ຟີລິບປິນພົບຜູ້ປ່ວຍໂປລິໂອຄົນທຳອິດໃນຮອບ 19 ປີ

0
33

ຟີລິບປິນພົບຜູ້ປ່ວຍພະຍາດໂປລິໂອລາຍທຳອິດໃນຮອບ 19 ປີ ພ້ອມນີ້ ກໍພົບເຊື້ອໃນລະບົບນໍ້າເປື້ອນຂອງເມືອງ ຂະນະທີ່ພາກລັດກ່າວວ່າເປັນຄວາມຜິດຂອງປະຊາຊົນບໍ່ເຂົ້າມາຮັບວັກແຊັງ ພ້ອມນີ້ ທາງການຟີລິບປິນກໍໄດ້ລະບຸເຖິງການພົບຜູ້ປ່ວຍພະຍາດດັ່ງກ່າວນັບແຕ່ອົງການອະນາໄມໂລກເຄີຍປະກາດວ່າຟີລິບປິນປັດສະຈາກການພົບຄົນປ່ວຍໂປລິໂອຄັ້ງຫຼ້າສຸດເມື່ອປີ 2000 ໂດຍຜູ້ປ່ວຍລາຍຫຼ້າສຸດທີ່ພົບເປັນເດັກຍິງອາຍຸ 3 ປີໃນແຂວງລາເນົາເດລຊູຣທາງໃຕ້ຂອງປະເທດ.

ນອກນີ້ ທາງການຟີລິບປິນຍັງເປີດເຜີຍອີກວ່າ ຈາກການສຸ່ມກວດຍັງພົບເຊື້ອໄວຣັສໂປລິໂອໃນລະບົບລະບາຍນໍ້າເປື້ອນໃນນະຄອນຫຼວງມະນິລາ ລວມເຖິງເສັ້ນທາງນໍ້າຂອງເມືອງດາເວົາຊຶ່ງເປັນເມືອງໃຫຍ່ທາງພາກໃຕ້ຂອງປະເທດອີກດ້ວຍ ຂະນະທີ່ກະຊວງສາທາ ລະນະສຸກຍັງກວດສອບຜູ້ຕ້ອງສົງໄສອີກຄົນໜຶ່ງທີ່ອາດເປັນຜູ້ປ່ວຍ ແຕ່ຍັງບໍ່ມີການເປີດເຜີຍເຖິງລາຍລະອຽດ.

ຕະຫຼອດຊ່ວງເວລາກວ່າ 30 ປີທີ່ຜ່ານມາ ທົ່ວໂລກໄດ້ເຂັ້ມງວດໃນການຕໍ່ສູ້ກັບພະຍາດໂປລິໂອ ຊຶ່ງພະຍາດດ່ັງກ່າວອາດນຳໄປສູ່ການເປັນອຳມະພາດ ຫຼື ອາດເຖິງຂັ້ນເສຍຊີວິດ ແລະ ຍັງບໍ່ມີວິທີປິ່ນປົວ ຊຶ່ງມີພຽງແຕ່ການໃຫ້ວັກແຊັງປ້ອງກັນເທົ່ານັ້ນ ທັງນີ້ ໃນປີຜ່ານມາຈາກຂໍ້ມູນຂອງອົງການອະນາໄມໂລກພົບວ່າ ທົ່ວໂລກມີຜູ້ປ່ວຍໂປລິໂອພຽງ 33 ຄົນເທົ່ານັ້ນ.

ທັງນີ້ ຂ່າວການພົບຜູ້ປ່ວຍໂປລິໂອຄັ້ງແລກໃນຮອບ 19 ປີນີ້ເກີດຂຶ້ນພາຍຫຼັງທີ່ຟີລິບປິນພົບການລະບາດຂອງພະຍາດອີ່ສຸກອີ່ໃສ ແລະ ໄຂ້ເລືອດອອກໃນຊ່ວງຕົ້ນປີຜ່ານມາ ຊຶ່ງມີຜູ້ເສຍຊີວິດກວ່າ 1 ພັນຄົນ ໂດຍທາງການໄດ້ລະບຸວ່າ ເນື່ອງມາຈາກຜູ້ປົກຄອງຈຳນວນຫຼາຍບໍ່ພາລູກຫຼານໄປຮັບການສີດວັກແຊັງອັນເນື່ອງມາຈາກຄວາມເຊື່ອແບບຜິດໆກ່ຽວກັບວັກແຊັງ.

ສຳລັບປະເດັນຄວາມບໍ່ເຊື່ອຖືໃນວັກຊີນຂອງປະຊາຊົນ ສ່ວນໜຶ່ງແມ່ນມາຈາກເມື່ອຊ່ວງປີ 2016 ຟີລິບປິນເປັນປະເທດທຳອິດທີ່ໄດ້ຮັບວັກແຊັງປ້ອງກັນໄຂ້ເລືອດອອກທີ່ມີຊື່ວ່າ Dengvaxia ກັບນັກຮຽນຫຼາຍແສນຄົນໂດຍບໍລິສັດຢາສັນຊາດຝຣັ່ງ ແຕ່ຫຼັງ ຈາກນັ້ນ 1 ປີກໍມີລາຍງານວ່າວັກແຊັງດ່ັງກ່າວເຮັດໃຫ້ຜູ້ຕິດເຊື້ອມີອາກາດຊຸດລົງ (ຫາກຜູ້ປ່ວຍບໍ່ເຄີຍຕິດເຊື້ອໄຂ້ເລືອດອອກມາ ກ່ອນ) ດັ່ງນັ້ນ ຈຶ່ງສົ່ງຜົນໃຫ້ຜູ້ປົກຄອງບາງຄົນຖິ້ມໂທດວ່າວັກແຊັງເຮັດໃຫ້ລູກຫຼານເສຍຊີວິດ ເຖິງແມ່ນວ່າຜົນການສືບສວນຈະບໍ່ພົບຫຼັກຖານທີ່ເຊື່ອມໂຍງກັບການເສຍຊີວິດກໍຕາມ.

ຢ່າງໃດກໍດີ ທາງການຟີລິບປິນຍັງລະບຸອີກວ່າ ເຊື້ອໂອລິໂອທີ່ກວດພົບທັງສາມເມືອງນັ້ນສາມາດປ້ອງກັນໄດ້້ດ້ວຍວັກແຊັງ ຊຶ່ງເປັນເຊື້ອຊະນິດດຽວກັບທີ່ເຄີຍກວດພົບຜູ້ປ່ວຍຄັ້ງຫຼ້າສຸດໃນຟີລິບປິນເມື່ອປີ 2001.

 

 

 

ຮຽບຮຽງ: ພ.ສະຫວັນ

ຮູບພາບ: posttoday

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.