ມາຮູ້ຈັກກັບບາງພະຍາດທີ່ຕ້ອງລະວັງໃນລະດູໜາວ

0
313

ກ້າວເຂົ້າສູ່ລະດູໜາວສົ່ງຜົນໃຫ້ອາກາດເລີ່ມເຢັນລົງ ແລະ ບາງພື້ນທີ່ອາດມີສະພາບອາກາດເຢັນລົງແບບກະທັນຫັນ, ເຮັດໃຫ້ອຸນ ຫະພູມພາຍໃນຮ່າງກາຍຕ້ອງປັບປ່ຽນຢ່າງໄວວາເພື່ອຮັບກັບອຸນຫະພູມພາຍນອກ. ຈາກສະພາວະອາກາດດັ່ງກ່າວຈຶ່ງເຮັດໃຫ້ເຮົາໆທ່ານເກີດເປັນພະຍາດຕ່າງໆນາໆໄດ້ງ່າຍກວ່າປົກກະຕິ, ໂດຍສະເພາະກຸ່ມເດັກນ້ອຍ, ໄວໜຸ່ມ, ຄົນອາຍຸສູງ, ຄົນທີ່ກຳລັງເຈັບປ່ວຍ ແລະ ສຸຂະພາບບໍ່ແຂງແຮງເຫຼົ່ານີ້ເປັນຕົ້ນ.

ດັ່ງນັ້ນ, ເຮົາມາຕິດຕາມໄປພ້ອມໆກັນວ່າລະດູໜາວທີ່ກ້າວເຂົ້າມານີ້ຈະມີພະຍາດໃດແດ່ທີ່ສົ່ງຜົນຮ້າຍ ແລະ ເປັນອັນຕະລາຍຕໍ່ຄົນເຮົາ.

ໄຂ້ຫວັດ ພົບໄດ້ໃນທຸກລະດູການ, ແຕ່ໃນລະດູໜາວຈະເກີດຂຶ້ນ ຫຼື ເປັນໄດ້ງ່າຍກວ່າເຖິງ 2 ເທົ່າ, ເກີດຈາກເຊື້ອໄວຣັສທີ່ເຮັດໃຫ້ເກີດພະຍາດທາງເດີນຫາຍໃຈທີ່ພົບຫຼາຍກໍຄື: ເຊື້ອໄຣໂນໄວຣັສ, ສ່ວນອາການທີ່ພົບຫຼາຍກໍຄື: ຕັນດັງ, ນໍ້າມູກໄຫຼ, ໄອ, ຈາມ, ຄັນຄໍ, ເລີ່ມມີໄຂ້, ໜາວສັ່ນ, ປວດຫົວ ແລະ ປວດເມື່ອຍຕົນຕົວ.

ໄຂ້ຫວັດໃຫຍ່  ອາດຮຸນແຮງເຖິງຂັ້ນເສຍຊີວິດຊຶ່ງພະຍາດນີ້ເກີດຈາກການຕິດເຊື້ອຂອງລະບົບທາງເດີນຫາຍໃຈແບບກະທັນຫັນ, ສາເຫດແມ່ນເກີດຈາກເຊື້ອໄວຣັສອິນຟລູເອັນຊາ, ສ່ວນອາການທີ່ສະແດງແມ່ນໜາວສັ່ນ, ໄຂ້ຂຶ້ນສູງ, ເຈັບຄໍ, ປວດເມື່ອກ້າມຊີ້ນ ແລະ ປວດຫົວຮຸນແຮງ ລວມເຖິງອາດມີອາການປວດຮາກຮ່ວມນຳ.

ປອດບວມ ຄືພາວະປອດອັກເສບຈາກເຊື້ອແບັກທີເຣຍ ຫຼື ເຊື້ອໄວຣັສທີ່ມີຫຼາຍເກີນໄປຈົນເຮັດໃຫ້ມີໜອງ ແລະ ສານປົນເປື້ອນຊະນິດອື່ນໃນຖົງລົມ, ຊຶ່ງເຊື້ອມັກຈະຢູ່ໃນນໍ້າລາຍ, ຂີ້ກະເທິ, ສາມາດແຜ່ກະຈາຍເມື່ອເວລາໄອ ຫຼື ຈາມ ລວມທັງມີອາການແໜ້ນໜ້າເອິກຈົນຫາຍໃຈບໍ່ອອກ, ຕັນດັງ, ມີໄຂ້ຂຶ້ນສູງເກີນ 2 ມື້, ທັງນີ້ ພະຍາດປອດບວມມັກພົບຫຼັງຈາກການເປັນໄຂ້ຫວັດຊຳເຮື້ອ ຫຼື ໃນຄົນທີ່ເປັນຫອບຫືດ ແລະ ພົບຫຼາຍທີ່ສຸດໃນລະດູໜາວ ໂດຍສະເພາະກຸ່ມຄົນອາຍຸສູງ ແລະ ເດັກນ້ອຍອາຍຸລະຫວ່າງ 5-10 ປີ.

ຖອກທ້ອງ  ສ່ວນໃຫຍ່ມີສາເຫດມາຈາກເຊື້ອໂຣຕ້າໄວຣັສ ແລະ ມັກພົບໃນກຸ່ມເດັກອາຍຸຕໍ່າກວ່າ 5 ປີ, ເພາະກຳລັງເປັນໄວຮຽນຮູ້ຊຶ່ງມັກຢິບຈັບສິ່ງຂອງເຂົ້າປາກ, ພະຍາດນີ້ພົບຫຼາຍໃນຊ່ວງເດືອນຕຸລາ-ກຸມພາ, ອາກາດຂອງພະຍາດດັ່ງກ່າວແມ່ນຖ່າຍແຫຼວ, ມີໄຂ້ສູງ, ຮາກ, ກ້າມກົ້ນແດງ ແລະ ຖ້າຫາກອາການຮຸນແຮງອາດມີເລືອດ ຫຼື ມູກເລືອດປົນອອກມາເວລາຖ່າຍໜັກ.

ທັງນີ້ ໂດຍຜູ້ຊ່ຽວຊານສະເພາະທາງໄດ້ແນະນຳໃຫ້ດູແລຕົນເອງເປັນພິເສດ, ເຮັດໃຫ້ຮ່າງກາຍອົບອຸ່ນ, ໝັ່ນອອກກຳລັງກາຍສະໝໍ່າສະເໝີ, ກິນອາຫານທີ່ມີປະໂຫຍດຄົບ 5 ໝູ່, ຮັກສາຄວາມສະອາດ, ບໍ່ດື່ມແອລກໍຮອລ ແລະ ອື່ນໆທີ່ມີຄວາມສ່ຽງ. ທັງນີ້ ກໍເພື່ອໃຫ້ຮ່າງກາຍແຂງແຮງ, ສາມາດຕໍ່ສູ້ກັບພະຍາດຕ່າງໆ ລວມທັງພະຍາດແຊກຊ້ອນໄດ້ຢ່າງມີປະສິດທິພາບ.

 

ຮຽບຮຽງ: ເພັງສະຫວັນ

ຮູບພາບ: sanook.com

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.