“ອາຊຽນ” ແຫຼ່ງອາຊະຍາກຳຂ້າມຊາດ

0
593

ລາຍງານຂອງສະຫະປະຊາຊາດວ່າດ້ວຍບັນຫາຢາເສບຕິດ ແລະ ອາຊະຍາກຳ ໂດຍໜ່ວຍງານ UNODC ຊຶ່ງເຜີຍແຜ່ເມື່ອວັນທີ 18 ກໍລະກົດລະບຸວ່າ ພູມີພາກອາຊີຕາເວັນອອກສຽງໃຕ້ມີການເຕີບໂຕຂອງເຄືອຂ່າຍອາຊະຍາກຳຂ້າມຊາດເພີ່ມຂຶ້ນເລື້ອຍໆ ນອກເໜືອຈາກການສະແຫວງຫາຜົນປະໂຫຍດຈາກການສໍ້ລາດບັງຫຼວງ ບັນຫາການບັງຄັບໃຊ້ກົດໝາຍທີ່ບໍ່ເຂັ້ມງວດ ແລະ ມາດຕະການຄວບຄຸມການຜ່ານເຂົ້າ-ອອກພົມແດນທີ່ ບໍ່ໄດ້ມາດຕະຖານ.

ຜົນທີ່ເກີດຂຶ້ນຈາກການຖືເບົາສົ່ງຜົນໃຫ້ເຄືອຂ່າຍອາຊະຍາກຳຂ້າມຊາດສ້າງລາຍໄດ້ໃນແຕ່ລະປີຢ່າງມະຫາສານຈາກທຸລະກິດຄ້າຢາເສບຕິດ ທຸລະກິດສິນຄ້າປອມແປງ ການຄ້າຢາ ແລະ ສິນຄ້າຕ່າງໆ ລວມເຖິງການຄ້າມະນຸດ ຄ້າສັດປ່າ ແລະ ຄ້າໄມ້ເຖື່ອນ ທັງນີ້ ລາຍງານຂອງສະຫະປະຊາຊາດລະບຸຢ່າງຊັດເຈນວ່າ ພູມີພາກອາຊີຕາເວັນອອກສຽງໃຕ້ເຕັມໄປດ້ວຍລະບົບການສໍ້ລາດບັງຫຼວງ ແລະ ການຈ່າຍຄ່າທຳນຽມຕ່າງໆເພື່ອຄວາມສະດວກຂອງເຈົ້າໜ້າທີ່ໃນລະບົບລາຊະການ.

ເຄືອຂ່າຍອາຊະຍາກຳຂ້າມຊາດສ່ວນໃຫຍ່ມີຖານປະຕິບັດການຢູ່ໃນຮົງກົງ ມາເກົ໋າ ໄຕ້ຫວັນ ແລະ ໄທ ການຂະຫຍາຍຕົວຂອງເຄືອຂ່າຍອາຊະຍາກຳຂ້າມຊາດກໍເພີ່ມຂຶ້ນຢ່າງໄວວາ ແລະ ມັກໃຊ້ສະຖານທີ່ກາຊິໂນເປັນເສັ້ນທາງການຟອກເງິນຜິດກົດໝາຍ ຫຼື ບໍ່ກໍຝາກເງິນຜ່ານລະບົບທະນາຄານໃນສິງກະໂປ ແລະ ຮົງກົງ ສະເພາະເຄືອຂ່າຍອາຊະຍາກຳທີ່ກ່ຽວຂ້ອງກັບບັນຫາຢາເສບຕິດພົບວ່າ ຜົນຜະລິດຢາເສບຕິດປະເພດ “ເມທແອມເຟຕາມິນ” ສ່ວນໃຫຍ່ມາຈາກພື້ນທີ່ພາກເໜືອຂອງມຽນມາຜ່ານສູ່ຕະຫຼາດພູມີພາກອາຊີ-ແປຊິຟິກຖືເປັນຕະຫຼາດໃຫຍ່ທີ່ສຸດຂອງໂລກ ຫຼາຍຄັ້ງພົບການຊຸກເຊື່ອງຢາເສບຕິດຢູ່ຕາມວັດສະດຸຫຸ້ມຫໍ່ໃບຊາ ແລະ ອື່ນໆ.

ຕະຫຼາດຊື້ຂາຍຢາເສບຕິດທີ່ມີມູນຄ່າມະຫາສານປະກອບມີ ອົສຕຣາລີ ຍີ່ປຸ່ນ ນິວຊີແລນ ແລະ ສ.ເກົາຫຼີ ປະເມີນມູນຄ່າສະເພາະຊ່ວງປີທີ່ຜ່ານມາປະມານ 30.300-61.400 ລ້ານໂດລາ ເພີ່ມຈາກຊ່ວງປີ 2013 ມູນຄ່າປະມານ 20.000 ລ້ານໂດລາ ສ່ວນປະລິມານຜູ້ໃຊ້ ຢາເສບຕິດປະເພດເມທແອມເຟຕາມິນ ຫຼື ຢາບ້າ ແລະ ຢາໄອສ ທົ່ວພູມີພາກອາຊີຕາເວັນອອກມີຫຼາຍກວ່າ 12 ລ້ານຄົນ ໂດຍຢາໄອສນິຍົມເສບໃນກຸ່ມຄົນຊັ້ນກາງ ແລະ ນັກທ່ອງທ່ຽວຕາມສະຖານບັນເທີງ ສ່ວນຢາບ້ານິຍົມເສບໃນກຸ່ມຄົນຊົນຊັ້ນແຮງງານ.

 

 

ຮຽບຮຽງ: ສະຫະລັດ ວອນທິວົງໄຊ

ຮູບພາບ: thairath

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.