ປວດທ້ອງ ແລະ ທໍລະມານກວ່າ 7 ເດືອນຈາກຊີ້ນປົ່ງນໍ້າໜັກເຖິງ 18 ກີໂລ

0
6067

ສຳນັກຂ່າວເດິຊັນລາຍງານເມື່ອວັນທີ 6 ພະຈິກຜ່ານມວ່າ: ແພດອິນສາມາດຜ່າຕັດເອົາຊີ້ນປົ່ງຂະໜາດໃຫຍ່ອອກຈາກທ້ອງຂອງຍິງສາວໄດ້ສຳເລັດພາຍຫຼັງທີ່ນາງເກີດອາການຫາຍໃຈຕິດຂັດ ແລະ ທໍລະມານກັບຄວາມເຈັບປວດຢ່າງຮຸນແຮງຫຼາຍກວ່າ 7 ເດືອນ.

ນາງ ກະວິຕາ ກາລັມ ອາຍຸ 38 ປີ ແມ່ໝ້າຍລູກໜຶ່ງ, ອາໄສຢູ່ໃນເມືອງວໍຣະທາ ລັດມະຫາຣາດຊະຣະ ທາງຕາເວັນຕົກຂອງອິນ ເດຍໂດຍນາງໄດ້ເດີນທາງມາໂຮງໝໍໃນຕົວເມືອງດ້ວຍຄວາມຊ່ວຍເຫຼືອຈາກຄົນໃນໝູ່ບ້ານທີ່ລະດົມທຶນຊ່ວຍນາງຈຳນວນໜຶ່ງ. ໂດຍ ດຣ ໃນໂຮງໝໍໄດ້ກ່າວວ່າ: ກວດພົບຖົງນໍ້າຮັງໄຂ່ຂະໜາດໃຫຍ່ທີ່ສຸດເທົ່າທີ່ເຄີຍຜ່າຕັດມາ, ຂະໜາດເສັ້ນຜ່າສູນກາງ 106 ຊັງຕີແມັດ, ນໍ້າໜັກ 18 ກີໂລກຣາມ. ຂະນະທີ່ໜຶ່ງໃນທີມແພດຜ່າຕັດໄດ້ກ່າວອີກວ່າ: ຜູ້ປ່ວຍບໍ່ເໝາະກັບການໃຊ້ຢາສະຫຼົບ, ຫຼັງຈາກທີ່ທີມແພດປະຊຸມ ແລະ ຫາລືກັນຈຶ່ງຕັດສິນໃຈຜ່າຕັດດ້ວຍການສີດຢາບລ໋ອກໄຂສັນຫຼັງ ແລະ ໃຊ້ຢາຜ່ານທາງຊ່ອງຮອບເຍື່ອບຸໄຂສັນຫຼັງ ລວມທັງຈຳກັດການລົງມີດຜ່າບໍ່ໃຫ້ກາຍສະບື.

ຖືເປັນເລື່ອງທີ່ຍາກທີ່ຈະເອົາຖົງນໍ້າຂະໜາດໃຫຍ່ເຊັ່ນນີ້ອອກມາຜ່ານຮອຍຜ່າຕັດທີ່ມີຂະໜາດຈຳກັດ, ເນື່ອງຈາກການບີບຮັດຂອງຖົງນໍ້າແບບກະທັນຫັນ ອີກທັງຮັງໄຂ່ຂອງຜູ້ປ່ວຍກໍລວມກັນເປັນກ້ອນ ແລະ ທໍ່ນຳໄຂ່ມີຂະໜາດບາງລົງ, ອາດມີອາການຊ໋ອກເນື່ອງຈາກເລືອດໄປຫຼໍ່ລ້ຽງບໍ່ພຽງພໍ ຊຶ່ງເປັນອັນຕະລາຍເຖິງຂັ້ນເສຍຊີວິດ ແລະ ອາດເຮັດໃຫ້ອະໄວຍະວະຫຼົ້ມແຫຼວ. ດັ່ງນັ້ນ ທີມແພດຈຶ່ງຕ້ອງພິຈາລະນາການລົງມີດໃນໄລຍະເວລາຈຳກັດເພື່ອເອົາຖົງນໍ້າອອກມາຜ່ານຮອຍຜ່າແບບຊ້າໆ, ໂດຍບໍ່ໃຫ້ຂອງແຫຼວຈາກຖົງນໍ້າໄຫຼລົງໄປໃນຊ່ອງທ້ອງ,​ ຖ້າຫາກເອົາອອກມາແບບບໍ່ຖືກຕ້ອງອາດເຮັດໃຫ້ທ້ອງຂອງຄົນເຈັບແຕກ.

ຢ່າງໃດກໍຕາມ, ການຜ່າຕັດໃນຄັ້ງນີ້ກໍຜ່ານໄປດ້ວຍດີ ແລະ ນໍ້າໜັກຂອງຄົນເຈັບກໍຫຼຸດລົງຈາກ 57,2 ກີໂລກຣາມເຫຼືອ 38,1 ກີໂລກຣາມ ແລະ ກຳລັງພັກຟື້ນພາຍໃຕ້ຄວາມດູແລຂອງທີມແພດຢ່າງໃກ້ຊິດ.

 

ຮຽບຮຽງ: ເພັງສະຫວັນ

ຮູບພາບ: khaosod

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.