ສຳເລັດກອງປະຊຸມປຶກສາຫາລືກ່ຽວກັບສິ່ງທ້າທາຍ ແລະ ໂອກາດຂອງກອງທຶນໂລກຮອບໃໝ່

0
166

ພາຍຫຼັງຜົນສຳເລັດຂອງກອງປະຊຸມລະດົມທຶນເຂົ້າກອງທຶນໂລກທີ່ຈັດຂຶ້ນຢູ່ລີຢົງ (ປະເທດຝຣັ່ງ), ສະຖານທູດຝຣັ່ງປະຈຳ ສປປ ລາວ ກໍໄດ້ເຊີນບັນດາອົງການຈັດຕັ້ງໃນພາກພື້ນມາປະຊຸມເພື່ອແລກປ່ຽນກ່ຽວກັບກາລະໂອກາດໃນການຕ້ານ HIV/Aids, ວັນ ນະໂລກ ແລະ ມາລາເຣຍໃນພາກພື້ນແມ່ນໍ້າຂອງ.   

ເມື່ອວັນທີ 6 ທັນວາຜ່ານມາ, ບັນດາຜູ້ຕາງໜ້າຈາກອົງການຈັດຕັ້ງຈາກ ສປປ ລາວ, ກຳປູເຈຍ, ສສ ຫວຽດນາມ, ມຽນມາ ແລະ ໄທ ໄດ້ຮ່ວມປະຊຸມເພື່ອປຶກສາຫາລື ແລະ ແລກປ່ຽນກ່ຽວກັບສິ່ງທ້າທາຍ ແລະ ໂອກາດຂອງກອງທຶນໂລກຮອບວຽນໃໝ່ ເພື່ອຕ້ານ HIV/Aids, ວັນນະໂລກ ແລະ ມາລາເຣຍໃນພາກພື້ນແມ່ນໍ້າຂອງ.

ກອງປະຊຸມລະດັບພາກພື້ນມີ 4 ກອງປະຊຸມຍ່ອຍທີ່ສຸມໃສ່ສົນທະນາແລກປ່ຽນກ່ຽວກັບວິທີການໃໝ່ໆທີ່ສ້າງສັນທີ່ໄດ້ຮັບການຈັດ ຕັ້ງປະຕິບັດເພື່ອເຮັດໃຫ້ກອງທຶນໂລກມີຄວາມຍືນຍົງ. ນອກຈາກນີ້ ກອງປະຊຸມຍັງໄດ້ສົນທະນາກ່ຽວກັບການຊ່ວຍເຫຼືອດ້ານເຕັກ ນິກ ແລະ ໂອກາດດ້ານວີຊາການສຳລັບບັນດາປະເທດທີ່ໄດ້ຮັບຜົນປະໂຫຍດ. ໃນໂອກາດດັ່ງກ່າວ ຍັງໄດ້ມີການນຳສະເໜີໂຄງການຕ່າງໆໃນພາກພື້ນທີ່ໄດ້ຮັບທຶນຊ່ວຍເຫຼືອຈາກກອງທຶນໂລກ Initiative 5% ພ້ອມກັບວິໄສທັດລວມກ່ຽວກັບທ່າອຽງການລະ ບາດຂອງສາມພະຍາດລະບາດທີ່ກ່າວມາຂ້າງເທິງນັ້ນໃນພາກພື້ນ.

ທັງນີ້, ເມື່ອເດືອນຕຸລາທີ່ຜ່ານມາປະເທດຝຣັ່ງໄດ້ປະສົບຜົນສຳເລັດໃນການຈັດກອງປະຊຸມລະດົມທຶນເຂົ້າກອງທຶນໂລກເພື່ອຕ້ານ HIV/Aids, ວັນນະໂລກ ແລະ ມາລາເຣຍຄັ້ງທີ 6, ກອງປະຊຸມສາມາດລະດົມທຶນໄດ້ 14 ຕື້ໂດລາຕາມເປົ້າໝາຍທີ່ວາງໄວ້ ເພື່ອຊ່ວຍຊີວິດຄົນຈຳນວນ 16 ລ້ານຄົນ ແລະ ນັບຈາກນີ້ສິ່ງທ້າທາຍກໍຄື: ຕ້ອງຮັບປະກັນໃຫ້ກອງທຶນດັ່ງກ່າວສາມາດປະກອບສ່ວນໃນການລຶບລ້າງສາມພະຍາດລະບາດດັ່ງກ່າວໃຫ້ໝົດໄປກ່ອນປີ 2030 ຕາມເປົ້າໝາຍການພັດທະນາແບບຍືນຍົງ.

ປະເທດຝຣັ່ງເປັນຜູ້ສະໜັບສະໜູນກອງທຶນໂລກລາຍໃຫຍ່ອັນດັບທີສອງ ແລະ ໄດ້ໃຫ້ຄຳໝັ້ນສັນຍາວ່າຈະເພີ່ມການຊ່ວຍເຫຼືອດ້ານທຶນຮອນຕື່ມອີກ 20% ໃນກອງທຶນຮອບວຽນຕໍ່ໄປ. ນອກຈາກນີ້ ປະເທດຝຣັ່ງຍັງເປັນຜູ້ລິເລີ່ມຈັດຕັ້ງກອງທຶນ “Initiative 5%” ໃນປີ 2012 ຊຶ່ງເປັນການປະກອບສ່ວນໂດຍກົງເຂົ້າໃນກອງທຶນໂລກ ເພື່ອສະໜອງການຊ່ວຍເຫຼືອດ້ານເຕັກນິກ ແລະ ສະ ໜັບສະໜູນດ້ານທຶນຮອນແກ່ບັນດາໂຄງການຕ່າງໆ.

ນັບແຕ່ປີ 2012 ຈົນເຖິງປັດຈຸບັນ ສປປ ລາວ ໄດ້ຮັບທຶນຊ່ວຍເຫຼືອມູນຄ່າ 5 ລ້ານເອີໂຣ ຜ່ານກອງທຶນ Initiative 5% ທີ່ສຸມໃສ່ການຄົ້ນຄວ້າ ແລະ ເສີ່ມສ້າງຄວາມສາມາດໃຫ້ແກ່ບັນດາອົງການຈັດຕັ້ງທາງສັງຄົມຂອງລາວ. ໃນປີ 2020 ມີ 2 ໂຄງ ການໃໝ່ໃນ ສປປ ລາວ ຈະໄດ້ຮັບທຶນຊ່ວຍເຫຼືອຈາກກອງທຶນ Initiative 5%, ໂຄງການໜຶ່ງແມ່ນຈັດຕັ້ງປະຕິບັດໂດຍອົງ ການມະນຸດສະທຳ ແລະ ການມີສ່ວນຮ່ວມ (Humanity & Inclusion) ແລະ ອີກໂຄງການໜຶ່ງແມ່ນຈັດຕັ້ງປະຕິບັດໂດຍສະມາຄົມເພື່ອສຸຂະພາບ (LaoPha).

 

 

ພາບ ແລະ ຂໍ້ມູນຈາກ: ສະຖານທູດຝຣັ່ງປະຈຳ ສປປ ລາວ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.