ອາກາດໃນຈີນເລີ່ມມີຄຸນນະພາບດີຂຶ້ນ

0
90

ສຳນັກຂ່າວຊື່ດັງໃນ ສປ ຈີນ ລາຍງານເມື່ອວັນທີ 10 ກໍລະກົດຜ່ານມາວ່າ ກະຊວງນິເວດວິທະຍາ ແລະ ສິ່ງແວດລ້ອມຈີນ (Ministry of Ecology and Environment)  ໃຫ້ຮູ້ວ່າ ໃນຊ່ວງເຄິ່ງປີທຳອິດຂອງປີ 2019 ຄຸນນະພາບອາກາດໃນເມືອງຕ່າງໆທົ່ວປະເທດຈີນມີພັດທະນາການທີ່ດີຂຶ້ນຊຶ່ງເປັນຜົນມາຈາກການເພີ່ມມາດຕະການປົກປ້ອງສິ່ງແວດລ້ອມຂອງລັດຖະ ບານຈີນລາຍງານດຽວກັນລະບຸອີກວ່າ ຈຳນວນວັນທີ່ຄຸນນະພາບອາກາດດີໃນເມືອງ 337 ແຫ່ງທົ່ວປະເທດມີຄ່າສະເລ່ຍ 80,1% ຊຶ່ງເພີ່ມຂຶ້ນຈາກປີກ່ອນ 0,4%.

ຂະນະທີ່ໃນຊ່ວງເດືອນມັງກອນຫາມິຖຸນາຄວາມໜາແໜ້ນຂອງຝຸ່ນພິດຂະໜາດນ້ອຍ ຫຼື ຄ່າພີເອັມ 2,5 (PM2,5) ມີຄ່າສະ ເລ່ຍ 40 ໄມໂຄຣກຣາມຕໍ່ແມັດກ້ອນ ຫຼຸດລົງຈາກປີກ່ອນ 2,4% ໃນຂະນະທີ່ຝຸ່ນລະອອງພີເອັມ 10 ແລະ ແກ໊ສຊັລເຟີຣໄດ ອ໊ອກໄຊກໍມີຄວາມໜາແໜ້ນຫຼຸດລົງເຫຼືອ 4,2% ແລະ 14,3% ຕາມລຳດັບ ທັງນີ້ ໃນຊ່ວງເວລາດັ່ງກ່າວເມືອງໄຫໂຂ່ວໃນມົນທົນໄຫ່ໜານ ເມືອງລາຊາໃນເຂດປົກຄອງຕົນເອງຊົນຊາດທິເບດ ແລະ ເມືອງເຊີນເຈີ້ນເປັນເມືອງທີ່ມີຄຸນນະພາບອາກາດທີ່ດີທີ່ສຸດ 3 ແຫ່ງຈາກ 168 ເມືອງທີ່ມີການສຳຫຼວດຂໍ້ມູນ.

ຢ່າງໃດກໍດີ ຄວາມໜາແໜ້ນຂອງຝຸ່ນພິດພີເອັມ 2,5 ໃນນະຄອນປັກກິ່ງ ເມືອງທຽນຈິນ ພື້ນທີ່ມົນທົນເຫີເປີ່ຍຜັດມີຄ່າສະເລ່ຍເພີ່ມຂຶ້ນ 4,8% ໂດຍມົນທົນເຫີເປີ່ຍ ຊານຊີ ແລະ ເຫີໜານ ຕິດອັນດັບຄຸນນະພາບອາກາດຕ່ຳທີ່ສຸດ ຂະນະທີ່ພິດໄພຕໍ່ສຸຂະພາບຂອງມົນລະພິດໃນໝອກຄວັນນັ້ນເກີດຈາກຝຸ່ນລະອອງຂະໜາດນ້ອຍ ຫຼື ທີ່ມີໜ່ວຍເປັນພີເອັມ (Particle Matter ຫຼື PM) ຊຶ່ງມີຢູ່ 2 ຂະໜາດຄື ຝຸ່ນລະອອງຂະໜາດນ້ອຍກວ່າ 10 ໄມຄຣອນ (PM10) ແລະ ຂະໜາດນ້ອຍກວ່າ 2,5 ໄມຄຣອນ (PM2,5) ທີ່ເປັນຝຸ່ນລະອອງຂະໜາດນ້ອຍສາມາດຜ່ານເຂົ້າໄປໄດ້ເລິກເຖິງລະບົບທາງເດີນຫາຍໃຈ ເນື່ອງຈາກຂົນດັງບໍ່ສາມາດທີ່ຈະກັ່ນກອງ ແລະ ປ້ອງກັນໄດ້ ນອກຈາກນັ້ນຍັງສາມາດຜ່ານເຂົ້າໄປໃນກະແສເລືອດຈຶ່ງສົ່ງຜົນອັນຕະລາຍຫຼາຍກວ່າຝຸ່ນລະອອງຂະໜາດໃຫຍ່ ທັງນີ້ ມີຫຼັກຖານທີ່ບົ່ງຊີ້ວ່າຝຸ່ນລະອອງຂະໜາດນ້ອຍມີຜົນກະທົບຕໍ່ສຸຂະພາບປະຊາຊົນໃນເມືອງທີ່ກຳລັງພັດທະນາ ແລະ ໃນປະເທດທີ່ພັດທະນາແລ້ວ.

ສ່ວນຜົນກະທົບຂອງໝອກຄວັນຕໍ່ສຸຂະພາບປະຊາຊົນມີຕັ້ງແຕ່ພະຍາດຫົວໃຈ ພະຍາດປອດ ແລະ ການເສຍຊີວິດກ່ອນໄວອັນຄວນໃນຜູ້ປ່ວຍພະຍາດຫົວໃຈ ຕໍ່ຜູ້ອາຍຸສູງ ຂະນະທີ່ຄົນທົ່ວໄປກໍມີຄວາມສ່ຽງຮ້າຍແຮງຕໍ່ລະບົບທາງເດີນຫາຍໃຈ.

 

 

ຮຽບຮຽງ: ສະຫະລັດ ວອນທິວົງໄຊ

ຮູບພາບ: mgronline.com

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.