ສະເຫຼີມສະຫຼອງວັນສື່ມວນຊົນແຫ່ງຊາດ ແລະ ການພິມຈຳໜ່າຍ ຄົບຮອບ 69 ປີ

0
29

ໃນວັນທີ 13 ສິງຫາ 2019 ທີ່ຫໍວັດທະນະທຳແຫ່ງຊາດ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວໄດ້ຈັດພິທີໂຮມຊຸມນຸມສະເຫຼີມສະຫຼອງວັນສື່ມວນຊົນແຫ່ງຊາດ ແລະ ການພິມຈຳໜ່າຍ ຄົບຮອບ 69 ປີ (13 ສິງຫາ 1950-13 ສິງຫາ 2019) ໃຫ້ກຽດເຂົ້າຮ່ວມພິທີດັ່ງກ່າວໂດຍ ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ພ້ອມດ້ວຍບັນດາຮອງລັດຖະມົນຕີ ຄະນະພັກ ຄະນະນຳກະຊວງ ຖວທ ຕະຫຼອດຮອດພະນັກງານ ນັກຂ່າວ ນັກຂຽນ ນັກວິຊາການເພື່ອນຮ່ວມງານດ້ານສື່ມວນຊົນ ແລະ ການພິມຈຳໜ່າຍ.

ໂອກາດນີ້ ທ່ານ ບໍ່ແສງຄຳ ໄດ້ກ່າວວ່າ ມື້ນີ້ແມ່ນວັນທີ 13 ສິງຫາເປັນວັນທີ່ມີຄວາມໝາຍສຳຄັນຍິ່ງສຳລັບນັກຮົບໃນຂະແໜງຖະ ແຫຼງຂ່າວ ສື່ມວນຊົນ ແລະ ການພິມຈຳໜ່າຍ ເນື່ອງຈາກວັນທີ 13 ສິງຫາ 1950 ເປັນວັນທີ່ພັກເຮົາໄດ້ຕົກລົງສ້າງຕັ້ງອົງການແນວລາວອິດສະຫຼະ ໜັງສືພິມລາວອິດສະຫຼະ ແລະ ໂຮງພິມລາວອິດສະຫຼະຂຶ້ນເພື່ອໂຄສະນາເຜີຍແຜ່ແນວທາງນະໂຍບາຍທີ່ຖືກ ຕ້ອງສະຫຼາດສ່ອງໃສຂອງພັກໃຫ້ລົງເຖິງປະຊາຊົນລາວບັນດາເຜົ່າ ປຸກລະດົມຂົນຂວາຍໃຫ້ມີນ້ຳໃຈຮັກຊາດ ຄຽດແຄ້ນສັດຕູ ແລະເຂົ້າຮ່ວມຂະບວນການປົດປ່ອຍປະເທດຊາດ.

ໃນໜຶ່ງປີຜ່ານມາ ກະຊວງ ຖວທ ໄດ້ເຮັດໜ້າທີ່ເປັນເສນາທິການໃຫ້ແກ່ພັກ ແລະ ລັດໄດ້ເປັນຢ່າງດີ ແລະ ມີຜົນງານອັນພົ້ນເດັ່ນຫຼາຍດ້ານ ເວົ້າສະເພາະແມ່ນວຽກງານສື່ມວນຊົນ ແລະ ການພິມຈຳໜ່າຍ ເຫັນວ່າມີການພັດທະນາດີຂຶ້ນຫຼາຍ ທັງປະລິມານ ແລະ ຄຸນນະພາບ ຊຶ່ງນັກຮົບສື່ມວນຊົນ ແລະ ພິມຈຳໜ່າຍໄດ້ເອົາໃຈໃສ່ປັບປຸງພື້ນຖານໂຄງລ່າງ ອຸປະກອນເຕັກນິກໃຫ້ທັນສະໄໝຂຶ້ນສາມາດພິມໄດ້ໃນຫຼາຍຮູບແບບ ຫຼາຍສີສັນ ເບິ່ງໄດ້ຈາກຫຼາຍຊ່ອງທາງໂດຍສະເພາະແມ່ນຜ່ານສື່ແບບໃໝ່ ສາມາດເບິ່ງຜ່ານມືຖືໄດ້ຢ່າງວ່ອງໄວທັນການ ຂໍ້ມູນ-ຂ່າວສານໄປຮອດໄປເຖິງປະຊາຊົນໄດ້ງ່າຍ ແລະ ກວ້າງຂວາງ ສ່ວນດ້ານເນື້ອໃນກໍເຫັນວ່າມີການປັບປຸງດີຂຶ້ນ ມີຫຼາຍສີສັນ ຫຼາຍຮູບແບບທີ່ດຶງດູດຜູ້ຟັງ ຜູ້ຊົມ ແລະ ຜູ້ອ່ານໄດ້ດີ ພ້ອມດຽວກັນນັ້ນ ຍັງໄດ້ນຳເອົາຄວາມມຸ່ງມາດປາຖະ ໜາຂອງປະຊາຊົນມາສະເໜີໃຫ້ການຈັດຕັ້ງພັກ-ລັດໄດ້ຮັບຮູ້ເພື່ອພ້ອມກັນພັດທະນາ ແລະ ຍັງໄດ້ເຮັດໜ້າທີ່ປົກປ້ອງປະເທດ ຊາດ ປົກປ້ອງແນວທາງນະໂຍບາຍຂອງພັກ-ລັດໃນການຕີຕ້ານປາກົດການຫຍໍ້ທໍ້ໃນສັງຄົມ ແລະ ຕອບຕ້ານການບິດເບື່ອນໃສ່ຮ້າຍປ້າຍສີຂອງກຸ່ມຄົນທີ່ບໍ່ດີທີ່ຫວັງມ້າງເພທຳລາຍປະເທດຊາດຂອງພວກເຮົາ ການປະກອບສ່ວນໃນການປົກປົກຮັກສາ ແລະ ພັດທະນາປະເທດຊາດ ສາມາດຢັ້ງຢືນໄດ້ວ່າ ສື່ມວນຊົນ ແລະ ການພິມຈຳໜ່າຍ ຍັງແມ່ນອາວຸດທີ່ແຫລມຄົມທີ່ມີຜົນງານໃຫຍ່ ຫຼວງ ແລະ ເປັນປະໂຫຍດທີ່ສຸດໃຫ້ແກ່ປະເທດຊາດ.

ຢ່າງໃດກໍດີ ບັນດາໜ້າວຽກທີ່ສຳຄັນ ແລະ ຈຳເປັນຮີບດ່ວນທີ່ຈະຕ້ອງໄດ້ສຸມໃສ່ຈັດຕັ້ງປະຕິບັດເພື່ອປະຕິບັດໜ້າທີ່ການເມືອງທີ່ຖືກມອບໝາຍ ທັງເປັນການເສີມຂະຫຍາຍຜົນງານ ແລະ ຈຳກັດຈຸດອ່ອນ ແລະ ຂໍ້ຄົງຄ້າງໃນຕໍ່ໜ້າ ທ່ານ ບໍ່ແສງຄຳ ວົງດາລາ ໄດ້ເນັ້ນໃຫ້ສື່ມວນຊົນ ແລະ ການພິມຈຳໜ່າຍສືບຕໍ່ເອົາໃຈໃສ່ວຽກງານແນວຄິດການເມືອງໃຫ້ດີ ແລະ ທົ່ວເຖິງພາຍໃນຖັນແຖວນັກ ຮົບສື່ມວນຊົນ ແລະ ພິມຈຳໜ່າຍ ເຮັດໃຫ້ທຸກຄົນສືບຕໍ່ຢຶດໝັ້ນທັດສະນະຫຼັກໝັ້ນການເມືອງທີ່ໜັກແໜ້ນ ເຊື່ອມຊຶມ ແລະ ເຊື່ອໝັ້ນຕໍ່ແນວທາງນະໂຍບາຍຂອງພັກ ມີຫຼັກໝັ້ນມິດ-ສັດຕູຈະແຈ້ງ ມີສະຕິລະວັງຕົວດີຕໍ່ທຸກກົນອຸບາຍຫັນປ່ຽນໂດຍສັນຕິ ຂອງອິດທິກຳລັງປໍລະປັກ ແລະ ມີຄວາມຮັບຜິດຊອບການເມືອງສູງຕໍ່ໜ້າທີ່ວຽກງານ ໃຫ້ເອົາໃຈໃສ່ຈັດຕັ້ງປະຕິບັດວິໄສທັດ 2030 ຍຸດທະສາດຮອດປີ 2025 ແລະ ແຜນພັດທະນາວຽກງານ ຖວທ ຂອງ ສປປ ລາວ 2016-2020 ໃຫ້ປາກົດຜົນເປັນຈິງ ດ້ວຍການຫັນແຜນຍຸດທະສາດດັ່ງກ່າວໃຫ້ເປັນແຜນການປະຈຳປີທີ່ແທດເໝາະກັບສະພາບຕົວຈິງ ໃຫ້ສືບຕໍ່ໂຄສະນາເຜີຍແຜ່ຜ່ານສື່ມວນຊົນ ແລະ ການພິມຈຳໜ່າຍກ່ຽວກັບຂະບວນການຕ່າງໆ ໂດຍສະເພາະການຮັບໃຊ້ໃຫ້ແກ່ການກະກຽມກອງປະຊຸມໃຫຍ່ຄັ້ງທີ XI ຂອງພັກ ປີທ່ອງທ່ຽວ ລາວ-ຈີນ 2019 ການກະກຽມງານກີລາແຫ່ງຊາດທີ່ແຂວງຊຽງຂວາງ ການສະເຫຼີມສະຫຼອງທົ່ງໄຫຫີນແຂວງຊຽງຂວາງເຂົ້າເປັນມໍລະດົກໂລກ ການໂຄສະນາເຫດການສຳຄັນຂອງພັກ ຂອງຊາດ ແລະ ສາກົນໃຫ້ດີ.

ພ້ອມດຽວກັນນັ້ນ ກໍໃຫ້ສືບຕໍ່ປັບປຸງກົດໝາຍ ແລະ ສ້າງນິຕິກຳລຸ່ມກົດໝາຍໃຫ້ພຽງພໍ ສອດຄ່ອງ ແລະ ຮັດກຸມ ພ້ອມທັງເອົາໃຈໃສ່ເຜີຍແຜ່ໃຫ້ກວ້າງຂວາງ ແລະ ຈັດຕັ້ງປະຕິບັດໃຫ້ຢ່າງກ້ວາຂວາງ ແລະ ເຂັ້ມງວດ ສືບຕໍ່ປັບປຸງວຽກງານຄຸ້ມຄອງສື່ມວນຊົນ ແລະ ການພິມຈຳາໜ່າຍໃຫ້ເຂັ້ມແຂງ ສ້າງເງື່ອນໄຂໃຫ້ສື່ມວນຊົນ ແລະ ການພິມຈຳາໜ່າຍ ສາມາດພັດທະນາຕາມທິດຄຸນນະ ພາບ ທັນສະໄໝ ປອດໄພ ແລະ ຍືນຍົງ ນອກຈາກນັ້ນ ກໍຕ້ອງໄດ້ຮີບຮ້ອນເອົາໃຈໃສ່ຄົ້ນຄ້ວາ ວິໄຈ ແລະ ຊອກຫາວິທີການໃໝ່ໃນການຊອກຫາແຫຼ່ງລາຍຮັບວິຊາການຈາກສື່ມວນຊົນ ແລະ ການພິມຈຳໜ່າຍ ລວມທັງການໃຊ້ຈ່າຍເຂົ້າໃນວຽກງານໃຫ້ມີຄວາມຄ່ອງຕົວທີ່ຖືກຕ້ອງສອດຄອງກັບລະບຽບກົດໝາຍໃຫ້ໄດ້ໂດຍໄວ ຫຼື ຫັນໄປສູ່ການກຸ້ມຕົນເອງ ໄປພ້ອມໆກັບການເອົາໃຈໃສ່ກໍ່ສ້າງພະນັກງານໜຸ່ມນ້ອຍສືບທອດປ່ຽນແທນທີ່ຮັບປະກັນທາງດ້ານທັດສະນະຫຼັກໝັ້ນ ຄຸນທາດການເມືອງ ແລະ ວິຊາສະເພາະທີ່ເຂັ້ມແຂງເພື່ອເຮັດໜ້າທີ່ອັນສຳຄັນທີ່ພັກ-ລັດໄດ້ມອບໝາຍໃຫ້.

ໂອກາດດຽວກັນ, ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງ ຖວທ ກ່າວວ່າ ໃນໜຶ່ງປິຜ່ານມາພວກເຮົາໄດ້ປະຕິ ບັດໜ້າທີ່ຢ່າງຕັ້ງໜ້າ ທັງສະຕິປັນຍາ ແລະ ເຫື່ອແຮງຂອງຕົນເຂົ້າໃນການໂຄສະນາເຜີຍແຜ່ຜົນສຳເລັດ ແຕ່ລະໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ປຸກລະດົມຈິດໃຈຮັກຊາດ ຮັກລະບອບໃໝ່ ແລະ ຄວາມເປັນເຈົ້າຕົນເອງ ສ້າງຄວາມເຂັ້ມແຂງດ້ວຍຕົນເອງພາຍໃຕ້ການຊີ້ນຳ-ນຳພາຂອງພັກກໍຄືອົງຄະນະພັກ ແລະ ຄະນະນຳກະຊວງ ຖວທ ໃນທ່າມກາງທີ່ປະ ສົບພົບພໍ້ກັບຄວາມຫຍຸ້ງຍາກ ແລະ ສິ່ງທ້າທາຍຫຼາກຫຼາຍຈາກສະພາບການເຊື່ອມໂຍງ ໃນຂະບວນການປະຕິວັດວິທະຍາສາດເຕັກໂນໂລຊີ ຂໍ້ມູນ-ຂ່າວສານທີ່ນັບມື້ນັບຂະຫຍາຍຕົວກ້າວເຂົ້າສູ່ຍຸກດິຈິຕອລ 4.0 ຊຶ່ງໄດ້ສົ່ງຜົນກະທົບທັງທາງບວກ ແລະ ທາງລົບຕໍ່ການພັດທະນາຢູ່ປະເທດເຮົາ ພັກ ແລະ ລັດ ໄດ້ຊີ້ນຳ-ນຳພາຢ່າງໃກ້ຊິດໃນການຄຸ້ມຄອງ ແລະ ການລົງທຶນຢ່າງຫຼວງຫຼາຍເຂົ້າໃສ່ໃນການພັດທະນາສື່ມວນຊົນ ແລະ ການພິມຈຳໜ່າຍເພາະຖືວ່າເປັນອາວຸດອັນແຫຼມຄົມ ເປັນກຳລັງຍູ້ດັນເຮັດໃຫ້ສັງຄົມມີການພັດ ທະນາ ແລະ ຂະ ຫຍາຍຕົວຂຶ້ນເລື້ອຍໆ ໂດຍມີໜັງສືພິມທັງໝົດ 33 ສະບັບ ໃນນັ້ນ ລາຍວັນມີ 11 ສະບັບ ລາຍອາທິດມີ 8 ສະ ບັບ ລາຍປັກ 10 ສະບັບ ແລະ ລາຍເດືອນ 4 ສະບັບ ວາລະສານ ມີ 113 ສະບັບຄື ລາຍອາທິດມີ 5 ສະບັບ ລາຍ 10 ວັນມີ 2 ສະບັບ ລາຍປັກ 3 ສະບັບ ລາຍເດືອນມີ 39 ສະບັບ ລາຍ 2 ເດືອນມີ 11 ສະບັບ ລາຍໄຕມາດມີ 40 ສະບັບ ລາຍ 4 ເດືອນມີ 1 ສະບັບ ລາຍ 6 ເດືອນມີ 10 ສະບັບ ແລະ ລາຍ 1 ປີມີ 2 ສະບັບ ສ່ວນໂທລະພາບມີທັງໝົດ 46 ສະຖານີຄື ຢູ່ສູນກາງມີ 6 ສະຖານີ ທ້ອງຖິ່ນ 26 ສະຖານນີ ສະຖານີເຄືອຂ່າຍມີ 11​ ສະຖານີ ແລະ ສະຖານີຕ່າງປະເທດ ມີ 3 ສະຖານີ ວິທະຍຸກະຈາຍສຽງມີ 76 ສະຖານີຄື ຢູ່ສູນກາງມີ 3 ສະຖານີ ແລະ ຢູ່ທ້ອງຖິ່ນ 73 ສະຖານີ ພ້ອມດຽວກັນນັ້ນ ໄດ້ສຳເລັດການຕິດຕັ້ງລະບົບໂທລະໂຄ່ງ ທັງໝົດ 5.880 ບ້ານ ໃນຈໍານວນບ້ານທັງໝົດ 8.502 ບ້ານ ໃນ 148 ເມືອງ ແລະ ຈຳນວນບ້ານທີ່ຍັງບໍ່ທັນຕິດຕັ້ງມີ 2.622 ບ້ານ.

 

 

 

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.