ມາດຕະການລັດປາບ “ລັດຖະກອນຜີ”

0
5667

ອີງຕາມການລາຍງານຂ່າວຂອງໜັງສືພິມວຽງຈັນທາມເມື່ອບໍ່ດົນມານີ້ໃຫ້ຮູ້ວ່າ: ເຈົ້າໜ້າທີ່ຂັ້ນສູງກະຊວງພາຍໃນກຳລັງໃຫ້ຄວາມກະຈ່າງແຈ້ງກ່ຽວກັບຈຳນວນພະນັກງານລັດຖະກອນທ່າມກາງຄວາມກັງວົນຂອງປະຊາຊົນກ່ຽວກັບຄວາມເປັນໄປໄດ້ຂອງຕຳແໜ່ງ ທີ່ເອີ້ນວ່າ “ລັດຖະກອນຜີ”.

ທ່ານ ສຸວັນນີ ລັດຕະນະວົງ ຫົວໜ້າພະແນກຄຸ້ມຄອງລັດຖະກອນໄດ້ກ່າວວ່າ: “ຂະບວນການນີ້ແມ່ນພາກສ່ວນໜຶ່ງຂອງຂັ້ນຕອນຕ່າງໆເພື່ອຄົ້ນຫາຈຳນວນພະນັກງານລັດຖະກອນທີ່ແທ້ຈິງໃນລາວ”.

ກ່ອນທີ່ຈະຮັບບັດເຈົ້າໜ້າທີ່ໄດ້ໃຫ້ທຸກຄົນຢືນຕໍ່ແຖວ ແລະ ສະແດງຫຼັກຖານວ່າພວກເຂົາເປັນບຸກຄົນທີ່ມີຊື່ໃນບັດປະຈຳຕົວທີ່ໄດ້ຮັບການອອກແບບໃຫ້ເປັນບັດເອທີເອັມເພື່ອນຳໃຊ້ໃນການຖອນເງິນເດືອນ, ຜູ້ທີ່ມີລາຍຊື່ຕ້ອງມາຮັບບັດດ້ວຍຕົນເອງເທົ່ານັ້ນ, ບໍ່ອະນຸຍາດຄົນອື່ນຮັບບັດແທນ ນີ້ຖືວ່າເປັນອີກໜຶ່ງມາດຕະການເພື່ອປ້ອງກັນລະລັດຖະກອນຜີ.

ລັດຖະບານໄດ້ລິເລີ່ມການຈ່າຍເງິນເດືອນໃຫ້ພະນັກງານລັດຖະກອນຜ່ານການໂອນທະນາຄານໃນບາງປີທີ່ຜ່ານມາ, ເພື່ອເຮັດໃຫ້ຂັ້ນຕອນງ່າຍດາຍ. ແຕ່ບາງຄົນກໍສະແດງຄວາມກັງວົນວ່າຖ້າບໍ່ມີການກວດສອບກໍຈະເຮັດໃຫ້ຜູ້ທີ່ມີແຕ່ຊື່ຕຳແໜ່ງ, ແຕ່ບໍ່ມີໜ້າສາມາດສືບຕໍ່ຮັບເງິນເດືອນຕໍ່ໄປໄດ້.

ທ່ານ ສຸວັນນີ ກ່າວວ່າ: ໃນທຸກໆສາມເດືອນແຕ່ລະກະຊວງຕ້ອງໄດ້ສົ່ງຊື່ພະນັກງານລັດຖະກອນ ແລະ ເລັກບັນຊີທະນາຄານຂອງເຂົາເຈົ້າໃຫ້ລັດຖະບານກ່ອນທີ່ຈະໄດ້ຮັບເງິນເດືອນ ທ່ານຍັງກ່າວຕື່ມອີກວ່າ: ທີ່ຜ່ານມາຂະບວນການດັ່ງກ່າວກະຊວງພາຍໃນໄດ້ຢັ້ງຢືນຈຳນວນພະນັກງານລັດຖະກອນທີ່ລັດຖະບານຕ້ອງໄດ້ຈ່າຍເງິນເດືອນໃຫ້, ແຕ່ມັນບໍ່ໄດ້ພິສູດເຖິງການມີຕົວຕົນຂອງລັດຖະກອນແຕ່ລະຄົນ.

ແຕ່ວິທີການກຳນົດໃຫ້ລັດຖະກອນແຕ່ລະຄົນສະແດງຫຼັກຖານວ່າພວກເຂົາເປັນພະນັກງານລັດຖະກອນແທ້ຈິງຂອງບັດປະຈຳຕົວໃໝ່ທີ່ລັດຖະບານອອກໃຫ້ ຈະຊ່ວຍໃຫ້ລັດຖະບານກຳນົດໄດ້ວ່າພະນັກງານລັດຖະກອນຜູ້ທີ່ໄດ້ຮັບເງິນເດືອນຂອງລັດຕົວຕົນມີຢູ່ແທ້ ຫຼື ບໍ່?. ພະແນກດັ່ງກ່າວຍັງຈະຮຽກຮ້ອງໃຫ້ຂະແໜງການທີ່ກ່ຽວຂ້ອງພິຈາລະນາຄະດີ ແລະ ລົງໂທດຜູ້ກະທຳຜິດຕາມລະບຽບກົດ ໝາຍ.

ລັດຖະບານໄດ້ອະນຸຍາດໃຫ້ກະຊວງພາຍໃນເປັນຫຸ້ນສ່ວນກັບບໍລິສັດ Banque pour le Commerce Exterieur Public (BCEL) ອອກບັດປະຈຳຕົວໃໝ່ ໃຫ້ແກ່ພະນັກງານລັດຖະກອນໃນປີ 2018. ບັດດັ່ງກ່າວສາມາດໃຊ້ເພື່ອຖອນເງິນເດືອນຈາກຕູ້ ATM. ກະຊວງພາຍໃນໄດ້ຮັບອະນຸຍາດໃຫ້ແຈກບັດປະຈຳຕົວໃຫ້ກັບ 37 ອົງການຂອງລັດ ຂັ້ນສູນກາງ ຊຶ່ງເປັນສ່ວນໜຶ່ງຂອງຂະບວນການກວດກາຈຳນວນພະນັກງານລັດຖະກອນຄັ້ງທີສອງ.

ກະຊວງມີແຜນການແຈກບັດໃຫ້ 9 ໜ່ວຍງານຂອງລັດອີກ 9 ອົງການ ແລະ ແຈກບດປະຈຳຕົວໃຫ້ແກ່ພະນັກງານລັດຖະກອນໃນຕ່າງແຂວງໃນປີ 2020.

ຮຽບຮຽງຂ່າວ: ພຸດສະດີ ລາວລີ
ແຫຼ້ງຂໍ້ມູນ: www.vientianetimes.org.la
ຮູບປະກອບ: www.laogov.gov.la

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.