ລັດຖະມົນຕີ ຮສສ ຮຽກຮ້ອງທົ່ວສັງຄົມປະກອບສ່ວນຊ່ວຍເຫຼືອຜູ້ປະສົບໄພນ້ຳຖ້ວມ

0
84

ໃນວັນທີ 10 ສິງຫາ 2019 ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ປະ ທານຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດໄດ້ຮຽກຮ້ອງມາຍັງທຸກພາກສ່ວນທົ່ວສັງຄົມ ທັງນິຕິບຸກຄົນ ພາກລັດ ແລະ ເອກະຊົນ ຈົ່ງພ້ອມໃຈກັນປະກອບສ່ວນຊ່ວຍເຫຼືອຜູ້ປະສົບໄພພິບັດນ້ຳຖ້ວມຢູ່ບັນດາແຂວງພາກກາງ ແລະ ພາກໃຕ້ ໂດຍສະເພາະແມ່ນເຕັ້ນພັກຊົ່ວຄາວ ເຄື່ອງອຸປະໂພກ-ບໍລິໂພກ ເຂົ້າສານ ອາຫານ ນໍ້າດື່ມ ເຄື່ອງໃຊ້ຄົວເຮືອນ ເຄື່ອງນອນ ຢາປົວພະຍາດ ເຮືອພ້ອມຄົນຂັບ ງົບປະມານຮັບໃຊ້ ແລະ ອື່ນໆ ເພາະປະຊາຊົນຜູ້ຖືກຜົນກະທົບຍັງມີຄວາມຕ້ອງການຢ່າງຫຼວງຫຼາຍ.

ທ່ານ ຄຳແພງ ໄຊສົມແພ ຊີ້ໃຫ້ເຫັນວ່າ ເນື່ອງຈາກເມື່ອລະຫວ່າງທ້າຍເດືອນສິງຫາຫາຕົ້ນເດືອນກັນຍາທີ່ຜ່ານມາເຂດດັ່ງກ່າວຕ່າງກໍໄດ້ຮັບຜົນກະທົບຈາກອິດທິພົນຂອງລົມພະຍຸໝູນເຂດຮ້ອນໂພດູ ແລະ ລົມພະຍຸດີເປຣເຊິນທີ່ພັດຜ່ານເຂົ້າມາ ສປປ ລາວ ເຮັດໃຫ້ມີຝົນຕົກໜັກ ແລະ ເກີດນໍ້າຖ້ວມຢູ່ 6 ແຂວງຄື ຄຳມ່ວນ ສະຫວັນນະເຂດ ສາລະວັນ ຈຳປາສັກ ເຊກອງ ແລະ ອັດຕະປື ສົ່ງຜົນກະທົບໂດຍກົງຕໍ່ປະຊາຊົນໃນ 47 ເມືອງ 1.643 ບ້ານ 150.415 ຄອບຄົວ 458.017 ຄົນ ຊຶ່ງເຮັດໃຫ້ມີຜູ້ເສຍຊີວິດ 13 ຄົນ (ແຂວງສະຫວັນນະເຂດ 3 ຄົນ ສາລະວັນ 2 ຄົນ ອັດຕະປື 4 ຄົນ ແລະ ຈໍາປາສັກ 4 ຄົນ) ສູນຫາຍ 1 ຄົນ ຢູ່ແຂວງຈໍາປາ ສັກ ປະຊາຊົນໄດ້ຮັບການຍົກຍ້າຍ 14.328 ກວ່າຄອບຄົວ 102.416 ກວ່າຄົນ ຍິງ 15.205 ຄົນ ນອກຈາກນີ້ ຍັງສົ່ງຜົນກະ ທົບ ແລະ ເສຍຫາຍຕໍ່ຂະແໜງການສັງຄົມ ເສດຖະກິດ ສິ່ງແວດລ້ອມ ແລະ ໂຄງລ່າງພື້ນຖານທີ່ສໍາຄັນ ເປັນຕົ້ນທີ່ຢູ່ອາໄສ ແລະ ບ້ານເຮືອນຂອງປະຊາຊົນ ເສັ້ນທາງ ຂົວ ຫ້ອງການຂອງລັດ ໂຮງຮຽນ ໂຮງໝໍ ສຸກສາລາ ແຫຼ່ງນໍ້າກິນ-ນໍ້າໃຊ້ ພື້ນທີ່ການຜະລິດ ສັດລ້ຽງ ຊົນລະປະທານ ແລະ ອື່ນໆ.

ຕໍ່ກັບເຫດການດັ່ງກ່າວ ຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດກໍໄດ້ປະສານງານຢ່າງໃກ້ຊິດກັບບັນດາແຂວງທີ່ຖືກກະທົບຈາກໄພພິບັດ ພ້ອມທັງໄດ້ເລັ່ງດຳເນີນການຊ່ວຍເຫຼືອບັນເທົາທຸກສຸກເສີນ ເປັນຕົ້ນໄດ້ສົມທົບກັບກອງທັບນໍາໃຊ້ລົດ ແລະ ຍົນເພື່ອຈັດສົ່ງພາຫະນະ ອຸປະກອນ ແລະ ເຄື່ອງຊ່ວຍເຫຼືອບັນເທົາທຸກສຸກເສີນໄປຊ່ວຍເຫຼືອປະຊາຊົນທີ່ຖືກກະທົບຢູ່ບັນດາແຂວງເຊັ່ນ ເຮືອກູ້ໄພຈໍານວນ 39 ລໍາເພື່ອນໍາໃຊ້ເຂົ້າໃນການກູ້ໄພ ແລະ ຍົກຍ້າຍປະຊາຊົນ ພ້ອມທັງສັບສິນຂອງເຂົາເຈົ້າ ເຕັ້ນນອນຄອບຄົວ 120 ຊຸດ ນໍ້າດື່ມ 3 ພັນກວ່າແພັກ ເຄື່ອງໃຊ້ຄົວເຮືອນ 300 ກວ່າຊຸດ ໄດ້ນໍາໃຊ້ເງິນທີ່ລັດຖະບານຈັດສັນໃນເບື້ອງຕົ້ນໃຫ້ຈໍານວນ 5 ຕື້ກີບນໍາໄປຊ່ວຍເຫຼືອ ແລະ ມອບໃຫ້ບັນດາແຂວງທີ່ຖືກກະທົບຈາກໄພພິບັດນໍ້າຖ້ວມໃນຄັ້ງນີ້ ລວມທັງ ໄດ້ມອບເງິນໃນບ້ວງກອງທຶນແຮນໍ້າມັນສຸກເສີນໃຫ້ແຂວງລະ 50 ລ້ານກີບເພື່ອນໍາໃຊ້ເຂົ້າໃນການບໍລິຫານ ຂົນສົ່ງເຄື່ອງຊ່ວຍ ເຫຼືອບັນເທົາທຸກໄປໃຫ້ຜູ້ປະສົບໄພພິບັດ.

ພ້ອມນີ້ ກະຊວງແຮງງານ ແລະ ສະຫວັດດີການສັງຄົມ ກໍໄດ້ອອກແຈ້ງການລະດົມບໍລິຈາກນໍາສັງຄົມຜ່ານສື່ມວນຊົນຊຶ່ງໄດ້ເລີ່ມປະ ຕິບັດແຕ່ວັນທີ 7 ກັນຍາ 2019 ເປັນຕົ້ນມາ ຮອດປັດຈຸບັນໄດ້ມີຫຼາຍພາກສ່ວນທີ່ເຂົ້າມາໃຫ້ການຊ່ວຍເຫຼືອທັງເງິນສົດ ແລະ ເຄື່ອງອຸປະໂພກ-ບໍລິໂພກ ເຂົ້າ ນໍ້າດື່ມ ເຄື່ອງນຸ່ງຫົ່ມ ເຄື່ອງນອນ ເຄື່ອງໃຊ້ຄົວເຮືອນ ແລະ ອື່ນໆ ລວມມູນຄ່າກວ່າ 1 ຕື້ກີບ ຊຶ່ງໄດ້ນໍາໄປຊ່ວຍເຫຼືອຜູ້ປະສົບໄພພິບັດໃນບັນດາແຂວງຢູ່ພາກໄຕ້ຮຽບຮ້ອຍແລ້ວ ປັດຈຸບັນ ຍັງມີເຄື່ອງອຸປະໂພກ-ບໍລິໂພກຈໍານວນໜຶ່ງຢູ່ສາງກະຊວງ ຮສສ ແລະ ກໍາລັງປະສານກັບກອງທັບເພື່ອນໍາສົ່ງເຄື່ອງດັ່ງກ່າວໄປເພື່ອຊ່ວຍເຫຼືອຜູ້ປະສົບໄພພິບັດ.

ເພື່ອຮັບມືກັບເຫດການທີ່ຈະເກີດຂຶ້ນໃນຕໍ່ໜ້າ ກະຊວງ ຮສສ ກໍຄືລັດຖະບານໄດ້ມີມາດຕະການຈັດຕັ້ງປະຕິບັດດັ່ງນີ້ ສືບຕໍ່ການຕິດຕາມພະຍາກອນ ແລະ ແຈ້ງຂ່າວເຕືອນໄພລ່ວງໜ້າໃຫ້ທັນເວລາ ນໍາໃຊ້ເຄື່ອງມືທີ່ມີຢູ່ ສືບຕໍ່ປະສານ-ປະຕິບັດໃຫ້ການຊ່ວຍ ເຫຼືອສຸກເສີນ ແລະ ຟື້ນຟູຮີບດ່ວນ ລວມທັງການສົ່ງທີມປະເມີນສຸກເສີນເພື່ອເຮັດການປະເມີນຄວາມເສຍຫາຍ ແລະ ຄວາມຕ້ອງການເພື່ອສ້າງແຜນຊ່ວຍເຫຼືອ ແລະ ຟື້ນຟູຄືນຫຼັງໄພພິບັດ ເລັ່ງສືບຕໍ່ສ້ອມແປງສິ່ງອໍານວຍຄວາມສະດວກ ແລະ ສະຖານທີ່ບໍລິການ ເປັນຕົ້ນເສັ້ນທາງ ຂົວ ໄຟຟ້າ ນໍ້າປະປາ ແຫຼ່ງນໍ້າກິນ-ນໍ້າໃຊ້ ໂຮງຮຽນ ໂຮງໝໍ ສຸກສາລາ ແລະ ອື່ນໆ ຮັບປະກັນໃຫ້ຜູ້ປະ ສົບໄພພິບັດທີ່ອາໄສຢູ່ສູນພັກເຊົາ ໄດ້ເຂົ້າເຖິງປັດໄຈດ້ານອາຫານ ນໍ້າດື່ມ ການຢູ່ກິນທີ່ປອດໄພ ສຸຂະອະນາໄມ ແລະ ສຸຂະພາບ ສືບຕໍ່ນໍາໃຊ້ກໍາລັງແຮງຂອງກອງທັບ ຕໍາຫຼວດ ຊາວໜຸ່ມ ແມ່ຍິງ ກາແດງ ອາສາສະໝັກ ເພື່ອປະຕິບັດໃຫ້ການຊ່ວຍເຫຼືອສຸກເສີນ ແລະ ຟື້ນຟູຫຼັງໄພພິບັດ ຂໍນໍາໃຊ້ເຂົ້າສານໃນຂອບໂຄງການອາຊຽນບວກສາມ ລວມທັງເຂົ້າໃນຄັງສະສົມຂອງກະຊວງການເງິນ.

ສຳລັບຜູ້ທີ່ຕ້ອງການປະກອບສ່ວໃນການແກ້ໄຂບັນເທົາທຸກໃນຄັ້ງນີ້ສາມາດປະກອບສ່ວນດ້ວຍຕົນເອງ ຫຼື ປະສານມາຍັງກົມສົງ ເຄາະ ກະຊວງແຮງງານ ແລະ ສະຫວັດດີການສັງຄົມ ຫຼື ສາມາດໂອນເຂົ້າບັນຊີ ກອງທຶນຊ່ວຍເຫຼືອຜູ້ປະສົບເຄາະຮ້າຍຈາກໄພພິ ບັດ ກະຊວງແຮງງານ ແລະ ສະຫວັດດີການສັງຄົມ ພາສາອັງກິດ Fund Assistance ta Disaster Victims-Mlrilstry of Labour and Social Weltare ຫຼື ໂອນຜ່ານບັນຊີສະກຸນເງິນຕ່າງໆດັ່ງລຸ່ມນີ້

ບັນຊີສະກຸນເງິນກີບ 010110001508937001

ບັນຊີສະກຸນເງິນບາດ 01011020150 8937001

ບັນຊີສະກຸນເງິນໂດລາ 010110101508937001

ບັນດາທ່ານສາມາດຕິດຕໍ່ພົວພັນມາໃຫ້ການຊ່ວຍເຫຼືອນັບແຕ່ເວລາ 7:30 ໂມງ ຂອງວັນທີ 7 ກັນຍາ 2019 ເປັນຕົ້ນໄປ.

 

 

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.