ການສໍ້ລາດບັງຫຼວງຍັງເປັນບັນຫາໃຫຍ່ທີ່ລັດຖະບານລາວຕ້ອງເລັ່ງແກ້ໄຂ!!

0
473

ກອງ​ປະຊຸມ​ວຽກ​ງານ​ກວດກາ​ທົ່ວ​ປະເທດ​ປະຈຳ​ປີ 2019 ໄດ້​ເປີດ​ຂຶ້ນ​ຢ່າງ​ເປັນ​ທາງ​ການ​ເມື່ອວັນ​ທີ 8-10 ມັງກອນ 2020 ຜ່ານ​ມາ, ໂດຍອົງການ​ກວດກາ​ລັດຖະບານໄດ້​ຂຶ້ນ​ຜ່ານ​ຮ່າງ​ບົດ​ສະຫຼຸບ​ຕີ​ລາຄາການເຄື່ອນໄຫວ​ວຽກ​ງານ​ຕິດ​ຕາມ​-​ກວດກາ ແລະ ສະກັດ​ກັ້​ນ-​ຕ້ານ​ການ​ສໍ້​ລາດ​ບັງ​ຫຼວງ​ໃນ​ປີ 2019, ພ້ອມທິດ​ທາງ​ແຜນການ​ວຽກ​ງານ​ກວດກາ​ປີ 2020.

ຊຶ່ງ​ໄລຍະ 1 ປີ ອົງການ​ປົກຄອງ​ຄະນະ​ກວດກາພັກ​-​ອົງການ​ກວດກາ​ລັດ​ແຕ່​ລະ​ຂັ້ນ​ໄດ້​ສຸມ​ໃສ່​ຈັດ​ຕັ້ງ​ປະຕິບັດ​ວຽກ​ງານ​ກວດກາ​ຕາມ​ພາລະ​ບົດບາດ, ໜ້າທີ່, ຂອບເຂດ​ສິດ​ຂອງ​ຕົນຕາມ​ການ​ລາຍ​ງານ​ຈາກ 21 ກະ​ຊວງ​-​ອົງການ, 17 ແຂວງ​-​ນະຄອນຫຼວງໄດ້​ກວດກາ​ທັງ​ໝົດ 945 ເປົ້າ​ໝາຍ, ໃນ​ນີ້ ຕິດຕາມ, ກວດກາ​ປົກກະຕິ 333 ເປົ້າ​ໝາຍ, ສືບຕໍ່​ຕິດຕາມ, ກວດກາ​ໂຄງການ​ລົງທຶນ​ຂອງ​ລັດ​ເລີ່ມ​ແຕ່​ຫົວທີ 140 ໂຄງການ, ກວດກາ​ຕາມ​ຜົນ​ການ​ກວດສອບ 307 ເປົ້າ​ໝາຍ.

ຜ່ານ​ການ​ຕິດຕາມ, ກວດກາ ພົບ​ເຫັນ​ຜົນ​ເສຍ​ຫາຍ​ທັງ​ໝົດ 1.477,64 ຕື້​ກີບ, 10,08 ລ້ານ​ບາດ, 24,68 ລ້ານ​ໂດ​ລາ, ລົດ​ໃຫຍ່ 5 ຄັນ, ເກັບ​ກູ້​ຄືນ 35,95 ຕື້​ກີບ, 10 ລ້ານ​ບາດ, 200.000 ໂດ​ລາ ແລະ ລົດ​ໃຫຍ່ 4 ຄັນ.

ໂອກາດ​​ນີ້, ສະຫາຍ ບຸນ​ທອງ ຈິດ​ມະນີ ໄດ້​ໃຫ້​ກຽດ​ໂອ້​ລົມ​ຕໍ່​ກອງ​ປະຊຸມດັ່ງກ່າວ ຊຶ່ງ​ໄດ້​ເນັ້ນ​ໜັກ​ຫຼາຍ​ບັນຫາໂດຍ​ສະເພາະ​ແມ່ນ​ການ​ຕິດ​ຕາມ​-​ກວດກາ​ການ​ຄຸ້ມ​ຄອງ​ບໍລິຫານ​ລັດ​ແຕ່​ລະ​ຂັ້ນ​ແມ່ນ​ໃຫ້​ສຸມ​ໃສ່​ບາງ​ວຽກ​ງານ​ດັ່ງນີ້:

1. ຕິດ​ຕາມ, ກວດກາ​ການ​ປະຕິບັດ​ພາລະ​ບົດບາດ, ໜ້າທີ່, ການ​ໃຊ້​ສິດ​ອຳນາດ​ຂອງ​ແຕ່​ລະ​ຂະແໜງການ ແລະ ທ້ອງຖິ່ນ, ການ​ປະຕິບັດ​ມະຕິ, ຄຳ​ສັ່ງ, ກົດໝາຍ, ດຳລັດ ແລະ ລະບຽບ​ການ​ຕ່າງໆ​ຂອງ​ລັດ.

2. ຕິດຕາມ, ກວດກາ​ການ​ເກັບ​ລາຍ​ຮັບ​ເຂົ້າ​ງົບປະມານ, ການ​ປະຕິບັດ​ກົດໝາຍ​ພາ​ສີ​-​ອາກອນ, ກົດໝາຍ​ງົບປະມານ ​ແລະ  ​ອື່ນໆ, ການ​ຄຸ້ມ​ຄອງ​ລາຍ​ຈ່າຍ​ຂອງ​ກະ​ຊວງ​-​ອົງການ ແລະ ທ້ອງຖິ່ນໃຫ້​ຖືກ​ຕາມ​ເປົ້າ​ໝາຍ ແລະ ຮັບປະກັນ​ການ​ປະຕິບັດ​ນະໂຍ ບາຍ​ປະຢັດ​ແຫ່ງ​ຊາດ.

3. ສືບຕໍ່​ຕິດຕາມ, ກວດກາ​, ລົງ​ເລິກ ແລະ ສືບ​ສວນ​-​ສອບ​ສວນ​ກ່ຽວ​ກັບ​ຄວາມ​ຮັບຜິດຊອບ​ຂອງ​ການຈັດຕັ້ງ ແລະ ບຸກຄົນ​ທີ່​ພົວພັນ​ເຖິງ​ໂຄງການ​ລົງທຶນ​ຂອງ​ລັດ ແລະ ການ​ຊຳລະ​ໜີ້​ສິນ​ແບບ​ມີ​ສ່ວນ​ຫຼຸດ, ການ​ຊຳລະ​ເກີນ ແລະ ຊໍ້າຊ້ອນ​ຢູ່​ບັນດາ​ແຂວງ​ທີ່​ຍັງ​ຄ້າງ​ປະຕິ​ບັດ.

4. ສືບຕໍ່​ປະຕິບັດ​ມາດ​ຕະການ​ກວດກາ​ເລີ່ມ​ແຕ່​ຫົວທີ​ຕໍ່​ການ​ປະຕິບັດ​ໂຄງການ​ລົງທຶນ​ຂອງ​ລັດ​ເຊັ່ນ: ໂຄງການ​ກໍ່ສ້າງ​ທາງ​ລົດໄຟ​ລາວ​-​ຈີນ ແລະ ອື່ນໆ​ເລີ່ມ​ແຕ່​ການ​ປະມູນ, ການ​ຈັດ​ຊື້​-​ຈັດ​ຈ້າງ ແລະ ຕະຫຼອດ​ໄລຍະ​ເວລາ​ຂອງ​ການ​ປະຕິບັດ​ໂຄງການ​ໃຫ້​ດຳເນີນ​ໄປ​ຖືກຕ້ອງ​ຕາມ​ສັນຍາ​ແລະ​ລະ​ບຽ​ບ-​ກົດ​ໝາຍ.

5. ສືບຕໍ່​ຕິດຕາມ, ກວດກາ ແລະ ຊຸກຍູ້​ການຈັດຕັ້ງ​ປະຕິບັດ​ຄຳ​ສັ່ງ​ເລກ​ທີ 15/ນຍ ​ເປັນຕົ້ນ​ການ​ຄຸ້ມ​ຄອງ​ປ່າໄມ້ ແລະ ທຸລະ​ກິດ​ໄມ້, ການ​ປະຕິບັດ​ພັນທະ​ໄມ້ ແລະ ບັນຫາ​ອື່ນໆ ເປັນຕົ້ນ​ຢູ່​ດ່ານ​ຕ່າງໆ ແລະ ຢູ່​ຕາມ​ລຽບ​ຊາຍ​ແດນ ເມື່ອ​ພົບ​ເຫັນ​ຜູ້​ລະເມີດ​ຕ້ອງ​ແກ້​ໄຂ​ຢ່າງ​ເຂັ້ມ​ງວດ​ຕາມ​ລະ​ບຽ​ບ-​ກົດ​ໝາຍ.

ຮຽບຮຽງຂ່າວ: ພຸດສະດີ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.