ປ່ຽນຂີ້ເຫຍື້ອໃຫ້ເປັນສິນຄ້າ ຫຼຸດບັນຫາຂີ້ເຫຍື້ອພລາສຕິກ ແລະ ສ້າງອາຊີບໄປພ້ອມກັນ

0
71

ບັນຫາຂີ້ເຫຍື້ອໂດຍປະເພດຖົງຢາງກຳລັງໄດ້ຮັບຄວາມຈົນໃຈໃນຫຼາຍປະເທດທົ່ວໂລກ ຊຶ່ງແຕ່ລະປະເທດກໍໄດ້ມີນະໂຍບາຍໃນການຈັດການທີ່ແຕກຕ່າງກັນເຊັ່ນ ປະຕິເສດການຮັບຖົງຢາງເວລາໄປຊື້ເຄື່ອງ ໃຊ້ຖົງຢາງເທື່ອດຽວ ບໍ່ຖິ້ມຂີ້ເຫຍື້ອຊະຊາຍ ແລະ ວິທີ  ອື່ນໆ.

ສຳລັບໃນ ສປປ ລາວ ກໍມີຫຼາຍໂຄງການ ຫຼາຍກິດຈະກຳທີ່ຈັດຂຶ້ນເພື່ອປຸກລະດົມກ່ຽວກັບຂີ້ເຫຍື້ອພລາສຕິກ ແຕ່ຫຼາຍທ່ານອາດ ຈະຍັງບໍ່ເຄີຍຮູ້ວ່າມີແມ່ຍິງຄົນໜຶ່ງຊື່ວ່າ ນາງ ພຸດສະດີ ລາວ (ປັອກ) ປັດຈຸບັນກຳລັງນຳຖົງຢາງມາແປຮູບເປັນເຄື່ອງໃຊ້ໃນຊີວິດປະຈຳວັນ ນອກຈາກຖົງຢາງແລ້ວຍັງໃຊ້ຝາຕຸກນໍ້າ ກ້ອນຫີນ ຜ້າເສດເຫຼືອຈາກການຕັດເຄື່ອງນຸ່ງມາແປຮູບເປັນສິນຄ້າສ້າງມູນຄ່າເພີ່ມ.

ນາງ ພຸດສະດີ ໄດ້ໃຫ້ສຳພາດກັບທາງລາວໂພສວ່າ ແຮງບັນດານໃຈທີ່ເຮັດໃຫ້ຄິດນຳເອົາສິ່ງເຫຼົ່ານີ້ມາປະດິດເປັນສິນຄ້າ ໂດຍສະ ເພາະການນຳຖົງຢາງ ແລະ ກ້ອນຫີນ ແມ່ນເກີດຈາກ 2 ປັດໄຈຄື 1. ເພື່ອຫຼຸດບັນຫາຂີ້ເຫຍື້ອປະເພດພລາສຕິກ 2. ເພື່ອຊ່ວຍໃຫ້ຄົນທີ່ບໍ່ມີເງິນລົງທຶນສາມາດສ້າງຜະລິດຕະພັນເພື່ອນຳໄປຂາຍ ແລະ ສ້າງອາຊີບສ້າງລາຍຮັບໄດ້.

ພຸດສະດີ ໄດ້ໃຫ້ຂໍ້ຄິດວ່າ ການທີ່ເຮົາໆທ່ານໆປະຕິເສດບໍ່ໃຊ້ຖົງພລາສຕິກໃນເວລາຊື້ເຄື່ອງໃນຮ້ານຄ້າ ຫຼື ຫ້າງສັບພະສິນຄ້າ ແລະ ອື່ານໆ ແລ້ວຫັນມາໃສ່ຖົງຜ້າແທນນັ້ນມັນກໍຍັງບໍ່ຕອບໂຈດໃນການແກ້ໄຂບັນຫາພລາສຕິກໄດ້ເທົ່າທີ່ຄວນ ຍ້ອນວ່າວິທີນັ້ນມັນເປັນພຽງການປະຕິເສດພລາສຕິກພຽງຖົງດຽວ ແຕ່ທ່ານລືມຄິດໄປວ່າສິນຄ້າໃນຖົງຜ້າຂອງທ່ານກໍມີພລາສຕິກຫຸ້ມຫໍ່ຢູ່ເຊັ່ນກັນດັ່ງນັ້ນ ພຸດສະດີຈຶ່ງຄິດວ່າຖ້າສາມາດເອົາຖົງພລາສຕິກທີ່ມາຈາກການຫຸ້ມຫໍ່ນັ້ນມາແປຮູບເປັນເຄື່ອງໃຊ້ໄດ້ກໍຄົງຈະສາມາດຊ່ວຍຢືດເວລາອັດຕາການເພີ່ມຂຶ້ນຂອງປະລິມານຖົງພລາສຕິກໃຫ້ກາຍເປັນຂີ້ເຫຍື້ອດົນອອກໄປອີກ ນອກຈາກນີ້ ຍັງເປັນວັດຖຸດິບທີ່ມີຫຼາຍ ແລະ ລາຄາບໍ່ແພງ ເໝາະກັບຄົນທີ່ມີຕົ້ນທຶນໜ້ອຍສຳລັບການລົງທຶນ ແລະ ຍັງໄດ້ຜະລິດຕະພັນທີ່ແຕກຕ່າງບໍ່ຄືໃຜໄດ້ອີກດ້ວຍ.

ສຳລັບກ້ອນຫີນແມ່ນເກີດຈາກແນວຄິດຢາກຊ່ວຍຄົນພິການ ຄົນທຸກຍາກ ຜູ້ບໍມີເງິນຊື້ຜ້າລາຄາແພງ ວັດຖຸດິບລາຄາແພງມາໃຊ້ປະກອບໃນການປະດິດສິນຄ້າ ເນື່ອງຈາກກ້ອນຫີນເປັນສິ່ງທີ່ຫາງ່າຍ ສະເລ່ຍຖ້າລົງທຶນກ້ອນກີນໜຶ່ງລົດຈະສາມາດສ້າງຜະລິດຕະ ພັນໄດ້ຈຳນວນຫຼາຍ ແລະ ຂາຍກໍໄດ້ກຳໄລງາມ ພຽງແຕ່ທ່ານຕ້ອງໃສ່ຄວາມຄິດສ້າງສັນຮ່ວມກັບການອອກແບບ ເຮັດໃຫ້ສິນຄ້າໂດດເດັ່ນ ແລະ ໃຊ້ໄດ້ແທ້ໃນຊີວິດປະຈຳວັນ.

ຜະລິດຕະພັນທີ່ຜະລິດອອກຂາຍມີປະເພດ ພວງກະແຈທີ່ເຮັດຈາກຝາຕຸກນໍ້າ ຖົງຢາງເກົ່າ ແລະ ເຈ້ຍເກົ່າ ໂມງກ້ອນຫີນ ແນວຮອງຈອກທີ່ເຮັດຈາກຖົງຢາງເກົ່າ ແລະ ກ້ອນຫີນ ຖົງໃສ່ບິກທີ່ຫຍິບຈາກຜ້າຕັດເສື້ອເສດເຫຼືອ ແລະ ຈາກເປົ໋າເກົ່າ ແນວຂັ້ນໜັງສືເຮັດຈາກຖົງຢາງເກົ່າ ປັດຈຸບັນ ພຸດສະດີ ຍັງຄິດຄົ້ນນໍ້າຫອມປັບອາກາດອໍແກນິກທີ່ມີກິ່ນກາເຟ ແລະ ກິ່ນໝາກຂີ້ຫູດ ໂດຍມີ ການອອກແບບຫຸ້ມຫໍ່ໃຫ້ສວຍງາມໜ້າຊົມໃຊ້ ແລະ ລາຄາກໍບໍ່ແພງ ຕະຫຼາດຈຳໜ່າຍສ່ວນໃຫຍ່ໃນປັດຈຸບັນແມ່ນການສັ່ງຊື້ຈາກລູກຄ້າ ເຮັດຕາມອໍເດີ້ ລູກຄ້າກໍຈະເປັນກຸ່ມຊາວຕ່າງຊາດ ທັງນີ້ ຍັງບໍ່ໄດ້ວາງຂາຍຕາມຮ້ານໃດໆ ແຕ່ອະນາຄົດກໍມີແຜນຈະເຈາະຕະຫຼາດຫັດຖະກຳ.

ນອກຈາກນີ້ ພຸດສະດີ ຍັງມີແຜນຈະນຳຜະລິດຕະພັນທັງໝົດໄປຈັດສະແດງໃນງານວັນແມ່ຍິງແຫ່ງຊາດ ສືບສານຄວາມຝັນແມ່ຍິງຜູ້ດ້ອຍໂອກາດ ຄັ້ງວັນທີ 19-21 ກໍລະກົດ 2019 ທີ່ສູນການຄ້າວິວມໍ ບັນດາທ່ານສາມາດເຂົ້າມາຊົມຜະລິດຕະພັນທັງໝົດ ພ້ອມພົບປະສົນທະນາແລກປ່ຽນແນວຄວາມຄິດກັບເຈົ້າຂອງຜະລິດຕະພັນໄດ້ໃນງານ.

ບົດໂດຍ: ບຸດສະດີ ສາຍນໍ້າມັດ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.