ອະຫິວາໝູອາຟຣິກາລະບາດຢູ່ເມືອງນາຊາຍທອງ ພົບໝູຕິດເຊື້ອແລ້ວຫຼາຍກວ່າ 100 ໂຕ

0
272

ນະຄອນຫຼວງວຽງຈັນເຝົ້າລະວັງພະຍາດອະຫິວາໝູອາຟຣິກາຢ່າງໃກ້ຊິດ ພາຍຫຼັງທີ່ໄດ້ມີການລະບາດຂອງພະຍາດດັ່ງກ່າວ ຢູ່ບ້ານນາສ້ຽວ ເມືອງນາຊາຍທອງ ນະຄອນຫຼວງວຽງຈັນຊຶ່ງພົບໝູຕິດເຊື້ອ 110 ໂຕ ທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີກະຊວງກະສິກຳ ແລະ ປ່າໄມ້ໄດ້ເປີດເຜີຍຕໍ່ສື່ມວນຊົນເມື່ອວັນທີ 8 ກໍລະກົດຜ່ານມາທີ່ກົມລ້ຽງສັດ ແລະ ການປະມົງ ໃຫ້ຮູ້ວ່າ ພະຍາດອະຫິວາໝູອາຟຣິກາ ຫຼື ເອີ້ນຕາມພາສາສາກົນວ່າ African Swine Fever (ASF) ແມ່ນພະຍາດທີ່ຮ້າຍແຮງທີ່ສຸດສຳລັບໝູທຸກຊະນິດ ທຸກເພດທຸກໄວ ລວມທັງໝູປ່າ ໝູບ້ານທີ່ປະຊາຊົນລ້ຽງ ແລະ ໝູທີ່ລ້ຽງແບບເປັນຟາມ.

ໝູທີ່ຕິດພະຍາດນີ້ໄດ້ດ້ວຍການກິນເສດອາຫານທີ່ມີເຊື້ອປົນເປື້ອນຖືກເຫັນທີ່ມີເຊື້ອກັດຕິດຈາກອຸປະກອນ ເສື້ອຜ້າທີ່ປົນເປື້ອນຈາກເຊື້ອພະຍາດ ຕິດຈາກການສໍາຜັດກັບສິ່ງທີ່ຂັບຖ່າຍຂອງໝູທີ່ເຈັບ ແລະ ຕາຍ ນອກຈາກນີ້ ຍັງສາມາດແຜ່ລະບາດຈາກຊີ້ນ ເຄື່ອງໃນໝູ ທີ່ຕິດເຊື້ອທີ່ບໍ່ສຸກດີ ຖ້າຫາກວ່າໝູເປັນພະຍາດດັ່ງກ່າວຈະເຮັດໃຫ້ມີການຕາຍເຖິງ 90-100% ພະຍາດອະຫິວາໝູອາຟຣິກາຍັງບໍ່ທັນມີຢາປ້ອງກັນ ແລະ ຢາປິ່ນປົວ ເຊື້ອພະຍາດມີຄວາມທົນທານສູງຕໍ່ສະພາບແວດລ້ອມ ມີຊີວິດຢູ່ໄດ້ໃນເງື່ອນໄຂທີ່ມີຄວາມເປັນກົດເປັນດ່າງສູງໃນລະດັບ PH 3,7-11,5 ເຊື້ອພະຍາດນີ້ສາມາດມີຊີວິດຢູ່ໄດ້ໃນຊາກສັດແຊ່ແຂງ ດົນນານເຖິງ 15 ປີ ແລະ ສາມາດຖືເຊື້ອໃນໝູໄດ້ເຖິງ 4 ປີ ແລະ ເຊື້ອພະຍາດສາມາດມີຊີວິດຢູ່ລອດໃນອາຈົມເປັນເວລາ 11 ວັນ ຢູ່ໃນເລືອດທີ່ມີອຸນຫະພູມ 37 ອົງສາເປັນເວລາ 1 ເດືອນ ເຊື້ອພະຍາດສາມາດຢູ່ໃນໝູແຮມ ສົ້ມ ໝູ ແລະ ໄສ້ອົ່ວໄດ້ 3-4 ເດືອນ.

ສໍາລັບການລະບາດຂອງພະຍາດອະຫິວາໝູອາຟຣິກກາຢູ່ໃນ ສປປ ລາວ ແມ່ນໄດ້ກວດພົບການລະບາດຄັ້ງທໍາອິດຢູ່ ສປປ ລາວ ເມື່ອວັນທີ 20 ມິຖຸນາ 2019 ຢູ່ບ້ານສາມັກຄີໄຊ ເມືອງຕຸ້ມລານ ແຂວງສາລະວັນ ໃນນັ້ນ ມີໝູຖືກທໍາລາຍແລ້ວປະມານ 2.340 ໂຕສ່ວນຢູ່ນະຄອນຫຼວງວຽງຈັນພົບມີການຕາຍຂອງໝູຢູ່ເຂດບ້ານນາສ້ຽວ ເມືອງນາຊາຍທອງ ຈໍານວນ 110 ໂຕເມື່ອວັນທີ 1 ກໍລະກົດຜ່ານມາພາຍຫຼັງຜົນການວິໄຈຢັ້ງຢືນໃນວັນທີ 2 ກໍລະກົດວ່າການຕາຍຂອງໝູຈໍານວນດັ່ງກ່າວແມ່ນເກີດຈາກເຊື້ອພະຍາດອະຫິວາໝູອາຟຣິກາ ດັ່ງນັ້ນ ເພື່ອເປັນການຫຼຸດຜ່ອນຈໍານວນການຕິດເຊື້ອຂອງໝູກໍຄືຫຼຸດຜ່ອນຜົນກະທົບທາງດ້ານເສດຖະກິດໂດຍລວມ ແລະ ເພື່ອຫຼຸດຜ່ອນຜົນກະທົບຕໍ່ການສະໜອງດ້ານສະ ບຽງອາຫານ ກະຊວງກະສິກໍາ ແລະ ປ່າໄມ້ (ກົມລ້ຽງສັດ ແລະ ການປະມົງ) ພາຍຫຼັງໄດ້ຮັບການລາຍງານການເກີດລະບາດຢູ່ບັນດາປະເທດອ້ອມຂ້າງເຊັ່ນ ຈີນ ສສ ຫວຽດນາມ ແລະ ກໍາປູເຈຍ.

ດັ່ງນັ້ນ ພາກສ່ວນກ່ຽວຂ້ອງຈຶ່ງໄດ້ອອກແຈ້ງການສະບັບເລກທີ 0945/ກປ ລົງວັນທີ 5 ກັນຍາ 2018 ກ່ຽວກັບການໂຈະຊົ່ວຄາວການນໍາເຂົ້າໝູຊີ້ນ ໝູພໍ່ພັນແມ່ພັນ ໝູນ້ອຍ ແລະ ຜະລິດຕະພັນຊີ້ນໝູທຸກຊະນິດຈາກ ສປ ຈີນ ເຂົ້າລາວ ແລະ ແຈ້ງການສະບັບອື່ນໆ ການຄວບຄຸມພາຫະນະເຂົ້າ-ອອກຟາມ ຫ້າມພາຫະນະຈາກພາຍນອກເຂົ້າ-ອອກຟາມເວັ້ນເສຍ ແຕ່ມີການຂ້າເຊື້ອພະຍາດແລ້ວ ຫ້າມພາຫະນະທີ່ໃຊ້ພາຍໃນຟາມອອກໄປໃຊ້ນອກຟາມໂດຍເດັດຂາດ ຫ້າມພາຫະນະຮັບໝູເຂົ້າມາຟາມໂດຍເດັດຂາດ ຫ້າມຂາຍ ຫຼື ຄົວໝູທີ່ຕາຍໂດຍບໍ່ຮູ້ສາເຫດທີ່ມີຈຸດປະສົງນໍາມາປຸງແຕ່ງເປັນອາຫານ ເກັບໄວ້ ແລະ ຕ້ອງໄດ້ກໍາຈັດຊາກສັດ ຫຼື ຂອງເສດເຫຼືອຈາກການລ້ຽງໝູເຊັ່ນ ຝັງດິນເລິກໃນລະດັບບໍ່ໜ້ອຍກວ່າ 50 ຊັງຕີແມັດ ໂຮຍປູນຂາວ ຫຼື ລາດດ້ວຍນໍ້າຢາຂ້າເຊື້ອແລ້ວຖົມດິນໃຫ້ແໜ້ນ ຫຼື ເຜົາຊາກ ໃນສະຖານທີ່ເໝາະສົມ ບໍ່ຖິ້ມຊາກພາຍໃນຟາມ ນ້ຳເປື້ອນຈາກການລ້ຽງໝູຕ້ອງກໍາຈັດດ້ວຍວິທີຮັບປະກັນໃຫ້ໄດ້ມາດຕະຖານຂອງກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຖ້າຫາກພົບເຫັນມີການລະບາດຂອງພະຍາດໃຫ້ຫຼີກລ້ຽງບຸກຄົນ ພາຫະນະຈາກພື້ນທີ່ທີ່ມີການລະບາດຂອງພະຍາດເຂົ້າຟາມ ລວມເຖິງບໍ່ນໍາໝູຈາກພື້ນທີ່ທີ່ມີການລະບາດຂອງພະຍາດເຂົ້າມາໃນຟາມ ແລະ ຖ້າພົບເຫັນໝູຕາຍຢ່າງກະທັນຫັນໃຫ້ຮີບແຈ້ງພະແນກກະສິກໍາ ແລະ ປ່າໄມ້ແຂວງ ຫຼື ກົມລ້ຽງສັດ ແລະ ການປະມົງ ຫຼື ໂທສອບຖາມລາຍລະອຽດໄດ້ທີ່ໝາຍເລກ (021) 261500.

ຂໍ້ມູນຈາກໜັງສືພິມປະຊາຊົນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.