ລັດຖະບານຈີນປະຕິເສດຂໍ້ຮຽກຮ້ອງທັງໝົດຂອງກຸ່ມປະທ້ວງຮົງກົງ

0
1057

ສຳນັກຂ່າວກະບອກສຽງຂອງລັດຖະບານປັກກິ່ງຍົກລະດັບຄຳເຕືອນຕໍ່ຜູ້ປະທ້ວງຕໍ່ຕ້ານລັດຖະບານຮົງກົງໂດຍລະບຸວ່າ ແຜ່ນດິນໃຫຍ່ບໍ່ມີທາງຮັບຂໍ້ຮຽກຮ້ອງຕ່າງໆຂອງອີກຝ່າຍ ແລະ ເຕືອນວ່າ “ເມື່ອເຮືອນສົກກະປົກກໍຕ້ອງເຮັດຄວາມສະອາດ”.

ສະຖານີວິທະຍຸ-ໂທລະພາບກາງແຫ່ງ ສປ ຈີນ (CCTV) ແລະ ສຳນັກຂ່າວຊິນຫົວໄດ້ລາຍງານເປັນສຽງດຽວກັນວ່າ ສະຖານະການຊຸມນຸມປະທ້ວງໃນຮົງກົງຊຶງຍືດເຍື້ອແກ່ຍາວດົນກວ່າ 2 ເດືອນຖືເປັນໄພຄຸກຄາມຮ້າຍແຮງທີ່ສຸດຕໍ່ແຜ່ນດິນໃຫຍ່ ນັບແຕ່ອັງກິດສົ່ງມອບ ເກາະແຫ່ງນີ້ກັບຄືນເມື່ອວັນທີ 1 ກໍລະກົດ 1997 ແລະ ກຸ່ມຜູ້ປະທ້ວງຫົວຮຸນແຮງກຳລັງທຳລາຍຮົງກົງດ້ວຍການເຮັດໃຫ້ບ້ານເກີດເມືອງນອນຂອງຕົນເອງເກີດຄວາມວຸ້ນວາຍ ລາຍງານຂ່າວດຽວກັນລະບຸອີກວ່າ ຂໍ້ຮຽກຮ້ອງທັງໝົດຂອງກຸ່ມປະທ້ວງຈະບໍ່ໄດ້ຮັບການປານີປານອມ ເນື່ອງຈາກຈະຍິ່ງເປັນການກະຕຸ້ນຄວາມຮຸນແຮງ ແລະ ທຳລາຍຜົນປະໂຫຍດຂອງຮົງກົງເພີ່ມຫຼາຍຂຶ້ນ.

ທັງນີ້ ຂໍ້ຮຽກຮ້ອງສຳຄັນຂອງຝ່າຍຕໍ່ຕ້ານລັດຖະບານຮົງກົງຊຶ່ງລວມເຖິງການຍົກເລີກຮ່າງ ກົດໝາຍສົ່ງຜູ້ຮ້າຍຂ້າມແດນແບບຖາວອນ ໂດຍທ່ານ ນາງ ແຄຣຣີ ແລມ ຕ້ອງລາອອກ ຈາກຕຳແໜ່ງຫົວໜ້າຄະນະຜູ້ບໍລິຫານ (ການປະຕິຮູບ) ການປ່ອຍໂຕ ແລະ ຍົກເລີກ ດຳເນີນຄະດີກັບຜູ້ຊຸມນຸມທັງໝົດທີ່ຖືກຈັບ ແລະ ການຖອນຄຳເວົ້າທີ່ບໍ່ໃຊ້ໃນການເອີ້ນຜູ້ຊຸມນຸມວ່າ “ຜູ້ກໍ່ການຈະລາຈົນ” ແຕ່ວ່າ ທ່ານ ຫຍາງ ກວງ ໂຄສົກສຳນັກງານກິດຈະການຮົງກົງ ແລະ ມາເກົ໋າຂອງຄະນະມົນຕີແຫ່ງລັດ (HKMAO) ຊຶ່ງເປັນໜ່ວຍງານຂອງແຜ່ນດິນໃຫຍ່ທີ່ມີອຳນາດກຳກັບດູແລຄວາມສຳພັນດ້ານການເມືອງ ເສດຖະກິດ ແລະ ສັງຄົມ ລະຫວ່າງລັດຖະບານປັກກິ່ງ ຮົງກົງ ແລະ ມາເກົ໋າ ທັງນີ້ ໃນຖະແຫຼງການໄດ້ກ່າວວ່າ ພຶດຕິກຳຂອງກຸ່ມຜູ້ປະທ້ວງຕໍ່ຕ້ານລັດຖະບານຮົງກົງຖືເປັນ “ອາຊະຍາກຳທີ່ຮຸນແຮງ”  ແລະ ເປັນ “ສັນຍານເລີ່ມຕົ້ນຂອງການກໍ່ການຮ້າຍ”.

ຂະນະດຽວກັນ ສື່ຂອງລັດຖະບານປັກກິ່ງ ຫຼື ພັກຄອມມູນິດຈີນໄດ້ລາຍງານວ່າ ເມື່ອເຖິງເວລາທີ່ຕ້ອງຕໍ່ສູ້ ແລະ ຈັດການກັບກຸ່ມກໍ່ການຮ້າຍ ຜູ້ທີ່ເຮັດໜ້າທີ່ຈັດການຈະໃຊ້ໄມ້ອ່ອນບໍ່ໄດ້ ສະຖານະການໃນຮົງກົງໃນປັດຈຸບັນບໍ່ພຽງແຕ່ຮຸນແຮງແຕ່ຍິ່ງສ້າງຄວາມວຸ້ນ ວາຍຂຶ້ນເລື້ອຍໆ ຊຶ່ງເຫດການດັ່ງກ່າວຈະຍິ່ງສ້າງຄວາມເສື່ອມເສຍໃຫ້ກັບປະຫວັດສາດຂອງແຜ່ນດິນໃຫຍ່ ແລະ ຂັ້ນຕໍ່ໄປທີ່ຈະຕ້ອງດຳເນີນການກໍຄື “ການເຮັດຄວາມສະອາດ”.

ຢ່າງໃດກໍຕາມ ລາຍງານດັ່ງກ່າວໄດ້ຖືກເຜີຍແຜ່ຫຼັງຈາກທີ່ສື່ຂອງແຜ່ນດິນໃຫຍ່ທຸກແຫ່ງເຜີຍແຜ່ພາບຂະບວນລົດຫຸ້ມເກາະຂອງກອງກຳລັງເຈົ້າໜ້າທີ່ຕຳຫຼວດຕິດອາວຸດ (PAP) ເຄື່ອນຍ້າຍມາປັກຫຼັກຢູ່ທີ່ເມືອງເຊິນເຈີ້ນກົງກັນຂ້າມກັບຮົງກົງ ຂະນະທີ່ PAP ແມ່ນເປັນກອງກຳລັງທີ່ຜ່ານການຝຶກຝົນເພື່ອປາບປາມການຈະລາຈົນໂດຍກົງ ເມື່ອທຽບກັບກອງທັບປົດປ່ອຍປະຊາຊົນຈີນ ຫຼື PLA.

 

 

ຮຽບຮຽງ: ພ.ສະຫວັນ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.