ປະຊາຊົນຫລາຍ​ບ້ານ ​ຢູ່​ແຂວງ​ຈຳປາ​ສັກ ປະສົບ​ໄພ​ນ້ຳ​ຖ້ວມ​ໜັກ

0
170

ປັດຈຸບັນ ທົ່ວ​ແຂວງ​ຈຳປາ​ສັກແມ່ນ​ໄດ້​ຮັບ​ຜົນ​ກະທົບ​ຈາກພະຍຸ​ຄາ​ຈິກິຢ່າງ​ໜັກໜ່ວງ ​ລວມມີ 1 ນະຄອນ ​ແລະ 9 ຕົວ​ເມືອງ ປະ ຊາຊົນ​ຫຼາຍ​ພັນ​ຄອບຄົວຖືກ​ຍົກຍ້າຍອອກ​ຈາກ​ຈຸດ​ທີ່​ມີ​ຄວາມ​ສ່ຽງ​ໄປ​ຢູ່​ເຂດ​ທີ່​ປອດ​ໄພ ​ເນື້ອ​ທີ່​ນາ ​ແລະ ​ເສັ້ນທາງ​ຫຼາຍ​ຈຸດ​ແມ່ນ​ຈົມ​ຢູ່​ພື້ນ​ນ້ຳ.

ຂະນະ​ທີ່ການ​ນຳ​ຂັ້ນ​ແຂວງ ​ເມືອງ ​ແລະ ອຳນາດ​ການ​ປົກຄອງ​ທຸກ​ຂັ້ນ ທຸກ​ພາກສ່ວນ​ໄດ້​ສຸມ​ໃສ່​ຊ່ວຍ​ເຫຼືອ​ປະຊາຊົນ​ຢ່າງ​ຮີບ​ດ່ວນ ພ້ອມ​ທັງ​ຕິດຕາມ​ເຝົ້າ​ລະວັງ ​ແລະ ​ໃຫ້ການ​ຊ່ວຍ​ເຫຼືອ​ຢ່າງ​ໃກ້ຊິດ ຄະນະ​ກຳມະການປ້ອງ​ກັນ ​ແລະ ຄວບ​ຄຸມ​ໄພພິບັດ​ຂັ້ນ​ແຂວງໄດ້​ລາຍ​ງານ​ສະພາບ​ໄພພິບັດ​ທົ່ວ​ແຂວງ​ຈຳປາ​ສັກ​ໃນ​ວັນ​ທີ 4 ກັນຍາ 2019 ນີ້ວ່າ ຢູ່ນະຄອນ​ປາກ​ເຊແມ່ນ​ມີ​ຄວາມ​ຮຸນ​ແຮງ​ຫຼາຍ​ ແລະ ຈຸດ​ໂປ່​ມນ້ຳ​ແຕ່ລະ​ຈຸດ​ໃຊ້​ການ​ບໍ່​ໄດ້ ​ໃນ​ນັ້ນ​ ຈຸ​ທີ່​ໄດ້​ຮັບ​ຜົນ​ກະທົບ​ໜັກ​ມີ 4 ກຸ່ມ​ບ້ານ​ລວມທັງ​ໝົດ 21 ບ້ານ ​ເມືອງ​ຊະນະ​ສົມບູນ ນ້ຳ​ຖ້ວມ​ກວມ 23 ບ້ານ 1.166 ຄົບ​ຄົວ ປັດຈຸບັນ ​ໄດ້​ຍົກຍ້າຍປະຊາຊົນ​ໄປ​ຢູ່​ທີ່​ປອດ​ໄພ​ແລ້ວ 13 ບ້ານ ​ເນື້ອ​ທີ່​ຖືກ​ຖ້ວມ 3.000 ກວ່າ​ເຮັກຕາ ​ແລະ ​ເສັ້ນທາງ​ເລກທີ 13 ​ໃຕ້ບໍ່​ສາມາດ​ສັນຈອນ​ໄປ-ມາ​ໄດ້ ຊຶ່ງມີ​ຄວາມ​ຍາວ 700 ​ແມັດ ​ແລະ ​ເສັ້ນທາງ​ເຂົ້າ​ແຕ່​ລະ​ກຸ່ມ​ບ້ານ​ກໍ​ເປ່​ເພບໍ່​ສາມາດ​ສັນຈອນ​ໄດ້ ​ເມືອງ​ໂພນ​ທອງຈຳນວນ​ບ້ານ​ທີ່​ຖືກ​ກະທົບ 18 ບ້ານ 458 ຄອບຄົວ ​ເນື້ອ​ທີ່​ນາ​ຖືກ​ຖ້ວມ 800 ກວ່າ​ເຮັກຕາ ​ເນື້ອ​ທີ່​ສວນ 129 ​ເຮັກຕາ ​ເມືອງ​ຈຳປາ​ສັກມີບ້ານ​ທີ່​ຖືກ​ກະທົບ 35 ບ້ານ ​ໃນ​ນັ້ນ ຢູ່ບ້ານ​ໄຮ່ ມີ 85 ຄອບ​ຄົວແມ່ນ​ໄດ້​ຮັບ​ຜົນ​ກະທົບ​ໜັກໜ່ວງ​ເສຍ​ຫາຍ 100%.

​ເມືອງ​ສຸຂຸມາລະດັບ​ນ້ຳ​ຫ້ວຍ​ຂະໝວນວັດ​ແທກ​ໄດ້ 9,33 ​ແມັດຢູ່​ໃນ​ເຂດ​ອັນ​ຕະລາຍ ນ້ຳ​ໄດ້​ລົ້ນ​ເຂົ້າ​ເຂດ​ບ້ານ​ລຽບ​ຕາມ​ແຄມ​ຫ້ວຍ ​ແລະ ຖ້ວມ​​ເນື້ອ​ທີ່​ນາ​ປະຊາຊົນຈຳນວນ 31 ບ້ານ ຖ້ວມ​ເຮືອນ​ປະຊາຊົນ 6 ບ້ານ ​ແລະ ​ໂຮງຮຽນ 16 ​ແຫ່ງ ລວມທັງ​ສັດລ້ຽງ ​ແລະ ໜອງ​ປາ​ຈຳນວນ​ໜຶ່ງ ​ເມືອງ​ປະທຸມ​ພອນ ນ້ຳ​ຖ້ວມ​ບ້ານ​ເຮືອນ​ຂອງ​ປະຊາຊົນ 41 ບ້ານ ​ເກືອບ 3.000 ຄອບຄົວ ​ເນື້ອ​ທີ່​ນາ​ຖືກ​ຖ້ວມ 65.000 ກວ່າ​ເຮັກຕາ ຖ້ວມ​ສວນ 251 ​ເຮັກ​ຕາ ການ​ສັນຈອນ​ຖືກ​ຕັດຂາດ​ແລ້ວ 2 ຈຸດ ​ແຕ່​ບ້ານ​ພະ​ລາຍຫາບ້ານ​ຕາ  ​ຫວາງ ຖ້ວມ​ວັດ 3 ​ແຫ່ງ ​ໂຮງຮຽນ 3 ​ແຫ່ງ ​ແລະ ມີ​ຜູ້​ເສຍ​ຊີວິດ 3 ຄົນ ຈາກ​ເຫດການ​ເຮືອ​ຫຼົ້ມ ​ແລະ ​ໄດ້​ພົບ​ສົບ​ແລ້ວ 1 ສົບ ​ເມືອງ​ໂຂງ ມີ​ບ້ານ​ທີ່​ຖື​ກກະທົບ 34 ບ້ານ 598 ຄອບຄົວ ​ເນື້ອ​ທີ່​ທຳ​ການ​ຜະລິດ​ຖືກ​ຖ້ວມ 486 ​ເຮັກຕາ ​ເມືອງ​ບາ​ຈຽງຈະ​ເລີ​ນສຸກ ​ໄດ້​ຮັບ​ຜົນ​ກະທົບ 2 ບ້ານ 300 ກວ່າ​ຄອບຄົວ. ສຳລັບ​ເມືອງ​ປາກ​ຊ່ອງ ມີ​ນ້ຳ​ຖ້ວມ​ຂັງ​ບາງ​ບ່ອນ ​ແລະ ບາງ​ຈຸດ​ຢູ່​ເສັ້ນທາງ​ໄປ​ເຂື່ອນ​ໄຟຟ້າ​ເຊ​ນ້ຳ​ນ້ອຍ ຈຸດ​ເຝົ້າ​ລະວັງ​ແມ່ນ​ເຂື່ອນ​ໄຟຟ້າ ​ເພາະ​ຍັງມີ​ປະຊາຊົນ​ອາ​ໄສ​ຢູ່​ເຂດ​ດັ່ງກ່າວ. ສ່ວນ​ເມືອງມຸນ​ລະ​ປະ​ໂມກ ​ຍັງ​ບໍ່​ໄດ້​ຮັບ​ການ​ລາຍ​ງານ ​ເພາະ​ຢູ່​ໃນ​ຂັ້ນ​ຕອນ​ການ​ເກັບ​ກຳ​ຂໍ້​ມູນ.

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.