ສຳເລັດສົມບູນແລ້ວ… ຂົວຂ້າມພົມແດນ “ຈີນ-ຣັດເຊຍ”

0
3243

ສຳນັກຂ່າວຕ່າງປະເທດລາຍງານເມື່ອວັນທີ 1 ທັນວາຜ່ານມວ່າ: ຂົວຂ້າມພົມແດນລະຫວ່າງ “ຈີນ-ຣັດເຊຍ” ສາຍທຳອິດກໍ່ສ້າງສຳເລັດ 100% ແລ້ວ, ຂົວດັ່ງກ່າວເຊື່ອມຕໍ່ຈາກເມືອງບລາໂກເວເຊນ ແຄວ້ນອາມູຣ ທາງຕາເວັນອອກໄກຂອງຣັດເຊຍກັບນະ ຄອນລະດັບແຂວງເຫີ່ຍເຫີ ມົນທົນເຮີຍຫຼົງຈຽງ ທາງຕາເວັນອອກສຽງເໜືອຂອງ ສປ ຈີນ, ຫຼັງຈາກທີ່ໃຊ້ເວລາກຽມການກໍ່ສ້າງດົນກວ່າ 20 ປີດ້ວຍງົບປະມານຈຳນວນມະຫາສານ.

ຂົວຂ້າມພົມແດນສາຍນີ້ມີຄວາມຍາວ 1.080 ແມັດ, ຜ່ານແມ່ນໍ້າອາມູຣ ຊຶ່ງແຕ່ລະຝ່າຍແມ່ນກໍ່ສ້າງ 540 ແມັດ, ຊຶ່ງເຊື່ອມຕໍ່ກັນເມື່ອເດືອນພຶດສະພາ 2018 ແລະ ກໍ່ສ້າງຫົນທາງໃໝ່ທີ່ເຊື່ອມຕໍ່ກັບຂົວແຫ່ງນີ້ເປັນໄລຍະທາງ 20 ກີໂລແມັດ ແລະ ຈະເປີດໃຊ້ງານໃນລະດູໃບໄມ້ປົ່ງຂອງປີ 2020, ທັງນີ້ ກໍເພື່ອເພີ່ມປະລິມານການຂົນສົ່ງສິນຄ້າລະຫວ່າງສອງປະເທດ.

ສ່ວນລັດຖະມົນຕີກະຊວງພັດທະນາຕາເວັນອອກໄກ ແລະ ອາກຕິກ ກ່າວວ່າ: ຫຼັງຈາກເປີດໃຊ້ງານຂົວແລ້ວການຂົນສົ່ງສິນຄ້າລະຫວ່າງພູມີພາກຂອງຣັດເຊຍກັບຈີນຈະເພີ່ມຂຶ້ນເຖິງ 8 ເທົ່າ ຫຼື ຈາກ 500.000 ໂຕນຕໍ່ປີມາເປັນ 4.000.000 ໂຕນຕໍ່ປີ, ນອກຈາກນີ້ ຈຳນວນນັກທ່ອງທ່ຽວຈາກຈີນກໍຈະເພີ່ມຂຶ້ນເຖິງ 2 ລ້ານຄົນ. ສ່ວນການຂົນສົ່ງຜູ້ໂດຍສານແມ່ນຕ້ອງລໍຖ້າອີກປະ ມານ 18 ເດືອນຂ້າງໜ້າ, ເນື່ອງຈາກຍັງບໍ່ໄດ້ກໍ່ສ້າງດ່ານກວດແບບຖາວອນ, ປັດຈຸບັນ ນັກທ່ອງທ່ຽວຈີນຍັງບໍ່ສາມາດຂ້າມໄປອີກຝັ່ງຜ່ານຂົວແຫ່ງນີ້ໄດ້ເທື່ອ.

ທັງນີ້ ຂົວຂ້າມພົມແດນ ຈີນ-ຣັດເຊຍ ໃຊ້ເວລາກຽມການກໍ່ສ້າງກວ່າ 20 ປີ ແລະ ເມື່ອປີ 2014 ປະທານາທິບໍດີ ວະລາດີເມຍ ປູຕິນ ຜູ້ນຳຣັດເຊຍກໍໄດ້ຢ້ຽມຢາມສາທາລະນະລັດ ປະຊາຊົນຈີນຢ່າງເປັນທາງການ ແລະ ລົງນາມຂໍ້ຕົກລົງກັບລັດຖະບານຈີນວ່າດ້ວຍການກໍ່ສ້າງຂົວຂ້າມແມ່ນໍ້າອາມູຣ ຫຼື ເຮີຍຫຼົງຈຽງ (ເປັນພາສາຈີນ), ຕໍ່ມາເມື່ອເດືອນມີນາ 2015 ບໍລິສັດກໍ່ສ້າງຣັດເຊຍ-ຈີນກໍໄດ້ຮ່ວມລົງນາມສັນຍາວ່າດ້ວຍການກໍ່ສ້າງຂົວທີ່ເມືອງຮາຣບິນ ແລ ເລີ່ມກໍ່ສ້າງມາຕັ້ງແຕ່ເດືອນທັນວາຂອງປີດຽວກັນ, ງົບປະມານຢູ່ທີ່ 18.800 ລ້ານຣູເບິລ (ສະກຸນເງິນຣັດເຊຍ).

 

 

ຮຽບຮຽງ: ເພັງສະຫວັນ 

ຮູບພາບ: khaosod

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.