ລາວ-ຫວຽດນາມເພີ່ມທະວີການຮ່ວມມືສອງຝ່າຍ, ວຽກງານຖະແຫຼງຂ່າວ ແລະ ວັດທະນະທຳ

0
119

ໃນວັນທີ 5 ທັນວາ 2019 ທີ່ໂຮງແຮມລາວ ພລາຊາ ນະຄອນຫຼວງວຽງຈັນ, ທ່ານ ກິແກ້ວ ໄຂຄຳພິທູນ ລັດຖະມົນຕີກະຊວງຖະ ແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບ ແລະ ພົບປະສອງຝ່າຍກັບ ທ່ານ ຫງວຽນ ຫງອກ ຖຽນ ລັດຖະ ມົນຕີກະຊວງວັດທະນະທຳ, ກີລາ ແລະ ທ່ອງທ່ຽວ (ວກທ) ສສ ຫວຽດນາມ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.

ໃນການພົບປະຄັ້ງນີ້, ສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືລະຫວ່າງ ສປປ ລາວ ແລະ ຫວຽດນາມ ສາຍພົວພັນມິດຕະ ພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ສືບຕໍ່ຂະຫຍາຍຕົວເຂົ້າສູ່ລວງເລິກ. ການພົວພັນຮ່ວມມືືສອງຝ່າຍລະຫວ່າງ ກະຊວງ ຖວທ ລາວ ແລະ ກະຊວງ ວກທ ສສ ຫວຽດນາມ ຊຶ່ງທີ່ຜ່ານມາໄດ້ຮັບການເສີມຂະຫຍາຍ ແລະ ປະກອບສ່ວນເຂົ້າໃນການເສີມສ້າງມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດເວົ້າລວມ, ເວົ້າສະເພາະກໍແມ່ນການພົວພັນຮ່ວມມືທີ່ມີມູນເຊື້ອລະຫວ່າງສອງກະຊວງດັ່ງກ່າວ, ໃຫ້ນັບມື້ນັບແໜ້ນແຟ້ນ ທັງມີໝາກມີຜົນຕົວຈິງ, ປະ ກອບສ່ວນເຂົ້າໃນການປັບປຸງຍົກລະດັບຄຸນນະພາບ ແລະ ປະສິດທິຜົນຂອງວຽກວັດທະນະທຳ ແລະ ທ່ອງທ່ຽວຂອງສອງປະເທດພວກເຮົາໃຫ້ນັບມື້ນັບສູງຂຶ້ນຢ່າງບໍ່ຢຸດຢັ້ງ.

ທ່ານ ກິແກ້ວ ກ່າວວ່າ: ການຢ້ຽມຢາມ ແລະ ເຮັດວຽກຂອງ ທ່ານ ຫງວຽນ ຫງອກ ຖຽນ ພ້ອມຄະນະໃນຄັ້ງນີ້, ຈະປະກອບສ່ວນຢ່າງສຳຄັນເຂົ້າໃນການເພີ່ມພູນຄູນສ້າງສາຍພົວພັນອັນແໜ້ນແຟ້ນ ແລະ ມີປະສິດທິຜົນລະຫວ່າງສອງກະຊວງ ຖວທ ສປປ ລາວ ແລະ ວກທ ສສ ຫວຽດນາມ, ທັງເປັນການປະກອບສ່ວນເຂົ້າໃນການເສີມສ້າງມິດຕະພາບອັນຍິ່ງໃຫຍ່, ຄວາມສາມັກຄີພິ ເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ໃຫ້ນັບມື້ແໜ້ນແຟ້ນ ແລະ ເກີດດອກອອກຜົນຍິ່ງໆຂຶ້ນ.

ການແລກປ່ຽນຂອງສອງຝ່າຍໃນໄລຍະຜ່ານມາ ເປັນຕົ້ນແມ່ນດ້ານວັດທະນະທຳ ແລະ ທ່ອງທ່ຽວໄດ້ຈັດຕັ້ງປະຕິບັດຕາມບົດບັນ ທຶກຮ່ວມມືແຕ່ປີ 2015-2020 ທັງສອງຝ່່າຍກໍໄດ້ພົວພັນຮ່ວມມືກັນດ້ວຍດີຕະຫຼອດມາ ເປັນຕົ້ນການພົວພັນຮ່ວມມືຂັ້ນການນຳຂັ້ນສູງຈົນຮອດຂັ້ນວິຊາການ ຊຶ່ງໄລຍະຜ່ານມາສອງກະຊວງດັ່ງກ່າວກໍໄດ້ຜັດປ່ຽນກັນເປັນເຈົ້າພາບຈັດຕັ້ງສັບປະດາວັດທະນະທຳ ຊຶ່ງກັນ ແລະ ກັນໃນແຕ່ລະປະເທດ. ນອກນັ້ນ ກໍຍັງໄດ້ຮ່ວມມືດ້ານອື່ນໆເຊັ່ນ: ຝຶກອົບຮົມວຽກງານວັດທະນະທຳ ແລະ ທ່ອງທ່ຽວ, ຮູບເງົາ, ການພິມຈຳໜ່າຍ, ຫໍສະໝຸດ, ແລກປ່ຽນດ້ານສິລະປະການສະແດງໃນວັນສຳຄັນຕ່າງໆຂອງສອງຝ່າຍ. ສ່ວນດ້ານການທ່ອງທ່ຽວກໍໄດ້ແລກບົດຮຽນຄຸ້ມຄອງເຮືອນພັກ, ໂຮງແຮມ, ປົກປັກຮັກສາສິ່ງແວດລ້ອມ, ພັດທະນາຜະລິດຕະພັນການທ່ອງ ທ່ຽວ, ສ້າງການເຊື່ອມໂຍງການທ່ອງທ່ຽວ, ໂຄສະນາການທ່ອງທ່ຽວ ແລະ ການເຂົ້າຮ່ວມການວາງສະແດງການທ່ອງທ່ຽວສາກົນ.

ໃນໂອກາດດຽວກັນ, ທ່ານລັດຖະມົນຕີ ກະຊວງ ຖວທ ຍັງໄດ້ສະເໜີໃຫ້ມີການສືບຕໍ່ຄົ້ນຄວ້າສ້າງແຜນການຮ່ວມມືລະຫວ່າງສອງຝ່າຍໃຫ້ຕໍ່ເນື່ອງ,  ໂດຍເນັ້ນຕື່ມອີກໃສ່ການແລກປ່ຽນບົດຮຽນ ແລະ ຂໍ້ມູນ-ຂ່າວສານ ກ່ຽວກັບສະພາບການພາຍໃນ ແລະ ສາ ກົນ, ແລກປ່ຽນບົດຮຽນກ່ຽວກັບວຽກງານວັດທະນະທຳ ແລະ ທ່ອງທ່ຽວ, ສ້າງກົນໄກປະສານງານລະຫວ່າງ 2 ຝ່າຍໃຫ້ຄ່ອງຕົວ ແລະ ມີປະສິດທິຜົນສູງ. ພ້ອມສະເໜີຝ່າຍຫວຽດນາມຊ່ວຍເຫຼືອໃນການສະເໜີປ່າສະຫງວນແຫ່ງຊາດຫີນໜາມໜໍ່ຂອງລາວ ເປັນມໍລະດົກໂລກທາງດ້ານທຳມະຊາດ ແລະ ສ້າງຄະນະປະສານງານ ລາວ-ຫວຽດນາມ ໃນການຄຸ້ມຄອງຫີນໜາມໜໍ່ ແລະ ຟອງຍາແກບາງ (ທີ່ເປັນມໍລະດົກໂລກແລ້ວ) ຮ່ວມກັນໃນຕໍ່ໜ້າ.

ພ້ອມນີ້ ກໍໄດ້ສະເໜີຝ່າຍເພື່ອນໃຫ້ການຊ່ວຍເຫລືອການຈັດຝຶກອົບຮົມໄລຍະສັ້ນ, ໄລະຍະກາງ ແລະ ການໄປສຶກສາຮ່ຳຮຽນໃນໄລ ຍະຍາວກ່ຽວກັບວຽກງານວິຊາສະເພາະ, ໃຫ້ພະນັກງານ ຖວທ ລາວ ແລະ ພະນັກງານຢູ່ທ້ອງຖິ່ນ ເປັນຕົ້ນບັນດາແຂວງຊາຍທີ່ມີແດນຕິດກັບ ສສ ຫວຽດນາມ ດ້ວຍຮູບການສົ່ງຄະນະວິຊາການມາເຜີຍແຜ່, ລາຍງານສະພາບການ, ທັງຈັດຝຶກອົບຮົມຢູ່ ສສຫວຽດນາມ ໃນແຕ່ລະໄລຍະຕາມເງື່ອນໄຂ ແລະ ຄວາມສາມາດຕົວຈິງ, ເພີ່ມການພົບປະແລກປ່ຽນຄະນະວິຊາການໃຫ້ຫຼາຍຂຶ້ນ ເພື່ອທອດຖອນບົດຮຽນກ່ຽວກັບວຽກງານວັດທະນະທຳ ແລະ ທ່ອງທ່ຽວຂອງສອງຝ່າຍດ້ວຍລະບົບສື່ສານທີ່ທັນສະໄໝ, ສາມາດເຊື່ອມຕໍ່ກັນດ້ວຍລະບົບເອເລັກໂຕຣນິກ, ສະເໜີຈັດຕັ້ງການພົບປະແລກປ່ຽ ການທັດສະນະສຶກສາ ແລະ ເຄື່ອນໄຫວກິດຈະກຳ ອື່ນໆຮ່ວມກັນຂອງສອງຝ່າຍ ລາວ-ຫວຽດນາມ ຕາມຄວາມອາດສາມາດຕົວຈິງ ເພື່ອຮັດແໜ້ນຄວາມສາມັກຄີລະຫວ່າງສອງກະ ຊວງ ແລະ ສະເໜີສືບຕໍ່ການຊ່ວຍເຫຼືອໂຄງການຊ່ວຍເຫຼືອກໍ່ສ້າງໂຮງຮຽນສິນລະປະດົນຕີແຫ່ງຊາດ ຕາມການຮ່ວມມືໃນຂອບສອງລັດຖະບານ.

 

 

ໂດຍ: ດອກຕາເວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.