ປະຊາຊົນເດືອດຮ້ອນ “ລາຄາຊີ້ນແພງ” ຫຼັງປີໃໝ່ກະທົບຄ່າຄອງຊີບ

1
2585

ປັດຈຸບັນລາຄາຊີ້ນຕາມທ້ອງຕະຫຼາດຍັງມີລາຄາສູງກວ່າທີ່ທາງພະແນກການຄ້າກຳນົດ, ນັບຕັ້ງແຕ່ປີໃໝ່ສາກົນເປັນຕົ້ນມາ ແລະ ກໍຍັງບໍ່ມີທ່າທີວ່າລາຄາຊື້-ຂາຍຈະຫຼຸດລົງ. ແນ່ນອນວ່າຕ້ອງສົ່ງຜົນກະທົບຕໍ່ຄ່າຄອງຊີບຂອງປະຊາຊົນຈຳນວນບໍ່ໜ້ອຍ ໂດຍສະ ເພາະຜູ້ທີ່ມີລາຍໄດ້ຕໍ່າແມ່ນຮັບຜົນກະທົບຫຼາຍທີ່ສຸດ ເພາະລາຍຈ່າຍທີ່ຈຳເປັນໃນແຕ່ລະມື້ກໍຕ້ອງເພີ່ມສູງ.

ນອກຈາກບັນຫາລາຄາຊີ້ນແພງຂຶ້ນແລ້ວ, ຍັງເກີດມີປາກົດການແມ່ຄ້າຂາຍຊີ້ນໃນລາຄາບໍ່ເປັນເອກະພາບກັນ ຈາກຂໍ້ມູນສົມທຽບລະຫວ່າງ 2 ຕະຫຼາດຄື: ຕະຫຼາດສີໄຄ ແລະ ຕະຫຼາດສວນມອນທີ່ມີຄວາມແຕກຕ່າງກັນດ້ານລາຄາເຊັ່ນ: ລາຄາກະດູກໝູຂາຍຢູ່ ຕະຫຼາດສວນມອນ ລາຄາ 32.000 ກີບຕໍ່ກິໂລກຣາມ, ຊີ້ນໝູສາມຊັ້ນ 45.000-50.000 ກີບຕໍ່ກິໂລກຣາມ. ສ່ວນທີ່ຕະຫຼາດສີໃຄ ລາຄາກະດູກໝູ 30.000 ກີບຕໍ່ກິໂລກຣາມ ແລະ ຊີ້ນໝູສາມຊັ້ນ 40.000 ກີບຕໍ່ກິໂລກຣາມ (ສະເພາະແຕ່ລາຄາຊີ້ນໝູເທົ່ານັ້ນ).

ຈາກຂໍ້ມູນທີ່ກ່າວມາຂ້າງເທິງສະແດງເຫັນຢ່າງຊັດເຈນວ່ານັບຕັ້ງແຕ່ປີໃໝ່ຜ່ານຈົນເຖິງປັດຈຸບັນມີ 2 ບັນຫາທີ່ຄວນໄດ້ຮັບການແກ້ໄຂຄື: ລາຄາຊີ້ນທີ່ສູງຂຶ້ນ ແລະ ການກຳນົດລາຄາຂາຍທີ່ບໍ່ເປັນເອກະພາບກັນ. ຊຶ່ງສອງບັນຫານີ້ມັນມີຄວາມເຊື່ອມໂຍງໄປເຖິງກົນໄກຂອງຂະບວນການຊື້-ຂາຍຕັ້ງແຕ່ຕົ້ນທາງຂອງແຕ່ລະທ້ອງຖິ່ນອາດມີຄວາມແຕກຕ່າງກັນ.

ມາເບິ່ງປັດໄຈທີ່ອາດຈະເປັນສາເຫດເຮັດໃຫ້ລາຄາສິນຄ້າສູງຂຶ້ນ ແລະ ບໍ່ມີຄວາມເອກະພາບໃນດ້ານລາຄານັ້ນມັນມີອົງປະກອບດັ່ງນີ້:

  1. ເກີດມາຈາກຜູ້ລ້ຽງສັດຂຶ້ນລາຄາເມື່ອຂາຍສົ່ງເຂົ້າໂຮງງານ
  2. ການຂົນສົ່ງຈາກບ່ອນລ້ຽງມາຫາໂຮງງານຂ້າສັດມີໄລຍະທາງໄກ, ດັ່ງນັ້ນ ຈຶ່ງບວກການຂົນສົ່ງ
  3. ຊີ້ນໝູບາງຊະນິດແມ່ນໄດ້ນຳເຂົ້າຈາກຕ່າງປະເທດ
  4. ແມ່ຄ້າຂາຍຍ່ອຍໃນທ້ອງຕະຫຼາດແທນທີ່ຈະໄດ້ຊື້ຊີ້ນໂດຍກົງຈາກໂຮງງານແຕ່ຜັດໄດ້ຊື້ຊີ້ນຈາກແມ່ຄ້າຄົນກາງແທນ
  5. ແມ່ຄ້າແຕ່ລະຕະຫຼາດ ຫຼື ແຕ່ລະຮ້ານມີການເອີ້ນລາຄາຂາຍຕາມໃຈຕົນເອງ, ເນື່ອງຈາກບໍ່ມີການຕິດປ້າຍລາຄາສິນຄ້າ
  6. ພາສີແພງຂຶ້ນ, ຄ່າເຊົ່າສະຖານທີ່ຂາຍແພງຂຶ້ນ ກໍສົ່ງຜົນກະທົບຕໍ່ລາຄາສິນຄ້າໃຫ້ແພງຂຶ້ນ

ຢ່າງໃດກໍຕາມ ທີ່ກ່າວມາທັງໝົດ 6 ຂໍ້ຂ້າງເທິງນີ້ມັນເປັນພຽງການສັນນິຖານ ແຕ່ທັງໝົດນີ້ມັນກໍຄືປັດໄຈທີ່ມີຜົນຕໍ່ການກຳນົດລາຄາສິນຄ້າເພາະທຸກຢ່າງມັນມີຄວາມເຊື່ອມໂຍງກັນ, ການແກ້ໄຂບັນຫາເລື່ອງລາຄາສິນຄ້າ ແລະ ຄວາມເອກະພາບຂອງລາຄາສິນຄ້ານັ້ນມັນບໍ່ສາມາດແກ້ໄຂພຽງຂອດດຽວ ຫຼື ຂອດໃດຂອດໜຶ່ງເທົ່ານັ້ນ ແຕ່ມັນຕ້ອງແກ້ໄຂຫຼາຍໆຂອດໄປພ້ອມໆກັນ.

ບັນດາທ່ານສາມາດກົດເຂົ້າໄປອ່ານຂ່າວທີ່ກ່ຽວຂ້ອງກັບບົດໄດ້ທີ່ນີ້: ແຈ້ງການ! ຫ້າມຂຶ້ນລາຄາສິນຄ້າໃນຊ່ວງປີໃໝ່ບໍ່ເປັນຜົນ

 

ຂ່າວໂດຍ: ພຸດສະດີ

1 ຄວາມ​ຄິດ​ເຫັນ

  1. ຄໍາອະທິບາຍຍັງບໍ່ຄົບຄືແມ່ຄ້າບາງຄົນໃຊ້ໂອກາດເວົ້າຄາລາຕາມໃຈ ແລະ ທຽບໃສ່ເງິນບາດ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.