ພາກກາງ ແລະ ພາກເໜືອກຽມຮັບມືກັບພະຍຸໝູນເຂດຮ້ອນຕະຫຼອດເດືອນສິງຫາ

0
183

ກົມອຸຕຸນິຍົມ ແລະ ອຸທົກກະສາດ ຄາດຄະເນສະພາບອາກາດປະຈຳເດືອນສິງຫາ 2019 ວ່າ ໃນໄລຍະອາທິດທີ 1 ຂອງເດືອນ ສິງຫາ 2019 ຮ່ອງຄວາມກົດດັນອາກາດຕໍ່າຈະພາດຜ່ານພາກເໜືອ ແລະ ພາກກາງປ້ອງເຂົ້າໃສ່ພະຍຸໝູນເຂດຮ້ອນທີ່ກໍ່ຕົວຢູ່ເຂດທະເລຈີນໃຕ້ ພະຍຸຫົວນີ້ຈະເຄື່ອນທີ່ຜ່ານພາກເໜືອຂອງ ສສ ຫວຽດນາມ ແລະ ເຄື່ອນທີ່ຜ່ານພາກກາງຫາພາກເໜືອຂອງ ສປປ ລາວ ຊຶ່ງຈະເຮັດໃຫ້ມີຝົນຕົກໃນລະດັບປານກາງເຖິງໜັກ ພ້ອມມີລົມພັດແຮງຢູ່ຫຼາຍທ້ອງຖິ່ນ.

ແຕ່ໄລຍະອາທິດທີ 2 ຫາທີ 4 ຂອງເດືອນສິງຫາ 2019 ຮ່ອງຄວາມກົດດັນອາກາດຕໍ່າຈະສືບຕໍ່ພາດຜ່ານພາກເໜືອ ແລະ ພາກກາງຂອງລາວ ພ້ອມນີ້ ກະແສລົມມໍລະສຸມຕາເວັນຕົກສຽງໃຕ້ຈະພັດປົກຄຸມດ້ວຍກຳລັງປານກາງ ຊຶ່ງຈະເຮັດໃຫ້ມີຝົນຕົກລະດັບຄ່ອຍຫາປານກາງໃນແຕ່ລະພາກ ແລະ ຕົກໜັກຢູ່ບາງທ້ອງຖິ່ນແຂວງພາກເໜືອ ແລະ ພາກກາງຂອງປະເທດ.

ໄລຍະທ້າຍເດືອນ (ໄລຍະອາທິດທີ 5) ສິງຫາ 2019 ກະແສລົມມໍລະສຸມຈະພັດປົກຄຸມດ້ວຍກຳລັງອ່ອນຫາປານກາງ ຊຶ່ງຈະເຮັດໃຫ້ມີຝົນຕົກໃນລະດັບຄ່ອຍເປັນສ່ວນໃຫຍ່ ແລະ ຕົກປານກາງຢູ່ບາງທ້ອງຖິ່ນ.

ຄຳເຕືອນເພື່ອເຝົ້າລະວັງ ໃນໄລຍະຕົ້ນເດືອນສິງຫາ 2019 ຈະມີພະຍຸໝູນເຂດຮ້ອນພັດຜ່ານໃນເຂດພາກກາງ ແລະ ພາກເໜືອ ຊຶ່ງຈະເຮັດໃຫ້ມີຝົນຕົກໜັກ ແລະ ລົມພັດແຮງ ເຮັດໃຫ້ເກີດດິນເຈື່ອນ ແລະ ນໍ້າຖ້ວມຢູ່ບາງທ້ອງຖິ່ນແຂວງພາກເໜືອ ພາກກາງ ແລະ ພາກໃຕ້ ຈາກນັ້ນໃນຊ່ວງກາງເດືອນຫາທ້າຍເດືອນຈະມີຝົນຕົກຕິດຕໍ່ກັນຫຼາຍວັນຊຶ່ງຈະເຮັດໃຫ້ດິນອື່ມນໍ້າ ແລະ ເກີດດິນເຈື່ອນ ແລະ ນໍ້າຖ້ວມ ດັ່ງນັ້ນ ຈຶ່ງຂໍແຈ້ງເຕືອນເຖິງພໍ່ແມ່ປະຊາຊົນ ແລະ ອຳນາດການປົກຄອງທຸກພາກສ່ວນຄວນມີສະຕິລະ ມັດລະວັງຕໍ່ສະພາບລົມພັດແຮງ ດິນເຈື່ອນ ນໍ້າຖ້ວມ ແລະ ອື່ນໆ ພ້ອມທັງມີການວາງແຜນຮັບມືກັບສະພາບອາກາດຮ້າຍແຮງດັ່ງກ່າວທີ່ອາດຈະເກີດຂຶ້ນໃນໄລຍະເດືອນສິງຫານີ້ ສະເພາະຜູ້ທີ່ຈະເດີນທາງໂດຍທາງບົກ ແລະ ທາງອາກາດ ຂໍໃຫ້ກວດສອບສະພາບອາກາດທຸກຄັ້ງກ່ອນອອກເດີນທາງ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ກົມອຸຕຸນິຍົມ ແລະ ອຸທົກກະສາດ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.