ມອບໜັງສືຮັບຮອງກົງສຸນໃຫ້ແກ່ກົງສຸນກິດຕິມະສັກແຫ່ງແຟັງລັງປະຈຳ ສປປ ລາວ

0
1139

ອີງຕາມການລາຍງານຂ່າວຈາກກະຊວງການຕ່າງປະເທດແຫ່ງ ສປປ ລາວ ໃນວັນທີ 9 ມັງກອນ 2020 ທີ່ລະບຸວ່າ: ກະຊວງການຕ່າງປະເທດໂດຍ ທ່ານ ທອງສະຫວັນ ພົມວິຫານ ຮອງລັດຖະມົນຕີ ກະຊວງການຕ່າງປະເທດໄດ້ໃຫ້ກຽດຕ້ອນຮັບ ແລະ ມອບໜັງສືຮັບຮອງກົງສຸນໃຫ້ແກ່ ທ່ານ ແກ້ວວີສຸກ ດາລາສານ ເປັນກົງສຸນກິດຕິມະສັກແຫ່ງແຟັງລັງປະຈຳ ສປປ ລາວ, ຊຶ່ງມີສຳນັກ ງານຕັ້ງຢູ່ນະຄອນຫຼວງວຽງຈັນ.

ໃນໂອກາດນີ້, ທ່ານຮອງລັດຖະມົນຕີກະຊວງການຕ່າງປະເທດກໍໄດ້ສະແດງຄວາມຊົມເຊີຍ ແລະ ອວຍພອນໃຫ້ຜູ້ທີ່ມາຮັບໜ້າທີ່ເປັນກົງສຸນກິດຕິມະສັກຄົນໃໝ່ຂອງຕ່າງປະເທດຈົ່ງປະສົບແຕ່ຜົນສຳເລັດໃນການປະຕິບັດໜ້າທີ່ອັນຊົງກຽດດັ່ງກ່າວ, ໃນຂະນະດຽວກັນ, ທ່ານຮອງລັດຖະມົນຕີກໍໄດ້ຢ້ຳຕື່ມວ່າ: ຕະຫຼອດໄລຍະການປະຕິບັດໜ້າທີ່ດັ່ງກ່າວ, ທ່ານກົງສຸນກິດຕິມະສັກຈະມີບົດ ບາດໃນການເປັນຂົວຕໍ່ອັນສຳຄັນໃນການສົ່ງເສີມ, ຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ “ລາວ-ແຟັງ ລັງ” ໃຫ້ມີບາດກ້າວຂະຫຍາຍຕົວຂຶ້ນໄປເລື້ອຍໆ, ເພື່ອນຳຜົນປະໂຫຍດມາສູ່ປະຊາຊົນສອງຊາດ. ພ້ອມນີ້ ກໍເປັນການປະກອບ ສ່ວນເຂົ້າໃນພາລະກິດສັນຕິພາບ, ມິດຕະພາບ ແລະ ການຮ່ວມມືເພື່ອການພັດທະນາໃນພາກພື້ນກໍຄືໃນໂລກ.

ທ່ານກົງສຸນກິດຕິມະສັກກໍໄດ້ສະແດງຄວາມຂອບໃຈຕໍ່ ທ່ານ ທອງສະຫວັນ ພົມວິຫານ ຮອງລັດຖະມົນຕີກະຊວງການຕ່າງປະເທດເປັນຢ່າງສູງທີ່ໄດ້ໃຫ້ກຽດຕ້ອນຮັບ ແລະ ການໂອ້ລົມໃນຄັ້ງນີ້. ພ້ອມທັງຢັ້ງຢືນວ່າຈະສົ່ງເສີມສາຍພົວພັນລະຫວ່າງສອງປະເທດໃຫ້ດີຂຶ້ນເລື້ອຍໆ.

 

ຮຽບຮຽງຂ່າວ: ພຸດສະດີ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.