ປະທານປະເທດຮັບສານຕາຕັ້ງຈາກທູດປະເທດເພື່ອນມິດພ້ອມແຕ່ງຕັ້ງທູດລາວປະຈຳຕ່າງປະເທດ

0
580

ເມື່ອວັນທີ 13 ກັນຍາຜ່ານມາທີ່ທໍານຽບປະທານປະເທດ ທ່ານ ບຸນຍັງ ວໍລະຈິດ ປະທານປະເທດແຫ່ງສາທາລະນະ​ລັດ ປະຊາ​ທິປະ​ໄຕ ປະຊາ​ຊົນລາວ ໄດ້ຕ້ອນຮັບບັນດາທູດປະເທດ​ເພື່ອນມິດເຂົ້າຍື່ນສານຕາຕັ້ງເພື່ອດໍາລົງຕໍາແໜ່ງເປັນເອກອັກຄະລັດຖະທູດຄົນໃໜ່ປະຈໍາ ສປປ ລາວ ແລະ ມອບສານແຕ່ງຕັ້ງໃຫ້ທູດລາວໄປປະຈຳຢູ່່ປະເທດຕ່າງໆ ຕາມລຳດັບດັ່ງນີ້ ເວລາ 8:30 ໂມງ ທ່ານ ບຸນຍັງ ວໍລະຈິດ ໄດ້ຕ້ອນຮັບ ທ່ານ ນາງ Leow Siu Lin ເຂົ້າຍື່ນສານຕາຕັ້ງເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງສາທາລະນະລັດສິງກະໂປປະຈໍາ ສປປ ລາວ ໂດຍມີສໍານັກງານການທູດຕັ້ງຢູ່ນະຄອນຫຼວງວຽງຈັນ ກ່ອນມາປະຕິບັດໜ້າທີ່ການທູດຢູ່ລາວ ທ່ານ ນາງ Leow Siu Lin ດໍາລົງຕໍາແໜ່ງເປັນຫົວໜ້າກົມອົສຕຣາລີ ນິວຊີແລນ ແລະ ປາຊີຟິກ ກະຊວງການຕ່າງປະເທດສາທາລະນະລັດສິງກະໂປ ລາວ ແລະ ສິງກະໂປ ໄດ້ສ້າງຕັ້ງສາຍພົວພັນການທູດນໍາກັນເມື່ອວັນທີ 2 ທັນວາ 1974.

​ເວລາ 9:00 ໂມງ ທ່ານ ບຸນຍັງ ວໍລະຈິດ ໄດ້ຕ້ອນຮັບ ທ່ານ John Pearson ເຂົ້າຍື່ນສານຕາຕັ້ງເພື່ອດໍາລົງຕໍາແໜ່ງເປັນເອກອັກຄະຣາຊະທູດວິສາມັນຜູ້ມີອໍານາດເຕັມແຫ່ງຣາຊະອານາຈັກອັງກິດ ປະຈໍາ ສປປ ລາວ ໂດຍມີສຳນັກ​ງານການທູດຕັ້ງຢູ່ນະຄອນ ຫຼວງວຽງຈັນ ກ່່ອນມາປະຕິບັດໜ້າທີ່ການທູດຢູ່ລາວ ທ່ານ John Pearson ດໍາລົງຕໍາແໜ່ງເປັນຮອງຫົວໜ້າກົມອາຊີຕາເວັນອອກ ສຳນັກງານຕ່າງປະເທດ ແລະ ເຄືອຈັກກະພົບ ລາວ ແລະ ອັງກິດ ໄດ້ສ້າງຕັ້ງສາຍພົວພັນການທູດນໍາກັນເມື່ອວັນທີ 5 ກັນ ຍາ 1955.

​ເວລາ 9:30 ໂມງ ທ່ານ ບຸນຍັງ ວໍລະຈິດ ໄດ້ຕ້ອນຮັບ ທ່ານ Keizo Takewaka ເຂົ້າຍື່ນສານຕາຕັ້ງເພື່ອດໍາລົງຕໍາແໜ່ງເປັນ ເອກອັກຄະຣາຊະທູດວິສາມັນຜູ້ມີອໍານາດເຕັມແຫ່ງຍີ່ປຸ່ນ ປະຈໍາ ສປປ ລາວ ໂດຍມີສຳນັກ​ງານການທູດຕັ້ງຢູ່ນະຄອນຫຼວງວຽງຈັນ ກ່ອນມາປະຕິບັດໜ້າທີ່ການທູດຢູ່ລາວ ທ່ານ Keizo Takewaka ດຳລົງຕຳແໜ່ງເປັນກົງສຸນໃຫຍ່ ສະຖານກົງສຸນໃຫຍ່ຍີ່ປຸ່ນທີ່ ຊິດນີ ປະເທດອົສຕຣາລີ ລາວ ແລະ ຍີ່ປຸ່ນ ໄດ້ສ້າງຕັ້ງສາຍພົວພັນການທູດນໍາກັນເມື່ອວັນທີ 5 ມີນາ 1955.

​ເວລາ 10:00 ໂມງ ທ່ານ ບຸນຍັງ ວໍລະຈິດ ໄດ້ຕ້ອນຮັບ ທ່ານ Jean-Paul Senninger ເຂົ້າຍື່ນສານຕາຕັ້ງເພື່ອດໍາລົງຕໍາແໜ່ງເປັນເອກອັກຄະຣາຊະທູດວິສາມັນຜູ້ມີອໍານາດເຕັມແຫ່ງຣາຊະອານາຈັກລຸກຊຳບວກປະຈຳ ສປປ ລາວ ໂດຍມີສຳນັກງານການທູດຕັ້ງຢູ່ບາງກອນ ປະເທດໄທ ກ່ອນມາປະຕິບັດໜ້າທີ່ການທູດຢູ່ລາວ ທ່ານ Jean-Paul Senninger ດຳລົງຕຳແໜ່ງເປັນເລຂາທິການໃຫຍ່ຂອງລັດຖະບານ ລາວ ແລະ ລຸກຊຳບວກ ໄດ້ສ້າງຕັ້ງສາຍພົວພັນການທູດນຳກັນເມື່ອວັນທີ 25 ກັນຍາ 1997.

ໃນໂອກາດນີ້ ທ່ານປະທານປະເທດແຫ່ງ ສປປ ລາວ ກໍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ບັນດາທ່ານທູດປະເທດເພື່ອນມິດຕ່າງໆທີ່ໄດ້ຖືກແຕ່ງຕັ້ງມາດໍາລົງຕໍາແໜ່ງເປັນເອກອັກຄະລັດຖະທູດປະຈໍາຢູ່ສາທາລະນະລັດ ປະຊາທິປະໄຕ ປະຊາຊົນລາວໃນຄັ້ງນີ້ ພອ້ມທັງໄດ້ແຈ້ງສະພາບການພັດທະນາຂອງລາວໃຫ້ແກ່ບັນດາທ່ານທູດໄດ້ຮັບຊາບ ແລະ ຫວັງວ່າໃນຕະຫຼອດໄລຍະຂອງການປະຕິບັດໜ້າທີ່ການທູດຢູ່ລາວບັນດາທ່ານທູດຈະປະກອບສ່ວນເສີມສ້າງສາຍພົວພັນ ແລະ ການຮວ່ມມືທີ່ມີຢູ່ແລ້ວໃຫ້ນັບມື້ຂະຫຍາຍຕົວຂຶ້ນເລື້ອຍໆ.

ລັດຖະບານ​ລາວພ້ອມແລ້ວຈະ​ໃຫ້ການ​ຮ່ວມ​ມື ອໍານວຍຄວາມສະດວກໃຫ້ແກ່ທຸກທ່ານໃນການປະຕິບັດໜ້າທີ່ຢູ່ລາວໃຫ້ປະສົບຜົນສໍາເລັດ ເພື່ອເພີ່ມພູນຄູນສ້າງສາຍພົວພັນ ແລະ ການຮວ່ມມືທີ່ມີຢູ່ແລ້ວໃຫ້ແໜ້ນແຟ້ນຍິ່ງຂຶ້ນ ​ໃນມື້ດຽວກັນ ທ່ານປະທານ ປະ ເທດແຫ່ງ ສປປ ລາວ ກໍໄດ້ມອບສານແຕ່ງຕັ້ງໃຫ້ ທ່ານ ແສງເພັດ ຮຸ່ງບຸນຍວງ (ຮອງລັດຖະມົນຕີກະຊວງການຕ່າງປະເທດ) ເພື່ອໄປດໍາລົງຕໍາແໜ່ງເປັນເອກອັກຄະລັດຖະທູດແຫ່ງ ສປປ ລາວ ປະຈຳ ສສ. ຫວຽດນາມ ທ່ານ ນາງ ຄຳເພົາ ເອີນທະວັນ (ຮອງລັດຖະມົນຕີກະຊວງການຕ່າງປະເທດ) ເພື່ອໄປດໍາລົງຕໍາແໜ່ງເປັນເອກອັກຄະລັດຖະທູດແຫ່ງ ສປປ ລາວ ປະຈຳ ສປ ຈີນທ່ານ ພົມມາ ສິດເສນາ (ຫົວໜ້າກົມເອີຣົບ-ອາເມຣິກາ ຄະນະພົວພັນຕ່າງປະເທດສູນກາງພັກ) ເພື່ອໄປດໍາລົງຕໍາແໜ່ງເປັນ ເອກອັກຄະລັດຖະທູດແຫ່ງ ສປປ ລາວ ປະຈຳ ສ.ອິນໂດເນເຊຍ ທ່ານ ອານຸພາບ ວົງໜໍ່ແກ້ວ (ຫົວໜ້າກົມອົງການຈັດຕັ້ງສາກົນ) ເພື່ອໄປດໍາລົງຕໍາແໜ່ງເປັນເອກອັກຄະລັດຖະທູດ ຜູ້ຕາງໜ້າຖາວອນແຫ່ງ ສປປ ລາວ ປະຈຳອົງການສະຫະປະຊາຊາດທີ່ນິວຢອກ ອາເມຣິກາ) ແລະ ທ່ານ ບຸນລຽບ ຮຸ່ງວົງສອນ (ຮອງຫົວໜ້າກົມອາຊີ ປາຊີຟິກ ແລະ ອາຟຣິກາ ກະຊວງການຕ່າງປະເທດ) ເພື່ອໄປດໍາລົງຕໍາແໜ່ງເປັນເອກອັກຄະລັດຖະທູດແຫ່ງ ສປປ ລາວ ປະຈຳຊູແອດ.

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.