ບໍລິສັດເກມທຳໃຈ! ເມື່ອຈີນປະກາດຫ້າມ “ເຍົາວະຊົນຫຼິ້ນເກມ” ບໍ່ໃຫ້ເກີນມື້ລະ 90 ນາທີ

0
586

ສຳນັກຂ່າວຊິນຮວາລາຍງານເມື່ອວັນທີ 5 ພະຈິກຜ່ານມາວ່າ: ຫ້ອງການຖະແຫຼງຂ່າວ ແລະ ໂຄສະນາເຜີຍແຜ່ແຫ່ງຊາດຈີນໄດ້ອອກແຈ້ງການກ່ຽວກັບການການຄວບຄຸມການຫຼິ້ນເກມຂອງເຍົາວະຊົນພາຍໃຕ້ກົດລະບຽບໃໝ່ນີ້ຈະກຳນົດໃຫ້ຜູ້ທີ່ມີອາຍຸຕໍ່າກວ່າ 18 ປີສາມາດຫຼິ້ນເກມໄດ້ບໍ່ໃຫ້ເກີນມື້ລະ 90 ນາທີ (ໃນວັນເຂົ້າການ) ແລະ ບໍ່ເກີນ 3 ຊົ່ວໂມງ (ໃນວັນພັກເສົາ-ອາທິດ ແລະ ວັນພັກອື່ນໆ) ພ້ອມຍັງຈຳກັດເວລາໃນການຫຼິ້ນເກມໃນວັນເຂົ້າການບໍ່ໃຫ້ຫຼິ້ນເກມໃນຊ່ວງເວລາ 22:00 ໂມງຫາ 8:00 ໂມງເຊົ້າ ເພື່ອບໍ່ໃຫ້ເຍົາວະຊົນຫຼິ້ນເກມຂ້າມຄືນ ຫຼື ຫຼິ້ນເກມຫຼາຍເກີນໄປ.

ນອກຈາກນີ້, ແນວທາງດັ່ງກ່າວຍັງຈຳກັດບໍ່ໃຫ້ເຍົາວະຊົນໃຊ້ເງິນແທ້ໃນເກມເກີນກຳນົດ ໂດຍຜູ້ທີ່ມີອາຍຸ 8-16 ປີຈະຈ່າຍເງິນໃນເກມໄດ້ສູງສຸດ 200 ຢວນ ຫຼື ປະມານ 256.000 ກີບຕໍ່ເດືອນ ແລະ ຜູ້ທີ່ມີອາຍຸ 16-18 ປີສາມາດຈ່າຍເງິນໃນເກມໄດ້ບໍ່ໃຫ້ເກີນ 400 ຢວນ ຫຼື ປະມານ 512.000 ກີບຕໍ່ເດືອນ. ກົດລະບຽບດັ່ງກ່າວຈະຖືກນຳໄປປັບໃຊ້ກັບຜູ້ໃຫ້ບໍລິການເກມອອນລາຍທັງໝົດໃນທົ່ວປະເທດ, ໂດຍສະເພາະກັບບໍລິສັດເກມທີ່ໃຫຍ່ທີ່ສຸດໃນໂລກຢ່າງເທນເຊນ (Tencent).

ຢ່າງໃດກໍຕາມ, ປະກາດນີ້ແມ່ນເນັ້ນໃຫ້ເຫັນເຖິງຄວາມຮັບຜິດຊອບຂອງບໍລິສັດຕ່າງໆ ແລະ ເປັນການເຮັດໜ້າທີ່ຂອງລັດຖະບານໃນການຄວບຄຸມບັນຫາດ້ານສຸຂະພາບ ແລະ ຈິດໃຈຂອງເຍົາວະຊົນ ແລະ ໜ່ວຍງານຕ່າງໆຂອງລັັດຊຶ່ງຈຳເປັນຕ້ອງສຶກສາກົດລະ ບຽບນີ້, ພ້ອມຮັບປະກັນວ່າບໍລິສັດຕ່າງໆຈະປະຕິບັດຕາມເງື່ອນໄຂທີ່ກຳນົດ.

ໂດຍຫ້ອງການຖະແຫຼງຂ່າວ ແລະ ໂຄສະນາເຜີຍແຜ່ແຫ່ງຊາດຈີນຍັງຮ່ວມມືກັບຕຳຫຼວດໃນການວາງລະບົບການສະໝັກບັນຊີດ້ວຍຊື່ແທ້ ແລະ ອຳນວຍຄວາມສະດວກໃຫ້ບໍລິສັດເກມສາມາດກວດສອບຢືນຢັນຕົວຕົນຂອງຜູ້ຫຼິ້ນເກມດ້ວຍຖານຂໍ້ມູນແຫ່ງ ຊາດໄດ້ເພື່ອປ້ອງກັນການໂກງອາຍຸໃນການສະໝັກຫຼິ້ນເກມ.

ທັງນີ້, ກໍຍັງບໍ່ເປັນທີ່ຊັດເຈນວ່າມາດຕະການທີ່ລັດຖະບານຈີນປະກາດອອກມານັ້ນຈະເຮັດໃຫ້ອຸດສາຫະກຳເກມເປັນໄປໃນທິດທາງໃດໃນອະນາຄົດ?.

ຮຽບຮຽງຂ່າວ:​ພຸດສະດີ ລາວລີ
ແຫຼ່ງຂໍ້ມູນ:www.xinhuanet.com

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.