ຜົນງານ ແລະ ຄຸນງາມຄວາມດີທີ່ຍິ່ງໃຫຍ່ຂອງປະທານ ສຸພານຸວົງ

0
1261

ໃນວັນທີ 8 ກໍລະກົດຜ່ານມາ ທ່ານ ນາງ ຍອດແກ້ວມະນີ ສຸພານຸວົງ ຮອງປະທານສູນກາງແນວລາວສ້າງຊາດ ໄດ້ເລົ່າຄືນເຖິງມູນເຊື້ອຜົນງານ ແລະ ຄຸນງາມຄວາມດີທີ່ຍິ່ງໃຫຍ່ຂອງປະທານ ສຸພານຸວົງ ເນື່ອງໃນໂອກາດວັນຄ້າຍວັນເກີດຄົບຮອບ 110 ປີ (13 ກໍລະກົດ 1909 – 13 ກໍລະກົດ 2019).

ທ່ານ ນາງ ຍອດແກ້ວມະນີ  ຊຶ່ງເປັນບຸດຄົນທີ 5 ຂອງປະທານ ສຸພານຸວົງ (ທັງໝົດມີ 10 ຄົນ ຍິງ 2 ຄົນ) ໄດ້ເລົ່າໂດຍມີບາງຕອນສຳຄັນວ່າ ຮູ້ສຶກເປັນກຽດ ແລະ ມີຄວາມພາກພູມໃຈທີ່ສຸດທີ່ໄດ້ເກີດເປັນລູກຂອງປະທານ ສຸພານຸວົງ ຊຶ່ງເປັນພໍ່ທີ່ດີມີຄວາມເອົາໃຈໃສ່ເບິ່ງແຍງຄອບຄົວ ຮັກຄອບຄົວ ຊ່ວຍວຽກຄອບຄົວ ເປັນຄົນເວົ້າແທ້ທຳຈິງ ດຸໝັ່ນຂະຫຍັນພຽນ ຊື່ສັດ ແລະ ມີຄວາມເສຍສະຫຼະສະເໝີຕົ້ນສະເໝີປາຍຕະຫຼອດມາ​.

​​ “ເປັນເວລາ 20 ກວ່າປີແລ້ວທີ່ພໍ່ໄດ້ຈາກໄປ​ ແຕ່ຄຸນງາມຄວາມດີທີ່ພໍ່ໄດ້ສ້າງໄວ້ ແລະ ຖະນຸຖະໜອມມາຕະຫຼອດທັງຊີວິດຈະຢູ່ໃນຄວາມຊົງຈຳຂອງລູກ-ຫຼານຕະຫຼອດຊົ່ວກາລະນານ” ທັງນີ້ ເພື່ອໃຫ້ລູກ-ຫຼານ ແລະ ຄົນລຸ້ນຫຼັງໄດ້ສຶກສາຄົ້ນຄວ້າຮ່ຳຮຽນ ແລະ ເອົາເປັນແບບຢ່າງບໍ່ວ່າຈະເປັນຄວາມຮັກຊາດອັນດູດດື່ມເລິກເຊິ່ງ ຄວາມເສຍສະຫຼະເພື່ອຊ່ວຍເຫຼືອປະຊາຊົນລາວບັນດາເຜົ່າ ປົກປັກຮັກສາຜືນແຜ່ນດິນລາວ ມີຄວາມຈົງຮັກພັກດີສະເໝີຕົ້ນສະເໝີປາຍ ມີແນວຄິດມັກສຶກສາຄົ້ນຄວ້າຮ່ຳຮຽນສະແຫວງຫາຄວາມຮູ້ ຄວາມກ້າວໜ້າຢູ່ຕະຫຼອດເວລາ ບໍ່ອວດອົ່ງທະນົງຕົວ ບໍ່ເຄີຍຖືໂຕສູງເໜືອຄົນອື່ນ ມີຄວາມຊື່ສັດຊື່ກົງ ບໍ່ເຄີຍສໍ້ລາດບັງຫຼວງ ແລະ ບໍ່ເຄີຍຖືກຊື້ຈ້າງ ທຸກຢ່າງແມ່ນເຮັດດ້ວຍຕົນເອງ ເພິ່ງຕົນເອງ ແລະ ກຸ້ມຕົນເອງ.

ທ່ານ ນາງ ຍອດແກ້ວມະນີ ຍັງໄດ້ເລົ່ງເຖິງຜົນງານທີ່ຍິ່ງໃຫຍ່ຂອງປະທານ ສຸພານຸວົງ ໃນໄລຍະການປະຕິວັດ ຊຶ່ງທ່ານໄດ້ສຸມສະຕິປັນຍາເຫື່ອແຮງເພື່ອຊີ້ນໍາຂະບວນການປະຕິວັດລາວ ຍາດເອົາໄຊຊະນະອັນຍິ່ງໃຫຍ່ມາສູ່ປະເທດຊາດ ຊື່ສຽງປະທານ ສຸພານຸວົງ ໄດ້ພົ້ນເດັ່ນຂຶ້ນໃນຂະນະທີ່ໄດ້ເປັນນັກຮົບຮັກຊາດລຸ້ນທຳອິດທີ່ໄດ້ເອົາຊີວິດຜູກພັນກັບການປະຕິວັດຕະຫຼອດມາໂດຍບໍ່ຫວັ່ນໄຫວຕໍ່ກັບຄວາມຫຍຸ້ງຍາກລຳບາກ ມີຄວາມເສຍສະຫຼະ ບໍ່ຫວາດຫວັ່ນຕໍ່ການຈັບກຸມຄຸມຂັງຂອງສັດຕູ ຍາມໃດກໍຕໍ່ສູ້ເພື່ອອຸດົມຄະຕິປະຕິວັດອັນສູງສົ່ງເພື່ອຄວາມເປັນເອກະລາດ ວັດທະນາຖາວອນ ເພື່ອອິດສະຫຼະພາບ ແລະ ຄວາມຢູ່ດີກິນດີຂອງປະຊາຊົນ.

ຫຼັງຈາກປະເທດຊາດໄດ້ຮັບການປົດປ່ອຍປີ 1975-1995 ປະທານ ສຸພານຸວົງ ໄດ້ນຳພາປະຊາຊົນລາວຜ່ານຜ່າອຸປະສັກຕ່າງໆໃນໄລຍະຂ້າມຜ່ານ ນຳພາປະຊາຊົນດຳເນີນພາລະກິດປ່ຽນແປງໃໝ່ ແລະ ນຳພາປະຊາຊົນສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງເທື່ອລະກ້າວ.

 

 

ໂດຍ: ສະຫະລັດ ວອນທິວົງໄຊ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.