ລັດຖະບານຍີ່ປຸ່ນກຽມອອກມາດຕະການກະຕຸ້ນເສດຖະກິດຄັ້ງໃຫຍ່

0
49

ຄະນະລັດຖະມົນຕີຍີ່ປຸ່ນອະນຸມັດມາດຕະການກະຕຸ້ນເສດຖະກິດຄັ້ງໃຫຍ່ທີ່ສຸດໃນຮອບ 3 ປີ ຊຶ່ງມີມູນຄ່າສູງກວ່າ 26 ລ້ານລ້ານເຢນ, ຄອບຄຸມທັງດ້ານອຸປະໂພກ-ບໍລິໂພກ, ການຫຼຸດຜົນກະທົບຈາກການຂຶ້ນພາສີຜູ້ບໍລິໂພກ ແລະ ຈາກສົງຄາມການຄ້າ.

ທ່ານ ຊິນໂຊະ ອາເບະ ນາຍົກລັດຖະມົນຕີຂອງຍີ່ປຸ່ນລະບຸວ່າ: ມາດຕະການກະຕຸ້ນເສດຖະກິດຄັ້ງໃຫຍ່ນີ້ກໍເພື່ອຊ່ວຍຮັບມືກັບຄວາມສ່ຽງຂອງເສດຖະກິດຂາລົງ, ນີ້ເປັນມາດຕະການກະຕຸ້ນເສດຖະກິດຂອງຍີ່ປຸ່ນຄັ້ງສຳຄັນໃນຮອບ 3 ປີ, ຈຸດປະສົງກໍເພື່ອເປັນງົບປະມານພິເສດສຳລັບການຟື້ນຟູບູລະນະຈາກເຫດໄພພິບັດທາງທຳມະຊາດທີ່ເກີດຂຶ້ນຫຼາຍຄັ້ງໃນປີນີ້.

ທັງນີ້ ກໍຖືເປັນການກຽມພ້ອມລ່ວງໜ້າຕໍ່ຄວາມສ່ຽງຈາກເສດຖະກິດທີ່ຢຸດນິ້ງຈາກຜົນກະທົບ ຂອງສົງຄາມການຄ້າລະຫວ່າງອາເມ ຣິກາ-ຈີນ ແລະ ການຂຶ້ນພາສີຜູ້ບໍລິໂພກຂອງຍີ່ປຸ່ນເມື່ອເດືອນຕຸລາຜ່ານມາ. ມາດຕະການກະຕຸ້ນເສດຖະກິດນີ້ນອກຈາກມີມູນຄ່າສູງແລ້ວຍັງຄອບຄຸມໃນຫຼາຍເລື່ອງດັ່ງນີ້:

ເສີມຄວາມໝັ້ນຄົງໂຄງສ້າງພື້ນຖານເຊັ່ນ: ຄູກັ້ນແມ່ນໍ້າສາຍຕ່າງໆ, ລະບົບໄຟຟ້າ ແລະ ນໍ້າປະປາໃຫ້ກັບສະຖານທີ່ບໍລິການຊຸມຊົນ ລວມທັງມີເງິນທຶນສຳລັບການນຳສາຍໄຟຟ້າລົງໃຕ້ດິນເນື່ອງຈາກເຫດພະຍຸໄຕ້ຝຸ່ນທີ່ເກີດຂຶ້ນເມື່ອບໍ່ດົນມານີ້ໄດ້ພັດທຳລາຍເສົາໄຟຟ້າຈຳນວນຫຼາຍຕົ້ນໃນຫຼາຍພື້ນທີ່ຊຶ່ງສົ່ງຜົນໃຫ້ເກີດເຫດໄຟຟ້າດັບ ແລະ ປະຊາຊົນໃນຫຼາຍພື້ນທີ່ໄດ້ຮັບຄວາມເດືອດຮ້ອນ.

ຮັບມືກັບການໃຊ້ຈ່າຍພາກສາທາລະນະ ທີ່ຄາດວ່າຈະມີການຫຼຸດລົງຢ່າງຫຼວງຫຼາຍຫຼັງຈາກສຳເລັດມະຫະກຳໂຕກຽມໂອລິມປິກ ແລະ ພາຣາລິມປິກໃນປີ 2020 ຊຶ່ງຈະບໍ່ມີໂຄງການໃຫຍ່ໆທີ່ຈະມາຊ່ວຍກະຕຸ້ນພາກເສດຖະກິດ.

ດ້ານກະສິກຳ  ລັດຖະບານຍີ່ປຸ່ນຈະໃຫ້ງົບປະມານຊ່ວຍເຫຼືອບັນດາຊາວກະສິກຳເພື່ອເພີ່ມການຜະລິດບໍ່ວ່າຈະເປັນຊີ້ນງົວ (ວາກິວ) ເພື່ອການສົ່ງອອກ, ຊຶ່ງມາດຕະການດັ່ງກ່າວກໍ ເພື່ອບັນເທົາຜົນກະທົບຈາກຂໍ້ຕົກລົງການຄ້າສະບັບໃໝ່ລະຫວ່າງຍີ່ປຸ່ນ-ອາເມຣິກາທີ່ຜ່ານການຮັບຮອງຂອງລັດຖະສະພາ, ຕາມຂໍ້ຕົກລົງນີ້ຍີ່ປຸ່ນຈະເປີດຕະຫຼາດໃຫ້ກັບສິນຄ້າກະສິກຳຂອງອາເມຣິກາ ແລະ ຫຼຸດພາສີຊີ້ນງົວ ແລະ ຊີ້ນໝູນຳເຂົ້າຈາກອາເມຣິກາເພື່ອແລກກັບການທີ່ອາເມຣິກາຈະຫຼຸດພາສີໃຫ້ກັບພາກການຜະລິດລົດ ແລະ ສິ້ນສ່ວນອາໄຫຼ່ຈາກຍີ່ປຸ່ນ.

ຊ່ວຍເຫຼືອ SMEs ສຳລັບທຸລະກິດຂະໜາດກາງ ແລະ ຂະໜາດນ້ອຍສາມາດເພີ່ມຄ່າຈ້າງ ໃຫ້ແກ່ບັນດາພະນັກງານທີ່ໄດ້ຮັບຄ່າແຮງຂັ້ນຕໍ່າ ແລະ ຊ່ວຍເຫຼືອຄົນໃນໄວ 30-40 ປີທີ່ຫາວຽກເຮັດງານທຳບໍ່ໄດ້ເພາະເສດຖະກິດຢູ່ໃນພາວະຢຸດນິ້ງ.

ດ້ານການສຶກສາ ຈັດຫາຄອມພິວເຕີ ແລະ ແທັບເລັດໃຫ້ພຽງພໍແກ່ການໃຊ້ງານຂອງນັກຮຽນຊັ້ນປະຖົມ ແລະ ມັດທະຍົມທຸກຄົນພາຍໃນປີງົບປະມານ 2023-2024.

ດ້ານເຕັກໂນໂລຊີ ສະໜັບສະໜູນບໍລິສັດຕ່າງໆໃນການພັດທະນາເຕັກໂນໂລຊີໄຮ້ສາຍ 5G.

ຫຼຸດຜົນກະທົບຄວາມຂັດແຍ່ງກັບ ສ.ເກົາຫຼີ ອາດມີການມອບເງິນອຸດໜູນແກ່ເມືອງສຶຊິມະຊຶ່ງເປັນແຫຼ່ງທ່ອງທ່ຽວທີ່ໂດ່ງດັງໃນກຸ່ມຊາວ ສ.ເກົາຫຼີ ຊຶ່ງກຳລັງຜະເຊີນກັບການຫຼຸດຈຳນວນລົງຂອງນັກທ່ອງທ່ຽວ, ເນື່ອງຈາກຄວາມຂັດແຍ່ງທາງການເມືອງ ແລະ ການຄ້າລະຫວ່າງຍີ່ປຸ່ນ ແລະ ສ.ເກົາຫຼີ.

ນອກຈາກນີ້ ຈະມີການໃຫ້ເງິນອຸດໜູນແກ່ຜູ້ທີ່ມີອາຍຸ 65 ປີຂຶ້ນໄປທີ່ຊື້ລົດໃຫຍ່ຕິດຕັ້ງເບຣກອັດຕະໂນມັດ ແລະ ອຸປະກອນເພື່ອຄວາມປອດໄພອື່ນໆເພື່ອຫຼຸດຈຳນວນອຸບັດເຫດຕາມທ້ອງຖະໜົນທີ່ມີສາເຫດມາຈາກຜູ້ຂັບຂີ່ອາຍຸສູງ. ທັງນີ້ ມາດຕະການກະຕຸ້ນເສດຖະກິດຂອງລັດຖະບານຍີ່ປຸ່ນຈະເປັນງົບປະມານພິເສດສຳລັບປີ 2019-2020.

 

ຮຽບຮຽງ: ເພັງສະຫວັນ

ຮູບພາບ: mgronline

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.