ມອບເງິນຊົມເຊີຍໃຫ້ນັກກິລາ “ຄິກບ໋ອກຊິງ” ທີ່ຄວ້າຫຼຽນໃນຊີເກມຄັ້ງທີ 30

0
82

ເມື່ອວັນທີ 26 ທັນວາຜ່ານມາທີ່ຫ້ອງປະຊຸມຄະນະກຳມະການໂອແລັມປິກແຫ່ງຊາດລາວໄດ້ມີພິທີມອບຮັບເງິນຊົມເຊີຍໃຫ້ນັກກີລາຄິກບ໋ອກຊິງທີມຊາດລາວທີ່ສາມາດສ້າງຜົນງານໂດດເດັ່ນ ໂດຍຄວ້າໄດ້ 1 ຫຼຽນຄຳ ແລະ 3 ຫຼຽນທອງໃນການແຂ່ງຂັນຊີເກມຄັ້ງທີ 30 ທີ່ປະເທດຟີລິບປິນ.

ໂອກາດດັ່ງກ່າວໃຫ້ກຽດເຂົ້າຮ່ວມພິທີໂດຍ ທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກີລາ, ຮອງປະທານຄະນະກຳມະການໂອແລັມປິກແຫ່ງຊາດລາວ, ທ່ານ ສົມພູ ພົງສາ ຜູ້ຊ່ວຍລັດຖະມົນຕີ, ຮອງປະທານເລຂາທິການຄະນະກຳມະການໂອແລັມປິກແຫ່ງຊາດລາວ, ທ່ານ ສຸລີ ມີລາໄມ ຮັກສາການປະທານສະຫະພັນກິລາຄິກບ໋ອກຊິງແຫ່ງຊາດລາວ, ມີຄະນະຫະພັນ, ຄູຝຶກ, ນັກກິລາ ຜູ້ໃຫ້ການອຸປະຖຳ ແລະ ແຂກຖືກເຊີນເຂົ້າຮ່ວມ.

ກິລາຄິກບ໋ອກຊິງເປັນກີລາປະເພດໃໝ່ 1 ໃນ 25 ປະເພດກີລາທີ່ ສປປ ລາວ ເຮົາສົ່ງເຂົ້າຮ່ວມແຂ່ງຂັນຊີເກມຄັ້ງທີ 30, ແຕ່ກໍສາມາດສ້າງຜົນງານໄດ້ດີເກີນຄາດ, ໂດຍສາມາດຄວ້າມາໄດ້ 1 ຫຼຽນຄໍາ ແລະ 3 ຫຼຽນທອງ ໃນນັ້ນ 1 ຫຼຽນຄໍາເປັນຜົນງານຂອງ ທ້າວ ສຸກັນ ໄຕປັນຍາວົງ ຫຼື ນ້ອງໂອ ລຸ້ນນໍ້າໜັກ 60 ກີໂລກຣາມ ປະເພດ “Low kick” ສ່ວນອີກ 3 ຫຼຽນທອງເປັນຜົນງານຂອງນາງ ມາລາ ຈັນທະລັກສາ ລຸ້ນນ້ຳໜັກ 48 ກີໂລກຣາມ, ທ້າວ ພັນ ເຈືອງວັນເຮືອງ ລຸ້ນນ້ຳໜັກ 51 ກີໂລກຣາມ ແລະ ທ້າວ ໄພລັດ ທຳມະວົງສາ ລຸ້ນນ້ຳໜັກ 57 ກີໂລກຣາມ ໃນປະເພດ “Full contact”.

ຈາກຜົນງານດັ່ງກ່າວສົ່ງຜົນໃຫ້ທັບນັກກີລາທີມຊາດລາວຄ້ວາຫຼຽນມາໄດ້ທັງໝົດ 1 ຫຼຽນຄໍາ 5 ຫຼຽນເງິນ ແລະ 28 ຫຼຽນທອງ ລວມ 34 ຫຼຽນ ຈັດຢູ່ອັນດັບທີ 10 ຂອງຕາຕະລາງສະຫຼຸບຫຼຽນຊີເກມ. ດ້ວຍຜົນງານທີ່ໂດດເດັ່ນກໍມີຫຼາຍບໍລິສັດ, ຫ້າງຮ້ານ ແລະ ນິຕິບຸກຄົນ ໄດ້ແຈ້ງເຈດຈຳນົງມອບເງິນຊົມເຊີຍສະໜັບສະໜູນເພື່ອເປັນຂວັນກໍາລັງໃຈໃຫ້ແກ່ບັນດາຄູຝຶກ ແລະ ນັກກີລາ ລວມມູນຄ່າຫຼາຍກວ່າ 150 ລ້ານກີບ.

ໃນນັ້ນ ປະກອບມີບໍລິສັດ ຈະເລີນເຊກອງພະລັງງານ ຈຳກັດ 62 ລ້ານກີບ, ບໍລິສັດ ອາດີດາສ 20 ລ້ານກີບ, ບໍລິສັດ ລາວເດີມ ກຣຸບ 16 ລ້ານກີບ, ບໍລິສັດ ວົງສະຫວັນ ໂລຈິດຕິກ 13 ລ້ານກີບ, ທະນາຄານ ເອສທີແບງ 11 ລ້ານກີບ , ບໍລິສັດ ຈັນທະຫວິນ ຣີສອດ ແອນ ສະປາ 10 ລ້ານກີບ, ບໍລິສັດ ຊີສະຕາ 8,8 ລ້ານກີບ, ຮ້ານອາຫານ ອາຊໍ້ຫູສະຫຼາມ 8 ລ້ານກີບ, ບໍລິສັດ 3 ເອັສດີ ພັດທະທະນາ ຈຳກັດ 5 ລ້ານກີບ. ນອກນັ້ນ ທ່ານ ເຂັມຊາດ ພິລາພັນເດຊ ປະທານບໍລິສັດ ເຄພີ ຍັງໄດ້ມອບອຸປະກອນຝຶກຊ້ອມ ລວມມູນຄ່າ 3 ລ້ານກີບ.

 

ໂດຍ: ດອກຕາເວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.