ຫຼາຍປະເທດທົ່ວໂລກ ລວມທັງ 5 ຊາດອາຊຽນ, ສະເໜີຊື່ເປັນເຈົ້າພາບຈັດບານໂລກ 2034

0
2326

ການປະຊຸມລັດຖະມົນຕີກີລາອາຊຽນທີ່ປະເທດຟິລິບປິນ ຄັ້ງທີ 5 ຊຶ່ງຈັດຂຶ້ນທີ່ໂຮງແຮມໂຊຟີເທລເມື່ອວັນທີ 9 ຕຸລາ 2019 ທີ່ຜ່ານມາ, ໃນທີ່ປະຊຸມໄດ້ມີມະຕິຕົກລົງໃຫ້ 5 ປະເທດອາຊຽນຮ່ວມກັນສະເໜີຊື່ເປັນເຈົ້າພາບຈັດການແຂ່ງຂັນບານໂລກ 2034 ໂດຍມອບໃຫ້ໄທຫົວໜ້າທີມຮ່ວມກັບມາເລເຊຍ, ສິງກະໂປ, ຫວຽດນາມ ແລະ ອິນໂດເນເຊຍ ຊຶ່ງທັງ 5 ປະເທດຈະຮ່ວມກັນເຮັດຂໍ້ມູນທາງເຕັກນິກປະກອບເຂົ້າໃນການສະເໜີຕໍ່ຟີຟ່າ.

ທ່ານ ຈານນີ ອິນຟານຕິໂນ, ປະທານສະຫະພັນບານນານາຊາດ (ຟີຟ່າ) ເດີນທາງມາປະເທດໄທເມື່ອວັນທີ 2 ພະຈິກ 2019 ເພື່ອລົງນາມຄວາມຮ່ວມມືກັບຊາດອາຊຽນທັງ 10 ປະເທດໃນການສົ່ງເສີມກີລາບານເຕະໃນອາຊຽນ ແລະ ໄດ້ນຳເອົາໜ່ວຍໝາກບານຊຶ່ງເປັນສັນຍະລັກໃນການພັດທະນາເຍົາວະຊົນໃນໂຮງຮຽນເພື່ອຍົກລະດັບສັງຄົມ ແລະ ສະໜັບສະໜູນແນວຄວາມຄິດການຮ່ວມມືເປັນເຈົ້າພາບຈັດບານໂລກ 2034 ຂອງຊາດອາຊຽນ.

ຮອງເລທິການຝ່າຍຕ່າງປະເທດ ແລະ ໂຄສົກສະມາຄົມກີລາບານເຕະແຫ່ງປະເທດໄທໄດ້ເປີດເຜີຍວ່າ: ທ່ານ ຈານນີ ອິນຟານຕິໂຕ ມີຄວາມຄິດໃນການສະໜັບສະໜູນຊາດອາຊຽນທີ່ຈະສະເໜີຊື່ເປັນເຈົ້າພາບບານໂລກ 2034 ເນື່ອງຈາກວ່າ ທ່ານ ອິນຟານຕິໂນ ເຊື່ອວ່າວັນໜຶ່ງກຸ່ມອາຊຽນຈະກາຍເປັນປະເທດທີ່ເຂັ້ມແຂງ ແລະ ຍັງສອດຄ່ອງກັບສາເຫດທີ່ບານໂລກເພີ່ມຈຳນວນທີມໃນຮອບສຸດທ້າຍເປັນ 48 ທີມ, ເນື່ອງຈາກຟີຟ່າຕ້ອງການໃຫ້ຊາດເຈົ້າພາບເກີດຄວາມຮ່ວມມືກັນໃນການຈັດການແຂ່ງຂັນ, ບໍ່ແມ່ນມີພຽງປະເທດດຽວທີ່ຕ້ອງຮັບພາລະຄືກ່ອນໜ້ານີ້. ນອກຈາກນັ້ນ,​ ຍັງຕ້ອງການໃຫ້ທຸກຊາດທົ່ວໂລກໄດ້ມີການຕື່ນຕົວມີສ່ວນຮ່ວມ ແລະ ສຳພັດກັບບັນຍາກາດຂອງບານໂລກໃຫ້ຫຼາຍທີ່ສຸດ ແຕ່ທັງໝົດມັນກໍຂຶ້ນຢູ່ກັບຕົວເຮົາ ແລະ ປະເທດອາຊຽນແນວຮ່ວມວ່າມີຄວາມພ້ອມພຽງພໍໃນການຈັດບານໂລກ ຫຼື ບໍ່?

ປະເທດທີ່ສະເໜີຊື່ເປັນເຈົ້າພາບຈັດບານໂລກ 2034 ປັດຈຸບັນປະກອບມີ: 5 ຊາດອາຊຽນ,​ ຈີນ, ອີຢິບ, ຊິມບັບເວ, ໄນຈີເຣຍ, ແລະ ອອັດສະເຕເລຍ ຮ່ວມກັບ ນິວຊີແລນສະເໜີຊື່ເປັນເຈົ້າພາບຈັດຮ່ວມກັນ.

ຮຽບຮຽງຂ່າວ: ພຸດສະດີ ລາວລີ
ແຫຼ່ງຂໍ້ມູນ: www.khaosod.co.th, www.thairath.co.th

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.