງການຂອງປະທານາທິບໍດີ ໂດນັລ ທຣັມ ວ່າ ທຣັມ ມີຄວາມພ້ອມສູງສຸດໃນການທຳລາຍ ລ້າງເສດຖະກິດຂອງຕວັກກີຕາບໃດທີ່ລັດຖະບານອັງກາຣາຍັງຄົງເລືອກເດີນໃນເສັ້ນທາງອັນຕະລາຍ ຊຶ່ງໝາຍເຖິງປະຕິບັດການທາງທະຫານຂ້າມພົມແດນຕໍ່ຖານທີ່ໝັ້ນຂອງກອງກຳລັງປ້ອງກັນຕົນເອງຊາວເຄີດຕາມແນວພົມແດນທາງເໜືອຂອງຊີເຣຍ ຂະ ນະທີ່ປະທານາທິບໍດີ ໄມ ເພນຊ ກ່າວວ່າ ຖະແຫຼງການຂອງຜູ້ນຳອາເມຣິກາຄືການສົ່ງສັນຍານທີ່ຊັດເຈນວ່າ ລັດຖະບານວໍຊິງຕັນຕ້ອງການໃຫ້ຕວັກກີຢຸດຕິປະຕິບັດການທາງທະຫານທີ່ເປັນການຮຸກຮານຕໍ່ຖານທີ່ໝັ້ນຂອງກຳລັງຊາວເຄີດ ແລະ ເຈລະຈາກັບອີກຝ່າຍໂດຍສັນຕິພາບເພື່ອຜ່ອນຄາຍຄວາມຮຸນແຮງ.

ຢ່າງໃດກໍຕາມ ທະຫານອາເມຣິກາປະມານ 1.000 ຄົນພ້ອມອາວຸດຈຳນວນໜຶ່ງໄດ້ຖອນກຳລັງອອກຈາກແນວຮົບທາງເໜືອຂອງຊີເຣຍ ແລະ ຈະເດີນທາງກັບໄປປະຈຳການຕາມຖານທັບໃນຕາເວັນອອກກາງ ຂະນະທີ່ ທ່ານ ມາຣກ ເອສເປີຣ ລັດຖະມົນຕີກະ ຊວງປ້ອງກັນປະເທດຂອງເມຣິກາກ່າວວ່າ ການຖອນກຳລັງຂອງກອງທັບຂອງອາເມຣິກາແມ່ນເປັນໄປຕາມການສົນທະນາທາງໂທ ລະສັບລະຫວ່າງ ໂດນັລ ທຣັມ ແລະ ປະທານາທິບໍດີ ເຣເຊບ ເທຢິບ ເອີຣໂດກັນ ແລະ ຜູ້ນຳຕວັກກີກໍຖືວ່າເປັນການເປີດທາງໃຫ້ລັດຖະບານອັງກາຣາເປີດສາກປະຕິບັດການທາງທະຫານ “ພີຊສະປຣິງ” ເມື່ອກາງອາທິດທີ່ຜ່ານມາ ຊຶ່ງທ່ານ ເອີຣໂດກັນ ຢໍ້າວ່າ ຕ້ອງການໃຫ້ກອງກຳລັງນັກຮົບຊາວເຄີດຖອຍອອກໄປເພື່ອຕ້ອງການກຳນົດພື້ນທີ່ປອດໄພ ຫຼື ເຂດປ້ອງກັນ ຊຶ່ງຈະຊ່ວຍໃຫ້ຜູ້ລີ້ໄພຊາວຊີເຣຍປະມານ 3,6 ລ້ານຄົນໃນຕວັກກີສາມາດເດີນທາງກັບມາປະເທດໄດ້ຢ່າງປອດໄພ.

ຂະນະທີ່ອົງການສັງເກດການດ້ານສິດທິມະນຸດໃນຊີເຣຍໄດ້ລາຍງານວ່າ ກອງທັບຊີເຣຍເລີ່ມທະຍອຍເຄື່ອນທັບເຂົ້າສູ່ພົມແດນທາງພາກເໜືອ (ຕາມຂໍ້ຕົກລົງ) ກັບຜູ້ແທນເຈລະຈາຊາວເຄີດແລ້ວ ເພື່ອສະໜັບສະໜູນການສູ້ຮົບກັບກອງທັບຕວັກກີທີ່ມີທ່າອຽງວ່າຈະກໍ່ໃຫ້ເກີດເຫດການນອງເລືອດ ແລະ ວິກິດດ້ານມະນຸດສະທຳຄັ້ງໃໝ່.

 

 

 

 

ຮຽບຮຽງ: ເພັງສະຫວັນ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.