ຣັດເຊຍ-ຢູເອອີ ຍົກລະດັບຄວາມຮ່ວມມືທະວິພາຄີ

0
81

ລັດຖະບານຣັດເຊຍ ແລະ ສະຫະລັດອາຣັບເອມິເຣດລົງນາມຂໍ້ຕົກລົງຄວາມຮ່ວມມືທີ່ມີມູນຄ່າ 1.300 ລ້ານໂດລາໃນລະຫວ່າງທີ່ຜູ້ນຳຣັດເຊຍເດີນທາງຢ້ຽມຢາມຢ່າງເປັນທາງການ ຊຶ່ງຈະຄວບຄຸມຫຼາຍດ້ານລວມເຖິງພະລັງງານ.

ສຳນັກຂ່າວຕ່າງປະເທດລາຍງານຈາກນະຄອນອາບູດາບີ ປະເທດສະຫະລັດອາຣັບເອມິເຣດ (UAE) ໃນວັນທີ 16 ຕຸລາວ່າ ປະທາ ນາທິບໍດີ ວະລາດິເມຍ ປູຕິນ ໄດ້ເດີນທາງໄປຢ້ຽມຢາມ UAE ຊຶ່ງເປັນປະເທດທີສອງ ແລະ ປະເທດສຸດທ້າຍຂອງພາລະກິດເດີນສາຍຢ້ຽມຢາມກຸ່ມປະເທດໃນເຂດອ່າວອາຣັບ ຊຶ່ງຖືເປັນຄັ້ງທຳອິດໃນຮອບ 12 ປີຂອງຜູ້ນຳຣັດເຊຍ ຫຼື ນັບແຕ່ປີ 2007 ຕໍ່ຈາກຊາອຸດິດອາຣັບບີ ໂດຍເຈົ້າຊາຍ ໂມຮຳເໝັດ ບິນ ຊາເຢັດອັລ ນາຫຍານ ມົງກຸດຣາຊະກຸມານແຫ່ງອາບູດາບີຊົງໃຫ້ການຕ້ອນຮັບຜູ້ນຳຣັດເຊຍຢ່າງສົມກຽດ.

ທັງນີ້ ນອກເໜືອຈາກການກວດແຖວກອງທະຫານກຽດຕິຍົດ ແລະ ການປະຊຸມຮ່ວມກັນໃນລະດັບທະວີພາຄີແລ້ວ ທ່ານ ປູຕິນ ແລະ ມົງກຸດຣາຊະກຸມານ ກໍໄດ້ຮ່ວມເປັນສັກຂີພິຍານໃນພິທີລົງນາມບັນທຶກຄວາມເຂົ້າໃຈ (MOU)  6 ສະບັບ ຊຶ່ງຄວບຄຸມການຍົກລະດັບຄວາມຮ່ວມມືດ້ານພະລັງງານ ເຕັກໂນໂລຊີຂັ້ນສູງ ແລະ ການປະຕິຮູບຂະບວນການດ້ານສາທາລະນະສຸກ ຕະຫຼອດເຖິງການສະໜັບສະໜູນດ້ານອະວະກາດພາຍຫຼັງທີ່ ນັກບິນອະວະກາດຊາວ UAE ສ້າງປະຫວັດສາດເປັນຊາວຕາເວັນອອກກາງຄົນທຳອິດຊຶ່ງເດີນທາງຂຶ້ນສູ່ສະຖານີອະວະກາດນາໆຊາດ (ISS) ເມື່ອທ້າຍເດືອນຜ່ານມາ.

ອີກດ້ານໜຶ່ງກໍມີລາຍງານວ່າ ຂໍ້ຕົກລົງທັງໝົດມີມູນຄ່າລວມຫຼາຍກວ່າ 1.300 ລ້ານໂດລ ຂະນະທີ່ມູນຄ່າການຄ້າລະຫວ່າງທັງ ສອງປະເທດເມື່ອປີຜ່ານມາຢູ່ທີ່ 1.700 ລ້ານໂດລາ ດ້ານເຈົ້າຊາຍໂມຮຳເໝັດ ຊົງມີພຣະຣາຊະດຳຣັສວ່າ ການຢ້ຽມຢາມ UAE ຂອງຜູ້ນຳຣັດເຊຍໃນຄັ້ງນີ້ຖືເປັນປະຫວັດສາດທີ່ຈະຍົກລະດັບຄວາມສຳພັນລະຫວ່າງສອງປະເທດໃຫ້ເຂັ້ມແຂງ ແລະ UAE ຈະເດີນໜ້າໂຄງການຄວາມຮ່ວມມືກັບລັດຖະບານມົສກູເພື່ອຜົນປະໂຫຍດຂອງປະຊາຊົນທັງສອງປະເທດ ຂະນະທີ່ ທ່ານ ປູຕິນ ກໍໄດ້ກ່າວວ່າ UAE ຈະບໍ່ຜິດຫວັງທີ່ເປັນຫຸ້ນສ່ວນກັບຣັດເຊຍ.

 

 

 

 

ຮຽບຮຽງ: ເພັງສະຫວັນ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.