ສວນສາທາລະນະມິດຕະພາບ “ລາວ-ຍີ່ປຸ່ນ” ຈະເປີດນໍາໃຊ້ເດືອນໜ້າ

0
191

ໂຄງການກໍ່ສ້າງສວນສາທາລະນະມິດຕະພາບ “ລາວ-ຍີ່ປຸ່ນ” ຕັ້ງຢູ່ບ້ານທ່ານາ ເມືອງໄຊຍະບູລີ ແຂວງໄຊຍະບູລີ ເປັນໂຄງການທີ່ມີລັກສະນະການຮ່ວມມືຂອງສອງຊາດ ລາວ-ຍີ່ປຸ່ນ ຊຶ່ງສະແດງເຖິງສັນຍtລັກ ເອກະລັກທາງສະຖາປັດເຊັ່ນ ເຮືອນຊົງລາວ ແລະ ຊົງຍີ່ປຸ່ນ ມີສວນເປັນອົງປະກອບຕາມຮູບແບບຂອງໃຜລາວ ໂຄງການນີ້ຜູ້ຮັບເໝົາກໍ່ສ້າງໂດຍບໍລິສັດ BM ກໍ່ສ້າງຂົວທາງ ຊົນລະ ປະທານ ແລະ ເຄຫາ ຈໍາກັດ ໃນມູນຄ່າທັງໝົດ 27 ຕື້ກວ່າກີບ ໂດຍເປັນການຊ່ວຍເຫຼືອລ້າຈາກລັດຖະບານຍີ່ປຸ່ນ 58% ແລະ ທຶນສົມທົບຂອງແຂວງໄຊຍະບູລີ 42% ຊຶ່ງໄດ້ເລີ່ມຈັດຕັ້ງປະຕິບັດມາແຕ່ທ້າຍປີ 2017 ຮອດປັດຈຸບັນສໍາເລັດແລ້ວ 100% ແລະ ຄາດວ່າຈະເປີດນຳໃຊ້ໃນເດືອນກັນຍາ 2019 ນີ້.

ທ່ານ ຫງວນ ວັນ ບົ້ງ ຫົວໜ້າບໍລິສັດ BM ກໍ່ສ້າງຂົວທາງ ຊົນລະປະທານ ແລະ ເຄຫາ ຈໍາກັດ ໃຫ້ຮູ້ວ່າ ບັນດາໜ້າວຽກຂອງໂຄງ ການປະກອບມີ ຝາກັ້ນດິນ ວຽກໂທມແກ້ວ ວຽກປະຕິມະກໍານໍ້າພຸ ວຽກປະຕິມະກໍາຊ້າງ ລານອາເນກປະສົງເບຕົງພີມລາຍ ອ່າງເກັບນໍ້າ ເຮືອນ ແລະ ສວນຮູບແບບຍີ່ປຸ່ນ ເຮືອນ ແລະ ສວນຮູບແບບລາວ ຫ້ອງນໍ້າສາທາລະນະ ລານຈອດລົດໃນ ແລະ ນອກຂັ້ນໄດຂຶ້ນ ລະບົບນໍ້າໃນສວນ ລະບົບໄຟຟ້າ ການຕິດຕັ້ງອຸປະກອນ ປູກຫຍ້າ ຕົ້ນໄມ້ປະດັບ ຕົ້ນ ໄມ້ໃຫຍ່ ດອກໄມ້ໃນສວນ ຮ່ອງລະບາຍນໍ້າ ທາງຍ່າງໃນສວນ ຮົ້ວອ້ອມເຂດແດນ ແລະ ອື່ນໆ.

ທ່ານ ເພັດພິໄຊ ສູນວິໄລ ຫົວໜ້າຫ້ອງວ່າການແຂວງໄຊຍະບູລີໃນນາມເຈົ້າຂອງໂຄງການກ່າວວ່າ ໂຄງການຮ່ວມມື ລາວ-ຍີ່ປຸ່ນ ແຫ່ງນີ້ເປັນຈຸດໜຶ່ງຂອງແຜນພັດທະນາຕົວເມືອງໄຊຍະບູລີໃຫ້ເປັນຕົວເມືອງສີຂຽວ ສະອາດ ສວຍງາມ ມີຄວາມຍືນຍົງທາງດ້ານສິ່ງແວດລ້ອມ ແລະ ເປັນບ່ອນພັກຜ່ອນຂອງມວນຊົນທຸກຊັ້ນຄົນ ຜ່ານມາໂຄງການໄດ້ຮັບການຕິດຕາມກວດກາທຸກຂັ້ນຕອນຂອງການກໍ່ສ້າງ ແລະ ມາດຕະຖານດ້ານເຕັກນິກ ຊຶ່ງເຫັນວ່າໂຄງການກໍ່ສ້າງສວນສາທາລະນະມິດຕະພາບ ລາວ-ຍີ່ປຸ່ນ ແມ່ນຖືກຕາມແບບ ແລະ ສໍາເລັດຕາມແຜນການ.

ພາຍໃນເດືອນກັນຍາທີ່ຈະເຖິງນີ້ແມ່ນຈະເປີດໃຫ້ປະຊາຊົນ ພະນັກງານຫຼັກແຫຼ່ງພາຍໃນແຂວງ ລວມທັງບັນດາແຂກ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ເຂົ້າທ່ຽວຊົມຄວາມງາມຂອງສວນສາທາລະນະ ແລະ ຄາດວ່າຈະໄດ້ມອບ-ຮັບລະຫວ່າງ ບໍລິສັດຜູ້ຮັບເໝົາກໍ່ສ້າງ ຜູ້ໃຫ້ທຶນ ແລະ ແຂວງໄຊຍະບູລີໃນເດືອນຕຸລາ 2019 ນີ້.

 

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.