ລັດຖະບານນາມີເບຍ ຍອມໃຫ້ປະມູນສັດປ່າ 1 ພັນໂຕສົມທົບທຶນສູ້ໄພແລ້ງ

0
163

ເຖິງທາງຕັນເມື່ອລັດຖະບານນາມີເບຍໝົດຫົນທາງຕໍ່ສູ້ກັບໄພແລ້ງລະດັບຮຸນແຮງທີ່ສຸດໃນຮອບເກືອບສະຕະວັດ ໂດຍໄດ້ອະນຸມັດໃຫ້ມີການປະມູນຂາຍສັດປ່າຢ່າງໜ້ອຍ 1.000 ໂຕໃນພື້ນທີ່ປ່າຄຸ້ມຄອງເພື່ອປ້ອງກັນສັດຕາຍຈາກໄພອຶດຫິວ.

ສຳນັກຂ່າວຕ່າງປະເທດລາຍງານເມື່ອວັນທີ 18 ວ່າ ທ່ານ ໂຣມີໂອ ມູຢຸນດາ ລັດຖະມົນຕີວ່າການກະຊວງສິ່ງແວດລ້ອມຂອງສາທາ ລະນະລັດນາມີເບຍ ຊຶ່ງເປັນປະເທດທີ່ທຸກຍາກໃນທະວີບອາຟຣິກາໃຕ້ ມີປະຊາກອນປະມານ 2,4 ລ້ານຄົນ ໄດ້ຖະແຫຼງຢ່າງເປັນທາງການເມື່ອອາທິດທີ່ຜ່ານມາວ່າ ຄະນະລັດຖະມົນນາມີເບຍໄດ້ອະນຸມັດໃຫ້ມີການປະມູນຂາຍສັດປ່າຢ່າງໜ້ອຍ 1.000 ໂຕໃນເຂດພື້ນທີ່ປ່າຄຸ້ມຄອງຕ່າງໆທົ່ວປະເທດເນື່ອງຈາກນາມີເບຍຜະເຊີນໄພແຫ້ງແລ້ງໜັກສຸດໃນຮອບ 90 ປີ.

ການປະມູນຂາຍສັດປ່າຄັ້ງນີ້ມີເປົ້າໝາຍເພື່ອຈຳກັດການສູນເສຍຊີວິດຂອງສັດປ່າທີ່ອາດຕາຍຈາກໄພອຶດຫິວ ເນື່ອງຈາກໄພແລ້ງເຮັດໃຫ້ທົ່ງຫຍ້າທີ່ເປັນແຫຼ່ງອາຫານສັດເລີ່ມສູນຫາຍລົງເລື້ອຍໆ ລວມທັງຈຳນວນເງິນທີ່ໄດ້ຈາກການປະມູນຊຶ່ງຕັ້ງເປົ້າໄວ້ຢ່າງໜ້ອຍ 1,1 ລ້ານໂດລາທີ່ຈະຖືກນຳໃຊ້ເຂົ້າໃນການອະນຸຮັກສັກປ່າ ແລະ ບໍລິຫານຈັດການຜືນປ່າ ຫຼື ສະຖານທີ່ຕ່າງໆທີ່ຂາດແຄນງົບປະມານຢ່າງໜັກ.

ສັດປ່າທີ່ຈະຖືກປະມູນເປັນສັດປ່າທີ່ໃຊ້ໃນຟາມຜູ້ໃຫ້ບໍລິການເກມລ່າສັດ ລວມທັງຄວາຍປ່າປອດພະຍາດ 600 ໂຕ ຊ້າງ 28 ໂຕ ຢີ່ຣາຟ 60 ໂຕ ອິມພາລາ 20 ໂຕ ກວາງ 65 ໂຕ ແລະ ມະມັ່ງອາຟຣິກາສາຍພັນຕ່າງໆອີກຈຳນວນຫຼາຍ ຊຶ່ງລັດຖະບານໄດ້ລົງໂຄສະນາທາງໜັງສືພິມທ້ອງຖິ່ນເພື່ອປະຊາສຳພັນກ່ຽວກັບການປະມູນເມື່ອອາທິດທີ່ຜ່ານມາ.

ທັງນີ້ ລັດຖະບານນາມີເບຍຫາກໍ່ປະກາດພາວະໄພພິບັດແຫ່ງຊາດເມື່ອເດືອນທີ່ຜ່ານມາ ຫຼັງຈາກທີ່ສຳນັກງານອຸຕຸນິຍົມວິທະຍາແຫ່ງຊາດປະເມີນວ່າ ບາງພື້ນທີ່ຂອງປະເທດເກີດໄພແລ້ງທີ່ສຸດໃນຮອບ 90 ປີ ຊຶ່ງກ່ອນໜ້ານີ້ລັດຖະບານໄດ້ຮຽກຮ້ອງຂໍຄວາມຊ່ວຍເຫຼືອຈາກນາໆຊາດເພື່ອຕໍ່ສູ້ກັບໄພແລ້ງທີ່ສົ່ງຜົນກະທົບຕໍ່ປະຊາກອນຫຼາຍກວ່າ 500.000 ຄົນ ແລະ ເມື່ອເດືອນເມສາທີ່ຜ່ານມາລັດຖະບານກໍປະກາດຈັດສັນງົບປະມານທີ່ຍັງເຫຼືອພຽງ 39.000 ໂດລາເພື່ອບັນເທົາໄພແລ້ງໃນປີນີ້ ໂດຍຈະນຳເງິນໄປອຸດໜູນ ຊື້ອາຫານ ຈັດຫາຖັງເກັບນ້ຳສຳລັບຊາວກະສິກຳທີ່ທຸກຍາກ.

 

 

ຮຽບຮຽງ: ສະຫະລັດ ວອນທິວົງໄຊ

ຮູບພາບ: thairath

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.