ພາລູູກໄປທ່ຽວງານບຸນ… ທ່ຽວແນວໃດໃຫ້ປອດໄພ?

0
202

ການໄດ້ໄປທ່ຽວນຳກັນແບບຄົບໜ້າຖ້ວນຕາພໍ່ແມ່ລູກນັ້ນເປັນຊ່ວງເວລາທີ່ອົບອຸ່ນ ແລະ ມີຄວາມສຸກໃນຄອບຄົວ, ແລ້ວມັນຍັງຊ່ວຍໃຫ້ລູກໄດ້ມີໂອກາດເຫັນສະພາບແວດລ້ອມພາຍນອກ, ໄດ້ມີການຮຽນຮູ້ໃນດ້ານຕ່າງໆຜ່ານສຳຜັດອິນຊີທັງ 5 ຊຶ່ງມັນເປັນສິ່ງຈຳເປັນຕໍ່ການຈະເລີນເຕີບໂຕຂອງເຂົາເຈົ້າ ແລະ ຍັງຊ່ວຍໃຫ້ລູກຂອງທ່ານມີຄວາມຊົງຈຳໃນໄວເດັກກັບພໍ່ແມ່ອີກດ້ວຍ. ແຕ່ການພາລູກອອກໄປທ່ຽວທາງນອກໃນແຕ່ລະຄັ້ງມັນລ້ວນມີຄວາມສ່ຽງ, ດັ່ງນັ້ນ ຜູ້ປົກຄອງກໍ່ຕ້ອງເອົາໃຈໃສ່ໃນຫຼາຍໆເລື່ອງ.

ໃນໄລຍະນີ້ເປັນຊ່ວງງານບຸນພຣະທາດຫຼວງ, ຊຶ່ງເປັນປາງບຸນໃຫຍ່ປະຈຳຊາດ, ຈັດຂຶ້ນພຽງປີລະຄັ້ງ ແລະ ທຸກປີກໍຈະມີຄົນຈາກທົ່ວປະເທດ ແລະ ລວມເຖິງແຂກຕ່າງຊາດເດີນທາງເຂົ້າມາທ່ຽວຊົມ ດັ່ງນັ້ນ,​ ວັນນີ້ລາວໂພສຈຶ່ງມີຄຳແນະນຳໃນການພາລູກໄປທ່ຽວງານບຸນ, ທ່ຽວແນວໃດໃຫ້ປອດໄພ?.

ຫາກຜູ້ປົກຄອງນຳເດັກນ້ອຍອາຍຸຕໍ່າກວ່າ 10 ປີໄປທ່ຽວງານບຸນນຳຕ້ອງກະກຽມດັ່ງຕໍ່ໄປນີ້:

  1. ກຽມເຄື່ອງໃຊ້ທີ່ຈຳເປັນສຳລັບເດັກນ້ອຍ (ນໍ້າດື່ມ, ເຕົ້ານົມ, ແພັມເພິດ, ຜ້າເຢັນ, ເຈວເຮັດຄວາມສະອາດມື, ຜ້າສະອາດ, ໝວກ, ຄັນຫົ່ມ ແລະ ອື່ນໆ.)
  2. ກຽມອາຫານຂອງເດັກ ເພາະອາຫານໃນງານບຸນບາງຄັ້ງລູກອາດຈະກິນບໍ່ໄດ້ ໂດຍສະເພາະເປັນເດັກອາຍຸຕໍ່າກວ່າ 2 ປີລົງໄປ ເພາະອາດສົ່ງຜົນແກ່ລະບົບຂັບຖ່າຍ ແລະ ລວມເຖິງຄວາມສະອາດຂອງອາຫານອາດບໍ່ສະອາດເທົ່າກັບທີ່ເຮົາກຽມໄປເອງ.
  3. ຜູ້ປົກຄອງຄວນຂຽນຊື່, ທີ່ຢູ່, ເບີໂທຕິດຕໍ່ໄປໄດ້ໃສ່ເຈ້ຍແລ້ວໃສ່ໃນກະເປົາເສື້ອໄວ້ໃຫ້ລູກ ເພື່ອກັນເວລາຫຼົງກັນຜູ້ທີ່ພົບເຫັນຈຶ່ງຈະສາມາດຕິດຕໍ່ຫາຜູ້ປົກຄອງເດັກໄດ້.
  4. ອຸ້ມລູກຍ່າງໃນບາງຄັ້ງຫາກທ່ານກັບລູກຢູ່ໃນບໍລິເວນຄົນແອອັດ.
  5. ຈັບມືລູກໄວ້ ຫຼື ຖ້າຫາກປ່ອຍລູກຫຼິ້ນເຄື່ອງຫຼິ້ນຢູ່ໃນງານກໍ່ຄວນເຝົ້າເບິ່ງລູກຢ່າໄດ້ເຜີເດັດຂາດ ເພື່ອຮັກສາຄວາມປອດໄພ ແລະ ລະວັງລູກຫາຍ.
  6. ຜູ້ເປັນພໍ່ແມ່ຕ້ອງຊ່ວຍກັນເບິ່ງແຍງລູກ, ຢ່າປ່ອຍໃຫ້ເປັນໜ້າທີ່ຂອງຝ່າຍໃດຝ່າຍໜຶ່ງ.
  7. ເມື່ອກໍລະນີເດັກພັດຫຼົງຈາກຕົວເອງ, ຜູ້ປົກຄອງຕ້ອງໄປທີ່ຈຸດປະກາດຫາຄົນຫາຍເພື່ອຂໍຄວາມຊ່ວຍເຫຼືອ.
  8. ຖ້າຜູ້ປົກຄອງທ່ານໃດມີລູກຍັງອາຍຸນ້ອຍກວ່າ 1 ປີລົງມາ, ດີແທ້ບໍ່ຄວນນຳລູກໄປສະຖານທີ່ແອອັດ ເພາະລູກຍັງນ້ອຍພູມຕ້ານທານຍັງຕ່ຳ, ອາດຕິດເຊື້ອພະຍາດທີ່ມາຈາກຄົນ,​ ສັດ ຫຼື ມາກັບອາກາດໄດ້ງ່າຍກວ່າເດັກທີ່ມີອາຍຸຫຼາຍແລ້ວ.

ສິ່ງທີ່ກ່າວມາຂ້າງເທິງນີ້ເປັນພຽງຄຳແນະນຳເບື້ອງຕົ້ນເທົ່ານັ້ນຜູ້ປົກຄອງບາງຄົນອາດເຄີຍປະຕິບັດຢ່າງເປັນເລື່ອງປົກກະຕິ, ແຕ່ສຳລັບຄົນທີ່ບໍ່ເຄີຍພາເດັກນ້ອຍອອກໄປທ່ຽວງານບຸນຈັກເທື່ອ ແລະ ບໍ່ຮູ້ວ່າຄວນເຮັດແນວໃດດີເມື່ອຕ້ອງພາເດັກນ້ອຍອອກໄປທ່ຽວນຳກໍສາມາດເອົາວິທີຂ້າງເທີງນີ້ໄປນຳໃຊ້ໄດ້.

ບົດໂດຍ: ພຸດສະດີ ລາວລີ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.