ຫ້ອງການກະສິກຳ ແລະ ປ່າໄມ່ເມືອງໝື່ນ ຈັດຝຶກອົບຮົມໃຫ້ສັດຕະວະແພດບ້ານ

0
18

ຕອນເຊົ້າວັນທີ 8 ຕຸລາຜ່ານມາທີ່ຫ້ອງການກະສິກຳ ແລະ ປ່າໄມ່ເມືອງໝື່ນ ໄດ້ຈັດພິທີຝຶກອົບຮົມວຽກງານການປິ່ນປົວສັດໃຫ້ສັດ ຕະວະແພດບ້ານ ໂດຍການເປັນປະທານຂອງ ທ່ານ ຄຳໄຜ່ ສີວັນນາລົມ ຮອງເລຂາໜ່ວຍພັກ ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງໝື່ນ ແຂວງວຽງຈັນ ມີຄູຝຶກຈາກໜ່ວຍງານລ້ຽງສັດ ແລະ ນັກສຳມະນາກອນທີ່ເປັນສັດຕະວະເເພດປະຈຳບ້ານ ຈາກກຸ່ມບ້ານນໍ້າເພີນ ແລະ ກຸ່ມບ້ານໂນນໄຮເຂົ້າຮ່ວມ.

ໃນພິທີ ທ່ານ ຄຳໄຜ່ ໄດ້ກ່າວວ່າ ການຝຶກອົບຮົມວຽກງານດັ່ງກ່າວນີ້ມີຄວາມໝາຍຄວາມສຳຄັນຫຼາຍທີ່ທຸກຄົນຕ້ອງໄດ້ເອົາໃຈໃສ່ ໂດຍສະເພາະແມ່ນຜູ້ທີ່ລ້ຽງສັດ ເພາະໃນປະຈຸບັນພັກ ແລະ ລັດຖະບານໄດ້ຫັນເອົາວຽກງານປູກຝັ່ງ-ລ້ຽງສັດເປັນອາຊີບໃຫ້ແກ່ປະຊາ ຊົນ ດັ່ງນັ້ນ ຖ້າຫາກຈະລ້ຽງສັດຈຳນວນຫຼາຍເພື່ອເປັນສິນຄ້າກໍຈຳເປັນຕ້ອງໄດ້ຮຽນຮູ້ ແລະ ເຂົ້າໃຈກ່ຽວກັບຂັ້ນຕອນໃນການລ້ຽງໂດຍສະເພາະການໃຫ້ອາຫານສັດ ການຮຽນຮູ້ກ່ຽວກັບພະຍາດຂອງສັດທີ່ລະບາດຕາມລະດູການ ແລະ ການສັກຢາວັກແຊັງປ້ອງກັນພະຍາດ ຈຶ່ງຈະສາມາດປ້ອງກັນ ແລະ ປິ່ນປົວສັດຂອງຕົນເອງລວມເຖິງສັດລ້ຽງຂອງປະຊາຊົນພາຍໃນບ້ານໄດ້ ພາຍຫຼັງຝຶກອົບຮົມໃນຄັ້ງນີ້ສຳເລັດບັນດາທ່ານຈະໄດ້ຮັບຄວາມຮູ້ໃນການລ້ຽງ ການສັກຢາປ້ອງກັນຢ່າງລະອຽດເພື່ອໃຫ້ບັນດາທ່ານນຳໄປຈັດຕັ້ງປະຕິ ບັດຢູ່ໃນຄອບຄົວ ແລະ ຊ່ວຍເຫຼືອປິ່ນປົວສັດລ້ຽງຂອງປະຊາຊົນພາຍໃນບ້ານໃຫ້ໄດ້ຮັບຜົນດີ.

ສຳລັບເອກະສານທີ່ຄູຝຶກນຳມາເຜີຍແຜ່ໃນຄັ້ງນີ້ປະກອບມີ ພະຍາດຂອງໝູ ພະຍາດຂອງສັດລ້ຽງຄ້ຽວເອື້ອງ (ງົວ-ຄວາຍ) ພະ ຍາດວໍ້ ພະຍາດຂອງສັດປີກ ແລະ ວິທີໃຫ້ວັກແຊັງປ້ອງກັນພະຍາດ ຊຶ່ງຄູຝຶກໍໄດ້ຜັດປ່ຽນກັນຂຶ້ນເຜີຍແຜ່ເອກະສານ ພ້ອມທັງມີ ການສົນທະນາປະກອບຄຳຄິດຄຳເຫັນຈາກສັດຕະວະແພດບ້ານ ໂດຍຍົກເອົາບັນຫາທີ່ເຄີຍພົບຢູ່ຂັ້ນບ້ານຂຶ້ນມາປະກອບເປັນບົດສົນທະນາ ແລະ ຮ່ວມຫາລືເພື່ອຊອກຫາວິທີແກ້ໄຂຢ່າງຖືກຕ້ອງ ແລະ ທັນການ.

ໂດຍ: ແຫວນຄຳ (ນັກຂ່າວຈາກເມືອງໝື່ນ ແຂວງວຽງຈັນ)

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.