ລັດປາບປາມພວກຫຼີກລ່ຽງພາສີ! ທຳລາຍພືດຜັກນຳເຂົ້າບໍ່ຖືກລະ­ບຽບ​ກົດ­ໝາຍຫຼາຍກວ່າ 1 ໂຕນ

0
2668

ໜັງສືພິມວຽງຈັນໃໝ່ລາຍງານເມື່ອວັນທີ 14 ພະຈິກຜ່ານມາວ່າ: ສະ­ຖາ­ນີ​ກັກ​ກັນ​ພືດ​ດົງ​ໂພ​ສີ ເມືອງ​ຫາດ​ຊາຍ​ຟອງ ນະ­ຄອນຫຼວງ​ວຽງ​ຈັນໄດ້ທຳ­ລາຍ​ພືດ​ຜັກ​ທີ່​ນຳ​ເຂົ້າ​ບໍ່​ຖືກ​​ກົດ­ໝາຍເມື່ອວັນ​ທີ 12 ພະ­ຈິກ 2019, ໂດຍ​ມີ​ທ່ານ ວັນ­ນາ ຄຳ​ໂພ​ໂຊ ຫົວໜ້າ​ດ່ານ​ປ້ອງ​ກັນ​ພືດ​ສາ­ກົນ​ດົງ​ໂພ​ສີ, ທ່ານ ຄຳ​ພັດ ສີ​ລາ​ວົງ ຮອງ​ຫົວ­ໜ້າ​ດ່ານ​ພາ­ສີ​ສາ­ກົນ​ຂົວ​ມິດ­ຕະ­ພາບລາວ-ໄທ 1, ພ້ອມ​ດ້ວຍ​ຕາງ­ໜ້າ​ຈາກ​ອົງ­ການ​ອາ­ຫານ ແລະ ຢາ, ຂະ­ແໜງ​ປູກ­ຝັງ, ແພດ​ປະ­ຈຳ​ດ່ານ ແລະ ພາກ­ສ່ວນ​ກ່ຽວ­ຂ້ອງເຂົ້າ​ຮ່ວມ.

ພືດ​ຜັກ​ທີ່​ນຳ​ມາ​ທຳ­ລາຍ​ຄັ້ງ​ນີ້ແມ່ນ​ພືດ​ທີ່​ເຈົ້າ​ໜ້າ­ທີ່​ພາ­ສີ​ປະ­ຈຳ​ຢູ່​ດ່ານ​ມິດ­ຕະ­ພາບລາວ-ໄທ 1 ທີ່ກວດ​ພົບ ແລະ ຢຶດ​ໄດ້​ໃນ​ວັນ​ທີ 7 ພະ­ຈິກ 2019 ຈາກ​ການ​ນຳ​ເຂົ້າ​ຜ່ານ​ລົດ­ເມ​ປະ­ຈຳ​ທາງ​ອຸ­ດອນ-ວຽງ​ຈັນ 12 ລາຍ­ການ, ໃນ​ນີ້ ມີ​ໝາກ­ເຜັດ 350 ກີໂລກຣາມ ໝາກ​ລີ່ນ­ໄມ້ 20 ກີໂລກຣາມ, ຫອມ​ບົ່ວ 170 ກີໂລກຣາມ, ດອກ​ຜັກ 100 ກີໂລກຣາມ, ໝາກ­ແຕງ 50 ກີໂລກຣາມ, ໝາກ​ງຸ​ງ້ຽວ 120 ກີໂລກຣາມ, ໝາກ­ຖົ່ວ 80 ກີໂລກຣາມ, ໝາກ­ຖົ່ວ​ພູ 20 ກີໂລກຣາມ, ຜັກ​ກາດ 90 ກີໂລກຣາມ, ໝາກ​ມະ­ລະ 30 ກີໂລກຣາມ, ຫົວ​ຜັກ​ກາດ​ຂາວ 20 ກີໂລກຣາມ, ເຜືອກ 20 ກີໂລກຣາມ ລວມ​ນໍ້າໜັກ 1.070 ກີໂລກຣາມ, ທັງນີ້ ແມ່ນ​ເປັນ​ຂອງ​ ທ້າວ ໂຕ​ເລັກ ອາ­ຍຸ 30 ປີ ບ້ານ​ໜອງ​ສະ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ.

ພືດ​ຜັກ​ທັງ​ໝົດ​ນີ້ແມ່ນ​ບໍ່​ມີ​ໃບ​ອະ­ນຸ­ຍາດ​ນຳ​ເຂົ້າ, ບໍ່​ມີ​ໃບ­ຢັ້ງ­ຢືນ​ດ້ານ​ສຸ​ຂະ​ອະ­ນາ­ໄມ ແລະ ບໍ່​ເສຍ​ພາ­ສີ. ຊຶ່ງ​ເຈົ້າ​ໜ້າ­ທີ່​ໄດ້​ແນະ­ນຳ​ໃຫ້​ປະ­ຕິ­ບັດ​ຕາມ​ລະ­ບຽບ​ໃຫ້​ຖືກ­ຕ້ອງ ແຕ່​ຜູ້­ກ່ຽວ​ບໍ່​ມາ​ຕິດ­ຕໍ່​ພົວ­ພັນ​ຈົນ​ຮອດ​ປັດ­ຈຸ­ບັນ, ດັ່ງນັ້ນ ພາກ­ສ່ວນ​ກ່ຽວ­ຂ້ອງ​ຈຶ່ງ​ໄດ້​ນຳ​ເອົາ​ພືດ​ຜັກ​ດັ່ງ­ກ່າວມາ​ທຳ­ລາຍ​.

ຮຽບຮຽງຂ່າວ: ພຸດສະດີ ລາວລີ
ແຫຼ່ງຂໍ້ມູນ: www.vientianemai.net
ຮູບປະກອບຂ່າວ: laoedaily.com.la

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.