ປະທານປະເທດພ້ອມຄະນະການນຳ ເດີນທາງໄປເຂົ້າຮ່ວມກອງປະຊຸມຫນຶ່ງແລວຫນຶ່ງເສັ້ນທາງ ຄັ້ງທີ 2

0
222

ກອງປະຊຸມຫນຶ່ງແລວຫນຶ່ງເສັ້ນທາງຄັ້ງທີ 2 ເພື່ອຮ່ວມມືສາກົນໄຂຂຶ້ນໃນວັນທີ 25 ເມສາ 2019 ແລະ ວັນທີ 26 ເມສາ 2019 ຈະເປັນມື້ໄຂຂື້ນຢ່າງເປັນທາງການ ເຊິ່ງຈະດໍາເນີນໄປເປັນເວລາ 3 ວັນ ລະຫວ່າງວັນທີ 25-27 ເມສາ 2019 ທີ່ນະ ຄອນຫຼວງປັກກິ່ງ ສປ ຈີນ ແລະ ຄາດວ່າຈະມີຜູ້ເຂົ້າຮ່ວມຫລາຍກວ່າ 5.000 ທ່ານ ຈາກ 150 ກວ່າປະເທດທົ່ວໂລກ ຂະນະທີ່ ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວໄດ້ນໍາພາຄະນະຜູ້ແທນລາວເຂົ້າຮ່ວມກອງປະຊຸມດັ່ງກ່າວ.

ໂອກາດດັ່ງກ່າວນີ້, ທ່ານ ລັດຖະມົນຕີ ກະຊວງການຕ່າງປະເທດແຫ່ງ ສປ ຈີນຍັງກ່າວໃນບາງເນື້ອໃນວ່າ ຂໍ້ລິເລີ່ມໜຶ່ງແລວໜຶ່ງເສັ້ນທາງບໍ່ແມ່ນເຄື່ອງມືທາງພູມີສາດດ້ານການເມືອງ ແລະ ບໍ່ແມ່ນກັບດັກໜີ້ສິນສໍາລັບບັນດາປະເທດຕ່າງໆທີ່ເຂົ້າຮ່ວມໃນໂຄງການດັ່ງກ່າວ ແຕ່ເປັນເວທີການຮ່ວມມື ແລະ ສິດຜົນປະໂຫຍດຕົວຈິງໂດຍຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ. ສປ ຈີນຢືນຢັນຈະບໍ່ນໍາເອົາສັນຍາລັກທີ່ກ່ຽວຂ້ອງກັບຄໍາກ່າວອ້າງທີ່ວ່າກັບດັກໜີ້ມານໍາໃຊ້ຢ່າງເດັດຂາດ. ດ້ວຍເຫດດັ່ງກ່າວ ຂໍ້ລິເລີ່ມໜຶ່ງແລວໜຶ່ງເສັ້ນທາງແມ່ນຕັ້ງຢູ່ບົນພື້ນຖານຄວາມຈິງ.

ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ພ້ອມຄະນະການນຳ ໄດ້ເດີນທາງເຂົ້າຮ່ວມກອງປະຊຸມຄັ້ງນີ້ ແມ່ນຈະສືບຕໍ່ເພີ່ມທະວີສາຍພັນການຮ່ວມມື ແລະ ຊຸກຍູ້ແຮງການພັດທະນາເສດຖະກິດ-ສັງຄົມ, ການຄ້າ, ການລົງທຶນ, ຄົມມະນາຄົມ, ການທ່ອງທ່ຽວ, ການໄປມາຫາສູ່ກັນ, ການແລກປ່ຽນວັດທະນະທໍາ ແລະ ອື່ນໆ ນອກນັ້ນຍັງເປັນການຮັດແໝ້ນໄມຕີຈິດມິດຕະພາບ, ຄວາມໃກ້ຊິດຕິດແທດ ສະໜິດສະໜົມສະເໝີຕົ້ນສະເໝີປາຍລະຫວ່າງສອງພັກສອງລັດກໍຄືປະຊາຊົນສອງຊາດລາວ-ຈີນ ຈີນ-ລາວ ໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືແບບຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານໃຫ້ຈະເລີນງອກງາມຍິ່ງໆຂຶ້ນຕາມທິດ 4 ດີຄື: ເພື່ອນບ້ານທີ່ດີ,ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ.

ສປປ ລາວ ແມ່ນໜຶ່ງໃນຈໍານວນ 126 ປະເທດໄດ້ເຂົ້າຮ່ວມໂຄງການຂໍ້ລິເລີ່ມໜຶ່ງແລວໜຶ່ງເສັ້ນທາງໂດຍສະເພາະໂຄງການກໍ່ເສັ້ນທາງລົດໄຟລາວ-ຈີນກໍ່ແມ່ນໜຶ່ງໃນຄວາມພະຍາຍາມຂອງລາວຈະປ່ຽນສະຖານະພາບປະເທດບໍ່ຕິດຈອດກັບທະເລໃຫ້ກາຍເປັນປະເທດເຊື່ອມຈອດກັບປະເທດອື່ນໆໃນພາກພື້ນ ແລະ ສາກົນ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ສຳນັກຂ່າວສານປະເທດລາວ
ຮູບປະກອບ: ໜັງສືພິມເສດຖະກິດ-ການຄ້າ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.