ປະທານສະຫະພັນກີລາເປຕັງ (ໝາກບູນ) ອອກມາເວົ້າກ່ຽວກັບກໍລະນີມອບຂັນລາງວັນໃຫ້ແກ່ທີມຊາດລາວ

0
34939

ທ່ານປະທານສະຫະພັນກີລາເປຕັງສາກົນໄດ້ໂອ້ລົມກັບສຳນັກຂ່າວຂອງ “ລາວທຽນ ທາມ” ເພື່ອຊີ້ແຈງເຫດການມອບຂັນລາງວັນ. ເຫດການອັນໜ້າປະຫຼາດໃຈດັ່ງກ່າວທີ່ໄດ້ເກີດເປັນກະແສເທິງໂລກໂຊ ຊຽວຂອງ ສປປ ລາວ ແມ່ນຜົນມາຈາກຄວາມເຂົ້າໃຈຜິດ ແລະ ການປ່ຽນແປງກະທັນຫັນໃນຕາຕະ ລາງວາລະການມອບຫຼຽນລາງວັນຂອງເຈົ້າພາບຈັດງານ.

ທ່ານ ຄຣອດ ອາເຊມາ, ປະທານສະຫະພັນກີລາເປຕັງສາກົນ ຫຼື ເອິ້ນວ່າ: Federation Internationale de Petanque et Jeu Provencal (FIPJP) ໃນພາສາຝຣັ່ງ, ໄດ້ມອບຫຼຽນລາງວັນໃຫ້ແກ່ບັນດາທີມທີ່ຊະນະເລີດໃນງານປິດກີລາເປຕັງຊິງແຊັມໂລກທີ່ຈັດຂຶ້ນຢູ່ປະເທດກຳປູເຈຍ ໂດຍທີມຊາດລາວສາມາດຄວ້າລາງວັນຮອງແຊັມມາຄອງໄດ້ເຖິງ 3 ລາຍການ.

ຊຶ່ງໃນລະຫວ່າງການມອບຫຼຽນລາງວັນ, ຂັນລາງວັນແມ່ນໄດ້ມອບໃຫ້ແກ່ ນາງ ບໍລິວັກ ເທບພະການ ຜູ້ທີ່ນຳພາທີມຍາດເອົາອັນດັບສອງໃນລາຍການດັ່ງກ່າວ, ແທນທີ່ຈະມອບຂັນລາງວັນໃຫ້ແກ່ລາວໂດຍກົງ ແຕ່ທ່ານ ອາເຊມາ ຜັດວາງຂັນດັ່ງກ່າວໄວ້ທີ່ພື້ນ.

ສຳນັກຂ່າວ “ລາວທຽນ ທາມ” ຈຶ່ງໄດ້ຕິດຕໍ່ຫາ ທ່ານ ອາເຊມາ ແລະ ໄດ້ຮັບຈົດໝາຍຕອບກັບເພື່ອອະທິບາຍ ແລະ ຊີ້ແຈງກ່ຽວກັບກໍລະນີທີ່ກໍ່ໃຫ້ເກີດຄວາມເຂົ້າໃຈຜິດທີ່ເກີດຂຶ້ນ. ໂດຍທ່ານ ໄດ້ອະທິ ບາຍວ່າ: ຕາມທຳນຽມການປະຕິບັດຂອງເວທີຊິງແຊັມໂລກແມ່ນຈະກຳນົດການມອບຫຼຽນລາງວັນທີ່ໂພດ້ຽມ ຊຶ່ງປະຕິບັດຄືກັນກັບງານກີລາໂອແລມປິກ ແລະ ຊີເກມ. ຢ່າງໃດກໍ່ຕາມ ທາງເຈົ້າພາບຈັດ ການແຂ່ງຂັນ “ກຳປູເຈຍ” ໄດ້ມີການປ່ຽນແປງຕາຕະລາງມອບລາງວັນໃນນາທີສຸດທ້າຍ ໂດຍຮ້ອງຂໍໃຫ້ມີການມອບຂັນລາງວັນທີ່ໂພດຽມພ້ອມກັບການມອບຫຼຽນລາງວັນ.

ກໍລະນີດັ່ງກ່າວໄດ້ເຮັດໃຫ້ ທ່ານ ອາເຊມາ ກໍມີຄວາມລຳບາກໃຈເພາະບັນດານັກກີລາແມ່ນໄດ້ຖືຫຼຽນລາງວັນ ແລະ ທຸງຊາດໄວ້ເຕັມສອງມືສຳລັບຖ່າຍຮູບ. “ຂ້າພະເຈົ້າໄດ້ຖືກເອີ້ນຂຶ້ນໄປມອບຫຼຽນເງິນເປັນຈຳນວນສີ່ຄັ້ງ ແລະ ພ້ອມທັງມອບຂັນລາງວັນໜຶ່ງອັນແກ່ນັກກີລາ ແລະ ຄູເຝິກແຕ່ລະທ່ານ”  ທ່ານ ອາເຊມາ ກ່າວໃນຈົດໝາຍ.

ໃນແຕ່ລະຄັ້ງຂ້າພະເຈົ້າໄດ້ແນະນຳໃຫ້ບັນດານັກກີລາວາງຖ້ວຍ ແລະ ຂັນລາງວັນ FIPJP ລົງໄວ້ທີ່ພື້ນຕໍ່ໜ້າຕົນເອງເພື່ອຈະໄດ້ເຫັນຫຼຽນລາງວັນຢ່າງຊັດເຈນໃນເວລາຖ່າຍຮູບ, ໂດຍສະເພາະແມ່ນຍ້ອນວ່າເຂົາເຈົ້າໄດ້ຖືທຸງຊາດໄວ້ໃນມືຢູ່ແລ້ວ. “ຂ້າພະເຈົ້າໄດ້ຜ່ານທັງສີ່ທີມທີ່ຢູ່ເທິງໂພດຽມຕາມລຳດັບເພື່ອສະແດງຄວາມຍິນດີ ແລະ ໄດ້ໃຫ້ຄຳແນະນຳອັນດຽວກັນແກ່ເຂົາເຈົ້າ, ທຸກຄົນຈະສັງເກດໄດ້ວ່າ: ທີມສ່ວນໃຫຍ່ໄດ້ປະຕິບັດຕາມຄຳແນະນຳດັ່ງກ່າວຂອງຂ້າພະເຈົ້າຢູ່ເທິງທຸກໂພດຽມ”.

ສ່ວນບັນດາທີມອື່ນໆໄດ້ພາກັນວາງຂັນລາງວັນຂອງພວກເຂົາໄວ້ທີ່ພື້ນເຊັ່ນກັນ ຢ່າງໃດກໍຕາມ, ຮູບພາບທີ່ທີມຊາດລາວຮັບຂັນລາງວັນຢູ່ພື້ນຂອງເຂົາເຈົ້າແມ່ນເປັນເລື່ອງທີ່ເຂົ້າໃຈຜິດ ແລະ ເຫດດການດັ່ງກ່າວກໍໄດ້ກໍ່ໃຫ້ເກີດເປັນກະແສວິພາກວິຈານໃນທາງລົບຢ່າງໄວວາ. ອີງຕາມປະເພນີການປະຕິບັດຂອງລາວ (ຕີນ) ແມ່ນຖືວ່າເປັນສ່ວນທີ່ຕໍ່າສຸດຂອງຮ່າງກາຍ ແລະ ການວາງຂັນລາງວັນໄວ້ທີ່ຕີນແມ່ນຖືວ່າເປັນການບໍ່ໃຫ້ກຽດ.

ທັງນີ້, ທ່ານ ອາເຊມາ ກໍປະຫຼາດໃຈເຊັ່ນດຽວກັບທຸກໆຄົນເມື່ອຖືກເຊີນໃຫ້ມອບຂັນລາງວັນເທິງໂພ ດຽມ ຊຶ່ງໂດຍທົ່ວໄປແລ້ວແມ່ນຈະມອບລະຫວ່າງງານລ້ຽງປິດງານ. “ທຸກໆຄົນຮູ້ວ່າຕັ້ງແຕ່ໃດມາແລ້ວ ໃນໂລກຂອງກີລາເປຕັງ ແລະ ບ່ອນອື່ນ, ຂ້າພະເຈົ້າແມ່ນມີຄວາມເຄົາລົບໃຫ້ກຽດແກ່ນັກກີລາທຸກໆທ່ານບໍ່ວ່າຈະມາຈາກປະເທດໃດ, ທະວີບໃດ ແລະ ໃນລະດັບໃດ, ຂ້າພະເຈົ້າທັງໄດ້ສ້າງສາຍພົວພັນຢ່າງສະໜິດສະໜົມກັບຫຼາຍໆຄົນ”.

ເຖິງຢ່າງໃດກໍຕາມ ຫາກທ່ານພົບວ່າຂ້າພະເຈົ້າໄດ້ມີການປະຕິບັດທີ່ບໍ່ຖືກຕ້ອງໃນໂອກາດດັ່ງກ່າວ, ຂ້າພະເຈົ້າກໍຂໍໃຫ້ບັນດາທ່ານເຂົ້າໃຈເຖິງເຫດຜົນທີ່ຢູ່ພາຍໃຕ້ເຫດການດັ່ງກ່າວ ແລະ ຫວັງວ່າທ່ານຈະຮັບເອົາຄຳຂໍໂທດຈາກໃຈຂ້າພະເຈົ້າ, ມັນບໍ່ແມ່ນເຈຕະນາ ຫຼື ຂ້າພະເຂົ້າບໍ່ເຄີຍມີເຈຕະນາທີ່ຈະປະຕິບັດ ແລະ ສ້າງຄວາມບໍ່ພໍໃຈໃດໆ ແລະ ຂ້າພະເຈົ້າຮູ້ສຶກເສຍໃຈຢ່າງສຸດຊຶ້ງທີ່ເຫດການດັ່ງກ່າວຖືກເບິ່ງອອກມາໃນທາງລົບ.

ຂ້າພະເຈົ້າຈະເຂົ້າຮ່ວມໃນການແຂ່ງຂັນກີລາເປຕັງໃນມະຫະກຳກີລາຊີເກມ ທີ່ນະຄອນມະນິລາ ແລະ ຂ້າພະເຈົ້າຫວັງວ່າຈະສາມາດມອບໜຶ່ງຫຼຽນລາງວັນ ຫຼື ຫຼາຍກວ່ານັ້ນໃຫ້ແກ່ບັນດານັກກີລາຂອງທ່ານ ແລະ ຈະບໍ່ມີຂັນລາງວັນອີກແລ້ວ ແລະ ຫາກຈຳເປັນຂ້າພະເຈົ້າຫວັງວ່າ ທີມຊາດລາວຈະມີການໂອ້ລົມກັບຊ່າງພາບ (ພ້ອມກັບຜູ້ແປພາສາ) ເພື່ອອະທິບາຍ ແລະ ຖ່າຍຮູບທີ່ສວຍງາມຮ່ວມກັນ.

ທ່ານ ອາເຊມາ ກ່າວຕື່ມວ່າ: ທີມຊາດລາວຈະເປັນສ່ວນໜຶ່ງທີ່ຈະຖືກເຊີນໄປແຂ່ງຂັນໃນກີລາເປຕັງຊິງແຊັມໂລກ 2020 ຊຶ່ງຈະຖືກຈັດຂຶ້ນທີ່ປະເທດຝຣັ່ງໃນເດືອນຕຸລາ.

 

ຮູບພາບ ແລະ ຂໍ້ມູນຈາກ: ລາວທຽນ ທາມ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.