ສາວຊາວຈີນ… ຍອມອົດອາຫານເພື່ອໃຫ້ນ້ອງໄດ້ສະບາຍ!!

0
1353

ເປັນອີກໜຶ່ງເລື່ອງລາວທີ່ໜ້າເສົ້າເມື່ອນັກສຶກສາຍິງຊາວຈີນທີ່ມີຊື່ວ່າ: ອູ່ ຮົ່ວຫຍຽນ ຊຶ່ງມີຖານະທຸກຍາກ, ຕ້ອງຍອມອົດອາຫານເພື່ອເກັບເງິນລ້ຽງນ້ອງຊາຍທີ່ປ່ວຍທາງຈິດ. ຫຼ້າສຸດ ມີຂ່າວວ່ານາງໄດ້ເສຍຊີວິດແລ້ວ.

ສຳນັກຂ່າວຕ່າງປະເທດລາຍງານໃນວັນທີ 15 ມັງກອນ 2020 ວ່າ: ນາງ ອູ່ ຮົ່ວຫຍຽນ ນັກສຶກສາອາຍຸ 24 ປີ, ຊຶ່ງນາງມີອາ ການຂາດສານອາຫານຢ່າງໜັກເນື່ອງຈາກວ່າສະພາບຄອບຄົວຂອງນາງທຸກຍາກ, ນາງ ຮົ່ວຫຍຽນ ເປັນນັກສຶກສາປີທີ 3 ຂອງມະຫາວິທະຍາ ໄລກຸ້ຍໂຈ ຟໍຣັນເນີ, ນາງມີຄວາມສູງພຽງແຕ່ 135 ຊັງຕີແມັດ, ນໍ້າໜັກ 21,6 ກີໂລກຣາມ ແລະ ກາຍເປັນຂ່າວໂດ່ງດັງເມື່ອບໍ່ເທົ່າໃດເດືອນຜ່ານມາເມື່ອສື່ທ້ອງຖິ່ນໄດ້ຕີແຜ່ຂ່າວຄາວເລື່ອງລາວຊີວິດ ແລະ ຄວາມທຸກຍາກລຳບາກຂອງນາງ.

ສ່ວນພໍ່ແມ່ຂອງ ນາງ ຮົ່ວຫຍຽນ ແມ່ນເສຍຊີວິດໄປແລ້ວ, ນາງຕ້ອງຫາລ້ຽງນ້ອງຊາຍທີ່ມີອາການປ່ວຍທາງຈິດດ້ວຍເງິນປະກັນສັງຄົນຊຶ່ງໄດ້ຮັບເດືອນລະ 300 ຢວນ, ຊຶ່ງນາງຕ້ອງ ໃຊ້ຈ່າຍຢ່າງປະຢັດນັບແຕ່ເຂົ້າຮຽນຊັ້ນມັດທະຍົມເພື່ອເກັບເງິນໄວ້ໃຊ້ໃນຍາມຈຳເປັນ ແລະ ດູແລນ້ອງຊາຍ. ນາງ ອູ່ ມັກອົດອາຫານເຊົ້າ ແລະ ຄາບອື່ນໆນາງກໍຈະກິນພຽງແຕ່ເຂົ້າລາດໜ້າໝາກເຜັດເທົ່ານັ້ນ.

ນາງ ອູ່ ຖືກສົ່ງໂຕເຂົ້າໂຮງໝໍໃນເດືອນຕຸລາ 2019 ຫຼັງຈາກຂາທັງສອງເບື້ອງມີອາການບວມ, ນອກຈາກນີ້ ແພດຍັງກວດພົບວ່າ: ລິ້ນຫົວໃຈຂອງນາງເສຍຫາຍຢ່າງຮຸນແຮງຊຶ່ງຕ້ອງປິ່ນປົວດ້ວຍການຜ່າຕັດ ແລະ ມີຄ່າໃຊ້ຈ່າຍທີ່ສູງເຖິງ 200.000 ຢວນ,​ ເຖິງແມ່ນວ່າຈະມີຄວາມພະຍາຍາມລະດົມທຶນຊ່ວຍເຫຼືອຈາກສັງຄົມ ແຕ່ສຸຂະພາບຂອງນາງກໍຊຸດໂຊມລົງເລື້ອຍໆ ແລະ ໃນທີ່ສຸດນາງກໍທົນກັບຄວາມເຈັບປວດບໍ່ໄຫວ ແລະ ນາງກໍເສຍຊີວິດເມື່ອຕົ້ນອາທິດທີ່ຜ່ານມາ.

ການເສຍຊີວິດຂອງ ນາງ ອູ່ ຮົ່ວຫຍຽນ ເຮັດໃຫ້ເກີດກະແສຄວາມບໍ່ພໍໃຈໃນກຸ່ມຜູ້ໃຊ້ອິນເຕີເນັດຊາວຈີນ, ຊຶ່ງຫຼາຍຄົນຕັ້ງຄຳຖາມວ່າ: ປະເທດນີ້ບໍ່ສາມາດເຮັດຫຍັງໄດ້ຫຼາຍໄປກວ່ານີ້ເພື່ອຊ່ວຍເຫຼືອນາງ ອູ່… “ເປັນເລື່ອງຍາກທີ່ຈະຈິນຕະນາການວ່າຍັງມີບາງຄົນທີ່ບໍ່ສາມາດເຂົ້າເຖິງອາຫານຢ່າງເໝາະສົມທັງທີ່ຍຸກນີ້ຄືຍຸກ 2020 ແລ້ວ”.

 

 

ຮຽບຮຽງ: ເພັງສະຫວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.