ລັດຖະບານຈີນຈະມີມາດຕະການແນວໃດກັບຂີ້ເຫຍື້ອຈຳນວນມະຫາສານ…!!

0
177

ອ່າງຖີ້ມຂີ້ເຫຍື້ອຊຸນໂກວ ເມືອງຊີອານ ໃນມົນທົນສ່ານຊີ ຊຶ່ງມີຂະໜາດໃຫຍ່ເທົ່າກັບເດີ່ນເຕະບານຂະໜາດມາດຕະຖານ 100 ສະ ໜາມ, ຖືກອອກແບບມາໃຫ້ຮອງຮັບຂີ້ເຫຍື້ອ 2.500 ໂຕນຕໍ່ວັນ ແຕ່ປັດຈຸບັນມີຂີ້ເຫຍື້ອມາຖິ້ມຢູ່ອ່າງແຫ່ງນີ້ເຖິງ 10.000 ໂຕນຕໍ່ວັນ. ທັງນີ້ ອ່າງແຫ່ງນີ້ຖືກສ້າງຂຶ້ນເມື່ອປີ 1994 ແລະ ມີກຳນົດໃຊ້ງານໄປຈົນເຖິງປີ 2044.

ອ່າງຖີ້ມຂີ້ເຫຍື້ອແຫ່ງນີ້ສາມາດຮອງຮັບຂີ້ເຫຍື້ອຈາກປະຊາກອນກວ່າ 8 ລ້ານຄົນ ແລະ ຄວບຄຸມພື້ນທີ່ກວ້າງຂວາງ, ເລິກ 150 ແມັດ, ກ່ອນໜ້ານີ້ຊີອານເປັນພຽງບໍ່ເທົ່າໃດເມືອງໃນ ສປ ຈີນທີ່ຈັດການກັບຂີ້ເຫຍື້ອໃນຄົວເຮືອນດ້ວຍການສົ່ງໄປຖິ້ມຢູ່ອ່າງຖີ້ມຂີ້ເຫຍື້ອພຽງຢ່າງດຽວ, ເຮັດໃຫ້ພື້ນທີ່ນີ້ເຕັມກ່ອນກຳນົດເຖິງ 25 ປີ, ຊຶ່ງເມື່ອຕົ້ນເດືອນພະຈິກຜ່ານມາກໍໄດ້ມີການເປີດໂຮງເຜົາຂີ້ເຫຍື້ອແຫ່ງໃໝ່ ແລະ ຄາດວ່າຈະເປີດເພີ່ມອີກ 4 ແຫ່ງພາຍໃນປີ 2020 ຊຶ່ງຄາດວ່າໂຮງເຜົາຂີ້ເຫຍື້ອເຫຼົ່ານີ້ຈະຊ່ວຍກຳຈັດຂີ້ ເຫຍື້ອໄດ້ 12,750 ໂຕນຕໍ່ວັນ.

ນີ້ເປັນພຽງສ່ວນໜຶ່ງຂອງແຜນແຫ່ງຊາດໃນການຫຼຸດຈຳນວນອ່າງຂີ້ເຫຍື້ອ ແລະ ຫັນໄປໃຊ້ວິທີການກຳຈັດຂີ້ເຫຍື້ອແບບອື່ນແທນເຊັ່ນ: ການເຜົາ. ສ່ວນອ່າງຂີ້ເຫຍື້ອໃນເມືອງຊີອານ ແຫ່ງນີ້ໃນທີ່ສຸດກໍຈະກາຍເປັນອຸທິຍານນິເວດວິທະຍາ. ທັງນີ້ ລາຍງານສະຖິຕິປະຈຳປີຂອງ ຈີນເມື່ອປີ 2017 ໃຫ້ຮູ້ວ່າ: ຈີນເກັບຂີ້ເຫຍື້ອຕາມບ້ານເຮືອນໃນເຂດເມືອງໄດ້ 215 ລ້ານໂຕນ, ເພີ່ມຂຶ້ນຈາກເມື່ອ 10 ປີກ່ອນຊຶ່ງກັບໄດ້ 152 ລ້ານໂຕນ.

ປັດຈຸບັນ ສປ ຈີນ ມີອ່າງຖິ້ມຂີ້ເຫຍື້ອ 654 ແຫ່ງ ແລະ ມີໂຮງເຜົາຂີ້ເຫຍື້ອ 286 ແຫ່ງ, ແຕ່ຍັງບໍ່ມີຂໍ້ມູນທີ່ຊັດເຈນວ່າຈີນມີອັດ ຕາການນຳຂີ້ເຫຍື້ອຣີໄຊເຄິລກັບໄປໃຊ້ຄືນໃໝ່ໜ້ອຍ ຫຼາຍສໍ່າໃດ? ເພາະຍັງບໍ່ມີການເປີດເຜີຍກ່ຽວກັບເລື່ອງນີ້, ແຕ່ຈາກລາຍງານຂອງລັດຖະບານສະບັບໜຶ່ງໄດ້ລະບຸວ່າ: ຈີນມີແຜນທີ່ຈະຣີໄຊເຄິລຂີ້ເຫຍື້ອໃນເມືອງໃຫຍ່ໆໃຫ້ໄດ້ 35% ຂອງຂີ້ເຫຍື້ອທັງໝົດພາຍ ໃນປີ 2020.

ທັງນີ້, ເມື່ອປີ 2015 ທີ່ຜ່ານມາເກີດເຫດອ່າງຖີ້ມຂີ້ເຫຍື້ອຖະຫຼົ່ມໃນນະຄອນເຊີນເຈິນທາງໃຕ້ຂອງປະເທດ, ເຮັດໃຫ້ມີຜູ້ເສຍຊີວິດ 73 ລາຍ, ອ່າງເກັບຂີ້ເຫຍື້ອດັ່ງກ່າວຖືກອອກແບບໃຫ້ຮອງຮັບຂີ້ເຫຍື້ອ 4 ລ້ານແມັດກ້ອນ ແລະ ສູງບໍ່ເກີນ 95 ແມັດ, ຊຶ່ງໃນເວ ລາເກີດເຫດຖະຫຼົ່ມມີຂີ້ເຫຍື້ອຢູ່ອ່າງດັ່ງກ່າວປະມານ 5,8 ລ້ານແມັດກ້ອນ ແລະ ສູງເຖິງ 160 ແມັດ. ຢ່າງໃດກໍຕາມ ສປ ຈີນກໍເຄີຍຮັບຂີ້ເຫຍື້ອຈາກຕ່າງຊາດ, ຈົນມາຮອດທ້າຍປີ 2017 ຈີນໄດ້ຫ້າມການນຳເຂົ້າຂີ້ເຫຍື້ອລະດັບຊັ້ນຕ່າງໆ 24 ລະດັບ ແລະ ໃນປີ 2017 ພຽງປີດຽວ ສປ ຈີນຮັບຂີ້ເຫຍື້ອພລາສຕິກຈາກເອີຣົບ, ຍີ່ປຸ່ນ ແລະ ອາເມຣິກາລວມ 7 ລ້ານໂຕນ ແລະ ຮັບຂີ້ເຫຍື້ອເສດເຈ້ຍ 27 ລ້ານໂຕນ.

ສ່ວນປະເທດອື່ນໆເຊັ່ນ: ມາເລເຊຍ, ຟີລິບປິນ ແລະ ອິນໂດເນເຊຍ ຕ່າງກໍກະຕືລືລົ້ນຈັດການກັບບັນຫານີ້ເຊັ່ນກັນ. ທັງນີ້ ບັນດາປະເທດເຫຼົ່ານີ້ພະຍາຍາມຮັບມືກັບປະລິມານຂີ້ ເຫຍື້ອທີ່ສົ່ງເຂົ້າມາ, ຫຼາຍຄັ້ງທີ່ຖືກສົ່ງມາໃນປະລິມານມະຫາສານຈົນເກີນກວ່າທີ່ອ່າງຖີ້ມຂີ້ ເຫຍື້ອໃນປະເທດຈະຮອງຮັບໄດ້, ບາງປະເທດໄດ້ສັ່ງຫ້າມນຳເຂົ້າຂີ້ເຫຍື້ອບາງຊະນິດແລ້ວ ແລະ ມີການສົ່ງຂີ້ເຫຍື້ອກັບຄືນປະ ເທດຕົ້ນທາງອີກດ້ວຍ.

 

ຮຽບຮຽງ: ເພັງສະຫວັນ

ຮູບພາບ: bbc.com

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.