ຫ້າມນຳເຂົ້າ! ຊີ້ນໝູ, ຜະລິດຕະພັນຊີ້ນໝູ ຈາກຈີນ ແລະ ຫວຽດນາມ

0
648

ກົມລ້ຽງສັດ ແລະ ການປະມົງ, ກະຊວງກະສິກຳ ແລະ ປ່າໄມ້ໄດ້ອອກແຈ້ງການກ່ຽວກັບການສະກັດກັ້ນ ຫ້າມນຳເຂົ້າໝູ ແລະ ຜະລິດຕະພັນໝູທຸກຊະນິດ ລວມທັງຜະລິດຕະພັນປຸງແຕ່ງເບື້ອງຕົ້ນ ຈາກ ສປ ຈີນ ແລະ ສສ ຫວຽດນາມ ເຂົ້າສູ່ ສປປ ລາວ ເລກທີ 0460/ກປລ, ລົງວັນທີ 25 ກຸມພາ 2019 ເພື່ອປ້ອງກັນ ແລະ ສະກັດກັ້ນບໍ່ໃຫ້ພະຍາດອະຫິວາໝູອາຟຣິກາ ແຜ່ລະບາດເຂົ້າສູ່ ສປປ ລາວ, ເນື່ອງຈາກ ພະຍາດດັ່ງກ່າວແມ່ນພະຍາດລະບາດແຜ່ລາມໄວ ແລະ ຮ້າຍແຮງ.

ອີງຕາມແຈ້ງການ ແຈ້ງໃຫ້ຊາບວ່າ: ໄດ້ເກີດມີການລະບາດຂອງພະຍາດອະຫິວາໝູອາຟຣິກາ ຢູ່ໃນ ສປ ຈີນ ແລະ ສສ ຫວຽດນາມ. ເຊິ່ງອົງການສຸຂະພາບສັດສາກົນ ໄດ້ລາຍງານວ່າ ພະຍາດອະຫິວາໝູອາຟຣິກາ ແມ່ນພະຍາດລະບາດຂອງໝູ ທີ່ເກີດມາຈາກເຊື້ອໄວຣັສຕະກູນ Asfarviridae, ເຊິ່ງເຊື້ອໄວຣັສດັ່ງກ່າວນີ້ມີຄວາມທົນຕໍ່ສະພາບແວດລ້ອມ ແລະ ມີຄວາມເປັນດ່າງສູງໃນລະດັບ ph: 3,9 ຫາ 11,5 ສາມາດຖືເຊື້ອຢູ່ໃນໝູໄດ້ເຖິງ 04 ປີ. ເຮົາສາມາດສັງເກດສັດທີ່ເປັນພະຍາດນີ້ ຈະມີໄຂ້ສູງເຖິງ 42 ອົງສາເຊ, ໃບຫູ ແລະ ຜິວໜັງອາດພົບເປັນປ່າມແດງຊ້ຳ, ມີຈຸດເນື້ອຕາຍເປັນຈຸດ ຢູ່ຕາມຜິວໜັງພື້ນທ້ອງ.

ສຳລັບແຂວງທີ່ມີຊາຍແດນຕິດຈອດກັບ ສປ ຈີນ ແລະ ສສ ຫວຽດນາມ ແມ່ນຢຸດການນຳເຂົ້າຊົ່ວຄາວຜະລິດຕະພັນໝູທຸກຊະນິດ ຈາກ ສປ ຈີນ ແລະ ສສ ຫວຽດນາມ ເຂົ້າມາບໍລິໂພກ ຫຼື ມາລ້ຽງງພາຍໃນປະເທດ.

ມອບໃຫ້ຂະແໜງລ້ຽງສັດ ແລະ ການປະມົງ ນະຄອນຫຼວງວຽງຈັນ ແລະ ແຂວງ ສົມທົບກັບຂະແໜງການກ່ຽວຂ້ອງສ້າງແຜນດຸ່ນດ່ຽງຄວາມຕ້ອງການໃນການຜະລິດໝູພາຍໃນ ເພື່ອຫຼຸດຜ່ອນການນຳເຂົ້າຈາກຕ່າງປະເທດ.

ໃນກໍລະນີ ເຈົ້າໜ້າທີ່ສັດຕະວະແພດປະຈຳດ່ານ ກວດພົບເຫັນຜູ້ລະເມີດ ຝ່າຝືນນຳເຂົ້າ ຫຼື ລັກລອບນຳເຂົ້າຜະລິດຕະພັນໝູທຸກຊະນິດຈາກ ສປ ຈີນ, ເຈົ້າໜ້າທີ່ຈະປະຕິບັດມາດຕະການຕາມກົດໝາຍ ແລະ ລະບຽບການຢ່າງເຂັ້ມງວດ.

 

 

 

 

 

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ເສດຖະກິດ-ການຄ້າ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.