ພົບການລະບາດຂອງເຊື້ອ HIV ໃນເດັກອາຍຸຕໍ່າກວ່າ 12 ປີຄັ້ງໃຫຍ່ສຸດໃນອາຊີ!!

0
130

ເດັກເກືອບ 900 ຄົນໃນເມືອງນ້ອຍໆແຫ່ງໜຶ່ງຂອງປະເທດປາກິສຖານຕິດເຊື້ອ HIV ໂດຍມີການພົບການລະບາດດັ່ງກ່າວເມື່ອເດືອນເມສາຜ່ານມາ, ຫຼັງຈາກແພດໃນພື້ນທີ່ຄົນໜຶ່ງພົບອາການຕ້ອງສົງໄສໃນເດັກທີ່ຖືກພາມາປິ່ນປົວທີ່ຄລີນິກຂອງລາວ.

ທັງນີ້ ແພດຄົນດັ່ງກ່າວໄດ້ແນະນຳໃຫ້ກວດຫາເຊື້ອ HIV ໃນເດັກເຫຼົ່ານັ້ນ ແລະ ໃນຊ່ວງເວລາພຽງ 8 ວັນກໍມີເດັກເກືອບ 1.000 ຄົນຖືກກວດພົບວ່າຕິດເຊື້ອ HIV, ເຫດການດັ່ງກ່າວກາຍເປັນການລະບາດຂອງເຊື້ອ HIV ຄັ້ງໃຫຍ່ສຸດຄັ້ງໜຶ່ງໃນປາກິສຖານ ແລະ ເປັນການລະບາດຂອງ HIV ຄັ້ງໃຫຍ່ທີ່ສຸດໃນກຸ່ມເດັກຂອງທະວີບອາຊີ.

ຂະນະທີ່ສູງກາງຂອງການລະບາດຊຶ່ງສິ່ງທີ່ໜ້າແປກໃຈກໍຄື: ເດັກສ່ວນໃຫຍ່ທີ່ຕິດເຊື້ອມີອາຍຸຕໍ່າກວ່າ 12 ປີ ແລະ ບໍ່ມີປະຫວັດວ່າຄົນໃນຄອບຄົວຕິດເຊື້ອ HIV, ໂດຍທີມຂ່າວ BBC ໄດ້ເດີນທາງໄປທີ່ເມືອຣາໂທເດີໂຣ (Ratodero) ສູນກາງຂອງການລະບາດທີ່ສູນສຸຂະພາບແຫ່ງໜຶ່ງເພື່ອຕິດຕາມເລື່ອງລາວດັ່ງກ່າວ.

ສ່ວນໂຕເລກທີ່ໜ້າສົນໃຈກ່ຽວກັບ HIV ຊຶ່ງເຈົ້າໜ້າທີ່ສາທາລະນະສຸກທີ່ພວມຜະເຊີນກັບແຮງກົດດັນຢ່າງໜັກ, ມີຄົນທີ່ໃຊ້ຊີວິດຮ່ວມກັບເຊື້ອ HIV ບໍ່ຮອດເຄິ່ງໜຶ່ງທີ່ຮູ້ຕົວວ່າ: “ເຂົາເຈົ້າມີເຊື້ອ”, ສ່ວນອົງການສະຫະປະຊາຊາດກໍໄດ້ລະບຸວ່າ: ຈຳນວນຜູ້ຕິດເຊື້ອເພີ່ມຂຶ້ນເກືອບ 2 ເທົ່າຈາກເມື່ອປີ 2010 ມາຢູ່ທີ່ 160.000 ຄົນ, ຂະນະທີ່ ຜູ້ອຳນວຍການຢູເອັນເອດ (UN Aids) ປະຈຳປາກິສຖານກ່າວວ່າ: ປາກິສຖານເປັນຮອງແຕ່ປະເທດຟີລິບປິນຊຶ່ງເປັນປະເທດໃນອາຊີທີ່ມີການລະບາດຂອງເຊື້ອ HIV ໄວທີ່ສຸດ.

ທັງນີ້, ສັນຍານເຕືອນກ່ຽວກັບ HIV ກໍບໍ່ໄດ້ເປັນສິ່ງທີ່ລັດຖະບານໃຫ້ຄວາມສຳຄັນເປັນອັນດັບທຳອິດ, ເຮັດໃຫ້ມີການຮັບມືກັບບັນຫານີ້ດ້ວຍຄວາມຫຼ້າຊ້າ, ຂະນະທີ່ລັດຖະມົນຕີກະຊວງສາທາລະນະສຸກຂອງປາກິສຖານຍອມຮັບວ່າ: ການລະບາດທີ່ເກີດຂຶ້ນໃນຕອນນີ້ເປັນສັນຍານເຕືອນສຳລັບລັດຖະບານ, ຄາດວ່າຍັງມີແພດທີ່ບໍ່ຜ່ານການຮັບຮອງປະມານ 600.000 ຄົນທີ່ປະກອບອາ ຊີບດັ່ງກ່າວແບບຜິດກົດໝາຍໃນປາກິສຖານ.

ເມື່ອເດືອນສິງຫາຜ່ານມາ ຜູ້ຊ່ວຍພິເສດດ້ານສາທາລະນະສຸກຂອງນາຍົກລັດຖະມົນຕີປາກິສຖານໄດ້ທະວິດຂໍ້ຄວາມວ່າ: ປາກິສຖານມີອັດຕາການສີດຢາຕໍ່ຫົວປະຊາກອນສູງທີ່ສຸດນໂລກ ແລະ 95% ຂອງການສີດຢາແມ່ນບໍ່ມີຄວາມຈຳເປັນ “ມັນເປັນປັດໄຈທີ່ມີສ່ວນເຮັດໃຫ້ເກີດການແຜ່ລະບາດຂອງເຊື້ອທີ່ຕິດຕໍ່ຜ່ານເລືອດໃນປາກິສຖານເຊັ່ນ: ໄວຣັສຕັບອັກເສບ C ແລະ HIV/ເອດ ຊຶ່ງພວກເຮົາກຳລັງເລັ່ງແກ້ໄຂບັນຫາດັ່ງກ່າວຢ່າງມີປະສິດທິພາບ”.

ສຳລັບສິ່ງທີ່ຄວນຮູ້ກໍຄື: ລັດຖະບານຊຶ່ງໄດ້ຮັບການຊ່ວຍເຫຼືອຈາກອົງກອນເອກະຊົນກຳລັງດຳເນີນຫຼາຍໂຄງການເພື່ອສ້າງຄວາມຮູ້ ແລະ ຄວາມເຂົ້າໃຈໃຫ້ແກ່ປະຊາຊົນທີ່ຢູ່ໃນກຸ່ມສ່ຽງຕິດເຊື້ອ HIV, ການມີເພດສຳພັນ (ນອກສົມລົດ) ແລະ ການມີເພດສຳພັນກັບຄົນເພດດຽວກັນ (ຮັກຮ່ວມເພດ) ຖືເປັນເລື່ອງທີ່ຜິດກົດໝາຍໃນປາກິສຖານ. ດັ່ງນັ້ນ ອົງກອນເອກະຊົນຈຶ່ງຕ້ອງເຮັດວຽກໂດຍບໍ່ໃຫ້ຕົກເປັນເປົ້າສາຍຕາ (ແບບລັບໆ) ແລະ ບໍ່ສາມາດທີ່ຈະເຂົ້າເຖິງປະຊາຊົນຈຳນວນຫຼາຍໄດ້.

ຂະນະທີ່ຄົນທີ່ຢູ່ໃນກຸ່ມສ່ຽງສູງຈະຮູ້ສຶກວ່າຕົນເອງບໍ່ໝັ້ນຄົງເພາະຖືເປັນເລື່ອງທີ່ທຸກຄົນຍັງບໍ່ໃຫ້ການຍອມຮັບ. ດັ່ງນັ້ນ ປະຊາຊົນໃນກຸ່ມນີ້ຈຶ່ງບໍ່ຕ້ອງການເຂົ້າຮັບການປິ່ນປົວເພາະຢ້ານວ່າຈະມີຄົນທີ່ຮູ້ຈັກ ແລະ ເປີດເຜີຍຄວາມລັບຂອງຕົນ “ເປັນເລື່ອງສຳຄັນທີ່ເຮົາຕ້ອງຮີບແກ້ໄຂບັນຫາການລະບາດດັ່ງກ່າວໃນແນວທາງທີ່ເໝາະສົມ ແລະ ຕ້ອງລົງມືເຮັດຢ່າງຮີບດ່ວນ, ການລະບາດໃນຄັ້ງຕໍ່ໄປກໍຈະທະວີຄວາມຮຸນແຮງຂຶ້ນຈົນເຖິງຂັ້ນບໍ່ສາມາດຄວບຄຸມໄດ້”.

 

 

ຮຽບຮຽງ: ເພັງສະຫວັນ

ຮູບພາບ: bbc.com/thai

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.