ປະດັບຫຼຽນກາມິດຕະພາບໃຫ້ເອກອັກຄະລັດຖະທູດຣັດເຊຍປະຈຳ ສປປ ລາວ

0
33

ເມື່ອວັນທີ 19 ກັນຍາ 2019 ຢູ່ທີ່ກະຊວງການຕ່າງປະເທດໄດ້ມີພິທີປະດັບຫຼຽນກາມິດຕະພາບໃຫ້ ທ່ານ ມີຄາອິນ ບາຣານນົບ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງສະຫະພັນຣັດເຊຍປະຈໍາ ສປປ ລາວ ໃນໂອກາດທ່ານສໍາເລັດການປະຕິບັດໜ້າທີ່ການທູດ ຢູ່ ສປປ ລາວ ຕະຫຼອດໄລຍະເວລາ 5 ປີ ຜ່ານມາ.

ທ່ານເອກອັກຄະລັດຖະທູດຣັດເຊຍໄດ້ປະກອບສ່ວນຢ່າງຕັ້ງໜ້າເຂົ້າໃນການເສີມຂະຫຍາຍການພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ ແລະ ສະຫະພັນຣັດເຊຍ ດ້ວຍການເອົາໃຈໃສ່ໃນການປະສານງານ ຊຸກຍູ້ການແລກປ່ຽນການຢ້ຽມ ຢາມຂອງຄະນະຜູ້ແທນຂັ້ນສູງໃນລະດັບຕ່າງໆ ນັບແຕ່ລະດັບການນໍາຂອງພັກ ແລະ ລັດ ຈົນເຖິງອົງການຈັດຕັ້ງມະຫາຊົນ ຊຸກຍູ້ການນໍາຣັດເຊຍ ອະນຸມັດເຄື່ອງຊ່ວຍເລືອບັນເທົາທຸກໃຫ້ແກ່ປະຊາຊົນລາວທີ່ໄດ້ຮັບຜົນກະທົບຈາກເຫດການໄພນໍ້າຖ້ວມຢູ່ແຂວງອັດຕະປືເມື່ອປີ 2018 ລວມມູນຄ່າທັງໝົດ 330.000 ໂດລາ ນອກຈາກນີ້ ພາຍໃຕ້ການນໍາພາຂອງທ່ານເອກອັກຄະລັດຖະທູດສະຖານທູດຣັດເຊຍປະຈໍາ ສປປ ລາວ ໄດ້ຕັ້ງໜ້າປະກອບສ່ວນເຂົ້າຮ່ວມບັນດາກິດຈະກໍາຕ່າງໆຂອງສອງປະເທດທີ່ຈັດຂຶ້ນໃນແຕ່ ລະປີ ອັນໄດ້ເຮັດໃຫ້ການພົວພັນຮ່ວມມືສອງຝ່າຍມີບາດກ້າວຂະຫຍາຍຕົວຫຼາຍຂຶ້ນກວ່າເກົ່າເຊັ່ນ ຂະແໜງການສຶກສາ ການລົງ ທຶນ ການທະຫານ ການທ່ອງທ່ຽວ ແລະ ຂະແໜງການອື່ນໆ.

​ດັ່ງນັ້ນ ເພື່ອເປັນການຍ້ອງຍໍສັນລະເສີນ ແລະ ຊົມເຊີຍຄຸນງາມຄວາມດີກໍຄືຜົນງານຂອງທ່ານທູດດັ່ງກ່າວ ນາຍົກລັດຖະມົນຕີ ແຫ່ງ ສປປ ລາວ ຈຶ່ງໄດ້ຕົກລົງປະດັບຫຼຽນກາມິດຕະພາບໃຫ້ ທ່ານ ມີຄາອິນ ບາຣານນົບ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງສະຫະພັນຣັດເຊຍປະຈໍາສາທາລະນະລັດ ປະຊາທິປະໄຕ ປະຊາຊົນລາວ ໂດຍແມ່ນ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ຕາງໜ້າລັດຖະບານແຫ່ງ ສປປ ລາວ ໃຫ້ກຽດປະດັບຫຼຽນກາມິດຕະພາບໃນຄັ້ງນີ້.

 

 

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.