ພົບກັບສິນຄ້າກວ່າໜຶ່ງພັນລາຍການທີ່ສູນຝາກໂອດ໊ອບລາວ

0
2361

ເປີດຢ່າງເປັນທາງການແລ້ວສູນຝາກຂາຍໂອດ໊ອບລາວ NN/12 ເມື່ອວັນທີ 10 ທັນວາຜ່ານມາທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ, ໃຫ້ກຽດເປັນປະທານໂດຍ ຍາປ້າທອງວັນ ສີພັນດອນ ປະທານກິດຕິມະສັກສູນຝາກໂອດ໊ອບລາວ,​ ທ່ານ ນາງ ປານີ ກິນດາວົງ ຮອງຫົວໜ້າກົມຂະບວນການຊາວໜຸ່ມປະຊາຊົນ ປະຕິວັດລາວ, ທ່ານ ນາງ ອານິດ ສີວິໄຊ ປະທານສູນຝາກຂາຍໂອດ໊ອບລາວ ພ້ອມດ້ວຍແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂອກາດດັ່ງກ່າວ ທ່ານປະທານສູນຝາກໂອດ໊ອບລາວໄດ້ກ່າວວ່າ: ສູນຝາກຂາຍແຫ່ງນີ້ຖືເປັນສູນລວມຝາກຂາຍຜະລິດຕະພັນຫັດ ຖະກຳ ແລະ ກະສິກຳປຸງແຕ່ງຂອງຜູ້ປະກອບການຂະໜາດນ້ອຍ ຫຼື ແບບຄອບຄົວທີ່ຜະລິດຈາກພູມປັນຍາໂດຍນຳໃຊ້ວັດຖຸດິບພາຍໃນປະເທດເປັນຫຼັກ, ໂດຍສະເພາະແມ່ນຜະລິດຕະພັນປະເພດຈັກສານ, ຫັດຖະກຳຕໍ່າແຜ່ນ, ເຄື່ອງປັ້ນດິນເຜົາ, ເສື້ອຜ້າອາພອນ, ເຄື່ອງແກະສະຫຼັກ, ຢາພື້ນເມືອງ, ເຄື່ອງປ່າຂອງດົງ ແລະ ອື່ນໆ.

ສູນຝາກຂາຍໂອດ໊ອບສ້າງຕັ້ງຂຶ້ນເມື່ອເດືອນຕຸລາ 2017 ໂດຍຈຸດປະສົງກໍເພື່ອໃຫ້ບັນດາຜູ້ຜະລິດໄດ້ນຳເອົາສິນຄ້າຂອງຕົນມາວາງຈຳໜ່າຍ, ທັງເປັນການຊຸກຍູ້ສົ່ງເສີມຜະລິດຕະພັນຂອງຄົນລາວໃຫ້ມີຄວາມຍືນຍົງຢູ່ຄູ່ກັບລຸ້ນລູກຫຼານຕໍ່ໄປ. ປັດຈຸບັນ ສູນຝາກຂາຍໂອດ໊ອບລາວມີຜະລິດຕະພັນຂອງຜູ້ຜະລິດທີ່ມາວາງຈຳໜ່າຍປະມານ 1.450 ລາຍການ, ໃນນັ້ນ ເປັນສິນຄ້າໂອດ໊ອບ 50%.

ບັນດາທ່ານສາມາດເຂົ້າໄປຢ້ຽມຊົມ ຫຼື ອຸດໜູນສິນຄ້າສີມືຂອງຄົນລາວທີ່ຜະລິດໂດຍຄົນລາວຊຶ່ງສະຖານທີ່ແມ່ນຢູ່ຊັ້ນ 1 ຂອງສູນການຄ້າວຽງຈັນເຊັນເຕີ ນະຄອນຫຼວງວຽງຈັນ.

 

ໂດຍ: ດອກຕາເວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.