ສາວອິນເດຍຄິດວ່າຕົນເອງເປັນຊີ້ນປົ່ງໃນທ້ອງ… ແຕ່ກາຍເປັນຝາແຝດຂອງຕົນເອງ

0
6713

ສຳນັກຂ່າວຕ່າງປະເທດລາຍງານເມື່ອບໍ່ດົນມານີ້ໂດຍອ້າງການເປີດເຜີຍທາງວາລະສານການແພດ British Medical Journal ກໍລະນີຂອງຄົນເຈັບເພດຍິງອາຍຸ 17 ປີຊາວອິນເດຍ ຊຶ່ງນາງຮູ້ສຶກວ່າມີກ້ອນຊີ້ນປະຫຼາດກຳລັງຂະຫຍາຍຕົວຢູ່ໃນທ້ອງຂອງ ນາງເປັນເວລາຫຼາຍປີ ໂດຍກ້ອນຊີ້ນເຮັດໃຫ້ນາງຮູ້ສຶກເຈັບປວດ ແລະ ຮູ້ສຶກອີ່ມຄືກັບກິນອາຫານຫຼາຍເກີນໄປ ສຸດທ້າຍນາງຈຶ່ງຕັດສິນໃຈໄປພົບແພດເພື່ອກວດຫາສາເຫດ ຊຶ່ງຜົນປາກົດວ່າກ້ອນຊີ້ນດັ່ງກ່າວບໍ່ກ່ຽວຂ້ອງກັບພະຍາດໃນຊ່ອງທ້ອງໃດໆເລີຍ.

ຈາກການກວດສອບເບື້ອງຕົ້ນພົບວ່າ ກ້ອນດັ່ງກ່າວໜ້າຈະເປັນຊີ້ນປົ່ງ ແຕ່ເມື່ອທີມແພດພິຈາລະນາຢ່າງລະອຽດກໍພົບວ່າມັນມີຂະໜາດໃຫຍ່ ແລະ ມີຮູບຮ່າງແປກໆ ນອກຈາກນີ້ ຈາກການເຮັດຊີທີສະແກນໄດ້ເຜີຍໃຫ້ເຫັນວ່າ ສິ່ງທີ່ຢູ່ໃນທ້ອງຂອງນາງມີລັກ ສະນະຄ້າຍຄືກັບກະດູກ ໄຂມັນ ແລະ ເນື້ອເຫຍື່ອ ຈາກນັ້ນແພດໄດ້ຊ່ວຍເຮັດການຜ່າຕັດກ້ອນດັ່ງກ່າວອອກມາຊຶ່ງພົບວ່າ ມີເສັ້ນຜົມ ແຂ້ວ ແລະ ກິ່ງກ້ານແຂນ-ຂາ ໂຄງສ້າງໃນການພັດທະນາຕົວອ່ອນຂອງມະນຸດ ຊຶ່ງເກີດຈາກຝາແຝດທີ່ສ້າງຕົວແບບຜິດ ປົກກະຕິແລ້ວຖືກດູດໄປລວມກັບຮ່າງກາຍຂອງນາງໃນຄັ້ງທີ່ຍັງເປັນຕົວອ່ອນນັ້ນເອງ.

ປາກົດການດັ່ງກ່າວເອີ້ນວ່າ ພາວະເດັກອ່ອນໃນຮ່າງເດັກອ່ອນ (fetus in fetu)  ຫຼື ແຝດປໍຣະສິດ (ແຝດກາຝາກ) ຊຶ່ງເກີດຈາກພາວະການຈະເລີນເຕີບໂຕທີ່ຜິດປົກກະຕິໃນຄັນມາດາ ເມື່ອຝາແຝດອີກຄົນຢຸດພດທະນາການຈະຖືກຄູ່ແຝດອີກຄົນດູດກືນເຂົ້າໄປໃນຮ່າງກາຍ ແລະ ຈະເລີນເຕີບໂຕຢູ່ໃນຊ່ອງທ້ອງ ກໍລະນີດັ່ງກ່າວມີໂອກາດເກີດຂຶ້ນພຽງ 1 ໃນ 500.000 ຄົນເທົ່ານັ້ນ ສ່ວນໃຫຍ່ພົບໃນເພດຊາຍ ແລະ ຈະຮູ້ໄດ້ເມື່ອຕອນຍັງເປັນເດັກນ້ອຍ.

ສຳລັບກໍລະນີຂອງຍິງສາວລາຍນີ້ເທົ່າກັບວ່ານາງມີຝາແຝດຜິດປົກກະຕິຢູ່ໃນທ້ອງຂອງນາງມາຕະຫຼອດ 17 ປີໂດຍທີ່ນາງບໍ່ຮູ້ຕົວ ທັງນີ້ ທີມແພດຈາກສະຖາບັນທາງການແພດທົ່ວອິນເດຍເຊື່ອວ່າກໍລະນີຂອງຍິງສາວນ້ອຍຄົນນີ້ເປັນກໍລະນີທີ່ມີອາຍຸຫຼາຍທີ່ສຸດທີ່ພົບວ່າມີຝາແຝດກາຝາກ ຊຶ່ງພາຍຫຼັງທີ່ນາງໄດ້ຮັບການຜ່າຕັດເມື່ອ 2 ປີກ່ອນໜ້າທ້ອງຂອງນາງກໍຍຸບລົງ ຮ່າງກາຍກໍກັບມາເປັນປົກກະຕິ ແລະ ສາມາດໃຊ້ຊີວິດໄດ້ຄືກັບຄົນທົ່ວໄປ.

 

 

 

 

 

ຮຽບຮຽງ: ພ.ສະຫວັນ

ຮູບພາບ: kapook

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.