ພະຍາດຊຶມເສົ້າເປັນແລ້ວຕ້ອງຮີບປິ່ນປົວໂດຍດ່ວນ!!

0
3564

ພະຍາດຊຶມເສົ້າເປັນພະຍາດທາງຈິດຕະເວດທີ່ຄຸກຄາມຄົນທົ່ວໂລກ ແລະ ອາການປ່່ວຍອາດຮຸນແຮງເຖິງຂັ້ນເຮັດໃຫ້ຄິດສັ້ນຂ້າຕົວຕາຍ ພະຍາດຊຶມເສົ້າ ຫຼື Major depressive disorder ເປັນພະຍາດທີ່ພົບຫຼາຍທີ່ສຸດ ຊຶ່ງຜູ້ປ່ວຍບໍ່ໄດ້ເປັນບ້າ ແລະ ບໍ່ໄດ້ເປັນຄົນບໍ່ດີ ແຕ່ເປັນຄົນທີ່ມີອາການປ່ວຍທາງອາລົມຢ່າງໜຶ່ງ ຊຶ່ງຕ້ອງການຮັບການປິ່ນປົວ ເພາະວ່າຖ້າຫາກປ່ອຍປະລະເລີຍອາການຂອງຜູ້ປ່ວຍອາດຮຸນແຮງເຖິງຂັ້ນຄິດຂ້າຕົວຕາຍ ອີງຕາມສະຖິຕິການສຳຫຼວດທີ່ລະບຸວ່າ ຜູ້ປ່ວຍພະຍາດຊຶມເສົ້າຈົບຊີວິດດ້ວຍການຂ້າຕົວຕາຍສຳເລັດຫຼາຍກວ່າຄົນທົ່ວໄປເຖິງ 20 ເທົ່າ.

ໂດຍທະນາຄານໂລກໄດ້ເຮັດວິໄຈຮ່ວມກັບມະຫາວິທະຍາໄລຮາຣວາດ ແລ້ວຄາດຄະເນວ່າ ໃນປີ 2020 ພະຍາດຊຶມເສົ້າຈະກາຍເປັນບັນຫາສາທາລະນະສຸກລະດັບໂລກຮອງຈາກພະຍາດຫົວໃຈຫຼອດເລືອດ ເນື່ອງຈາກປັດໄຈທາງເສດຖະກິດ ແລະ ສັງຄົມທີ່ກົດດັນການໃຊ້ຊີວິດຂອງມະນຸດຫຼາຍຂຶ້ນ.

ພະຍາດຊຶມເສົ້າແມ່ນຫຍັງ? ຄຳຕອບຄື ເປັນພະຍາດທາງຈິດຕະເວດປະເພດໜຶ່ງທີ່ເຮັດໃຫ້ຄົນປ່ວຍມີອາການປ່ວຍທັງຮ່າງກາຍ ແລະ ຈິດໃຈ ລວມເຖິງຄວາມຄິດ ຊຶ່ງອາການເຫຼົ່ານີ້ຈະສົ່ງຜົນກະທົບຕໍ່ການດຳເນີນຊີວິດປະຈຳວັນ ທັງເຮັດໃຫ້ຮູ້ສຶກວ່າຕົນເອງບໍ່ມີຄວາມສຸກ ມີແຕ່ຄວາມວິຕົກກັງວົນ ຈຶ່ງຕ້ອງໄດ້ຮັບການປິ່ນປົວໂດຍດ່ວນດ້ວຍການປຶກສາຈິດຕະແພດ.

ສ່ວນສາເຫດຂອງພະຍາດຊຶມເສົ້າ ອາດເກີດຈາກຄວາມຜິດປົກກະຕິຂອງສານເຄມີໃນສະ ໝອງທີ່ມີຊື່ວ່າ ເຊໂຣໂທນິນ (Serotonin) ມີປະລິມານຫຼຸດລົງ ເຮັດໃຫ້ຜູ້ປ່ວຍມີອາການປ່ວຍທັງຮ່າງກາຍ ແລະ ຈິດໃຈ ລວມເຖິງຄວາມຄິດ ທັງຮູ້ສຶກທໍ້ແທ້ ເຫງົາ ເບື່ອໜ່າຍ ບໍ່ມ່ວນຊື່ນກັບຊີວິດ ນອນບໍ່ຫຼັບ ມັກຕື່ນກາງເດິກ ຊຶ່ງອາການຕ່າງໆເຫຼົ່ານີ້ສົ່ງຜົນກະທົບໃຫ້ຄວາມສາມາດໃນການເຮັດວຽກຫຼຸດລົງ.

ນອກຈາກນີ້ ປັດໄຈທາງພັນທຸກຳກໍເປັນສ່ວນໜຶ່ງທີ່ເຮັດໃຫ້ເກີດພະຍາດຊຶມເສົ້າ ເພາະວ່າພະຍາດນີ້ສາມາດຖ່າຍທອດທາງພັນທຸກຳໄດ້ ແຕ່ກໍບໍ່ໄດ້ໝາຍຄວາມວ່າຫາກມີພີ່ນ້ອງເປັນແລ້ວເຮົາຈະເປັນ ເພາະມັນຕ້ອງຂຶ້ນຢູ່ກັບວ່າມີປັດໄຈດັ່ງທີ່ກ່າວມາຂ້າງເທິງມາກະ ຕຸ້ນ ຫຼື ບໍ່? ຢ່າງໃດກໍດີ ແມ່ຍິງມັກປະສົບກັບພາວະຊຶມເສົ້າຫຼາຍກວ່າຜູ້ຊາຍເຖິງ 70% ແລະ ສ່ວນໃຫຍ່ແມ່ນເລີ່ມເປັນເມື່ອຊ່ວງອາຍຸປະມານ 32 ປີ.

ອາການຂອງພະຍາດຊຶມເສົ້າ ໃນແຕ່ລະຄົນຈະບໍ່ຄືກັນ ແຕ່ສ່ວນໃຫຍ່ແລ້ວຈະເປັນໄປໃນລັກສະນະດັ່ງຕໍ່ໄປນີ້ ມີອາລົມຊຶມເສົ້າ (ໃນເດັກ ແລະ ໄວລຸ້ນອາດເປັນອາລົມຫງຸດຫງິດ) ຄວາມສົນໃຈ ຫຼື ຄວາມມ່ວນຊື່ນໃນກິດຈະກຳຕ່າງໆຫຼຸດລົງ ນໍ້າໜັກຫຼຸດ ຫຼື ເພີ່ມຂຶ້ນຜິດປົກກະຕິ ເບື່ອອາຫານ ແລະ ຈະເລີນອາຫານຜິດປົກກະຕິ ນອນບໍ່ຫຼັບ ຫຼື ຫຼັບຫຼາຍເກີນໄປ ກະວົນກະວາຍ ສັບສົນ ອ່ອນເພຍ ຮູ້ສຶກວ່າຕົນເອງໄຮ້ຄ່າ ສະມາທິສັ້ນ ໃຈລອຍ ຫຼື ລັງເລ ຖ້າອາການໜັກກໍມັກຈະຄິດເຖິງການຂ້າຕົວຕາຍ.

ທັງນີ້ ຜູ້ປ່ວຍທີ່ມີອາການຮຸນແຮງຕ້ອງລະວັງເພາະມີໂອກາດຄິດສັ້ນສູງກວ່າຄົນທົ່ວໄປຫາກວ່າມີເລື່ອງມາກະທົບຈິດໃຈ ຊຶ່ງຈາກສະຖິຕິພົບວ່າ ຜູ້ທີ່ຂ້າຕົວຕາຍຫຼາຍກວ່າ 60% ປ່ວຍເປັນພະຍາດຊຶມເສົ້າ ຢ່າງໃດກໍຕາມ ອາການເຫຼົ່ານີ້ຈະເກີດຂຶ້ນຫຼັງປ່ວຍມາໄດ້ດົນສ່ຳໃດແມ່ນຍັງບໍ່ສາມາດບອກ ຫຼື ລະບຸໄດ້ ເພາະໃນບາງລາຍແມ່ນປ່ວຍມາແລ້ວ 1-2 ປີຈຶ່ງສະແດງອາການໃຫ້ເຫັນ ແຕ່ບາງລາຍປ່ວຍພຽງແຕ່ 6 ເດືອນກໍຮູ້ຕົວ ແລະ ເຂົ້າຮັບການປິ່ນປົວໄດ້ທັນການ ແລະ ຫາຍດີໄດ້ ສຳລັບການປິ່ນປົວພະຍາດຊຶມເສົ້າແມ່ນມີຫຼາຍວິທີດັ່ງນີ້ ປິ່ນປົວດ້ວຍຢາ ປິ່ນປົວໂດຍບໍ່ໃຊ້ຢາ ປິ່ນປົວດ້ວຍໄຟຟ້າ (ECT, electroconvulsive therapy) ແລະ ວິທີອື່ນໆ.

ພ້ອມນີ້ ການເຂົ້າຮັບການປິ່ນປົວພະຍາດຊຶມເສົ້າຈະສາມາດຊ່ວຍໃຫ້ຮູ້ສຶກນອນຫຼັບພັກຜ່ອນໄດ້ຢ່າງສະບາຍ ຊີວິດຮັກດີຂຶ້ນ ຊ່ວຍບັນເທົາອາການເຈັບປວດ ເຮັດວຽກໄດ້ດີຂຶ້ນ ສະໝອງໄວ-ຄວາມຈຳດີຂຶ້ນ ແລະ ສົ່ງຜົນໃຫ້ຄອບຄົວມີຄວາມສຸກ ຂະນະທີ່ບົດບາດຂອງຄົນໃນຄອບຄົວກໍມີສ່ວນສຳຄັນໃນການປິ່ນປົວ ຊຶ່ງການໃຫ້ກຳລັງໃຈແກ່ຜູ້ປ່ວຍຈະຊ່ວຍໄດ້ເປັນຢ່າງດີ ເພາະວ່າຜູ້ປ່ວຍມັກຈະເບິ່ງໂລກໃນແງ່ຮ້າຍ ນອກຈາກນີ້ ຍັງຕ້ອງໃຫ້ກຳລັງໃຈຜູ້ປ່ວຍ ແລະ ໃຫ້ເຂົາເຈົ້າຮັບປະທານຢາສະໝ່ຳສະເໝີ ຊຶ່ງການທີ່ຢາອອກລິດຊ້າອາດຈະເຮັດໃຫ້ຜູ້ປ່ວຍຮູ້ສຶກວ່າຢາທີ່ໃຊ້ບໍ່ໄດ້ຜົນ.

ສຳລັບຜູ້ປ່ວຍທີ່ມີອາການຮຸນແຮງ ແລະ ມີຄວາມຄິດຂ້າຕົວຕາຍ ຄອບຄົວ ຫຼື ຍາດພີ່ນ້ອງຄວນເກັບສິ່ງທີ່ມີຄວາມສ່ຽງໃຫ້ເກີດການຂ້າຕົວຕາຍເຊັ່ນ ເຊືອກ ມີດ ມີດຕັດ ຢາຂ້າແມງໄມ້ ອາວຸດ ແລະ ຂອງມີຄົມຕ່າງໆ ພ້ອມນີ້ ກໍຕ້ອງຄອຍດູແລຜູ້ປ່ວຍຢ່າງໃກ້ຊິດເພື່ອໃຫ້ເຂົາເຈົ້າຮູ້ສຶກວ່າບໍ່ໄດ້ຢູ່ໂດດດ່ຽວ ແລະ ຢູ່ພຽງລຳພັງຄົນດຽວໃນໂລກນີ້.

 

 

 

 

ຮຽບຮຽງ: ພ.ສະຫວັນ

ຮູບພາບ: health.kapook

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.