ນາຍົກລັດຖະມົນຕີຢຽ້ມຢາມ ແລະ ຊຸກຍູ້ການພັດທະນາຢູ່ເມືອງວັງວຽງ

0
173

ເມື່ອວັນທີ 8 ສິງຫາທີ່ຜ່ານມາ ທ່ານ ທອງລຸນ ສີສຸລິດ ນາຍົກລັດຖະມົນຕີ ພອ້ມດວ້ຍຄະນະ ໄດ້ໄປຢ້ຽມຢາມ ແລະ ຊຸກຍູ້ການພັດ ທະນາຢູ່ເມືອງວັງວຽງ ແຂວງວຽງຈັນ ໂດຍມີ ທ່ານ ຄຳຜອງ ດວງວິໄລ ເຈົ້າເມືອງວັງວຽງ ພ້ອມດ້ວຍຄະນະ ແລະ ພາກສ່ວນກ່ຽວ ຂ້ອງໃຫ້ການຕ້ອນຮັບ.

ໃນໂອກາດດັ່ງກ່າວ  ທ່ານນາຍົກລັດຖະມົນຕີ ພ້ອມດ້ວຍຄະນະກໍໄດ້ໄປຢ້ຽມຢາມ ແລະ ຕິດຕາມເບິ່ງຈຸດກໍ່ສ້າງສະຖານີລົດໄຟວັງວຽງ ຊຶ່ງເຫັນວ່າເສັ້ນທາງລົດໄຟ ລາວ-ຈີນ ຜ່ານແຂວງວຽງຈັນມີຄວາມຍາວທັງໝົດ 145 ກີໂລແມັດ ຜ່ານ 4 ເມືອງ 60 ບ້ານມີຜູ້ໄດ້ຮັບຜົນກະທົບ 1.589 ຄອບຄົວ ມາຮອດປັດຈຸບັນໄດ້ໄກ່ເກ່ຍທີ່ດິນ ແລະ ສິ່ງກີດຂວາງການກໍ່ສ້າງທາງລົດໄຟສໍາເລັດ 99% ແລະ ສືບຕໍ່ດຳເນີນການຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບຈາກໂຄງການດັ່ງກ່າວ ສຳລັບສະຖານີລົດໄຟວັງວຽງແມ່ນຕັ້ງຢູ່ບ້ານຫ້ວຍສະເຫງົ້າ-ພູດິນແດງ ຫ່າງຈາກເທສະບານເມືອງວັງວຽງປະມານ 2 ກີໂລແມັດ,ີ ຫ່າງຈາກເສັ້ນທາງເລກທີ 13 ເໜືອ 300 ແມັດ ມີເນື້ອທີ່ທັງໝົດ 144 ກວ່າເຮັກຕາ ສະເພາະເນື້ອທີ່ອາຄານສະຖານີມີ 5.000 ຕາແມັດ ສາມາດຮອງຮັບຜູ້ໂດຍສານໄດ້ 600 ຄົນ ມາຮອດປັດຈຸບັນ​ໄດ້​ສຳ​ເລັດ​ການ​ອອກ​ແບບ ສຳເລັດການບຸກເບີກພື້ນທີ່ ແລະ ກະກຽມເພື່ອດຳເນີນການກໍ່ສ້າງ ຄາດ​ວ່າຈະສໍາເລັດການກໍ່ສ້າງພາຍໃນປີ 2021.

ທັງນີ້ ທ່ານນາຍົກລັດຖະມົນຕີໄດ້ເນັ້ນໜັກໃຫ້ຜູ້ພັດທະນາໂຄງການເອົາໃຈໃສ່ປະຕິບັດວຽກງານ ສຳເລັດຕາມແຜນການທີ່ວາງໄວ້ ແລະ ໃຫ້ມີຄຸນນະພາບ ການ​ກໍ່ສ້າງ​ໃຫ້​ເປັນ​ໄປ​ຕາມ​ແບບ​ທີ່​ໄດ້​ຮັບຮອ​ງ ສິ່ງ​ສຳຄັນ​ໂຄງ​ສ້າງ​ຕ່າງໆຕ້ອງໃຫ້ກົມກືນກັບທຳມະ ຊາດກໍຄືແຫຼ່ງທ່ອງທ່ຽວຂອງເມືອງວັງວຽງ ຫຼັງຈາກນັ້ນທ່ານນາຍົກລັດຖະມົນຕີພ້ອມດ້ວຍຄະນະກໍໄດ້ໄປຢ້ຽມຢາມສູນບໍລິການເຕັກ ນິກກະສິກຳ ແລະ ໄດ້ຊີ້ນຳໃຫ້ສູນດັ່ງກ່າວ ເອົາໃຈໃສ່ການປູກພຶດປອດສານພິດ ພືດລົ້ມລຸກ ໂດຍໃຫ້ຕິດພັນກັບການສົ່ງເສີມການທ່ອງທ່ຽວ ພ້ອມນີ້ ກໍໄດ້ຢ້ຽມຢາມສະຖານທີ່ທ່ອງທ່ຽວທໍາມະຊາດຖໍ້ານາງຟ້າ ແລະ ຖໍ້ານອນ ໂດຍໄດ້ເນັ້ນໃຫ້ຜູ້ພັດທະນາ ເອົາໃຈໃສ່ການອະນຸຮັກທຳມະຊາດ ແລະ ຄວາມປອດໄພໃຫ້ແກ່ນັກທ່ອງທ່ຽວ.

ໃນຕອນບ່າຍຂອງວັນດຽວກັນ ທ່ານນາຍົກລັດຖະມົນຕີໄດ້ໃຫ້ກຽດໂອ້ລົມຕໍ່ພະນັກງານຫຼັກແຫຼ່ງຂອງເມືອງວັງວຽງ ພະນັກງານອະວຸ ໂສ-ບຳນານ ແລະ ນັກທຸລະກິດທີ່ສະໂມສອນເມືອງວັງວຽງ ກ່ອນອື່ນແມ່ນໄດ້ຮັບຟັງການລາຍງານສະພາບການພັດທະນາເສດຖະ ກິດ-ສັງຄົມຂອງເມືອງໃນໄລຍະ 6 ເດືອນຜ່ານມາຈາກທ່ານເຈົ້າເມືອງໆວັງວຽງ ຊຶ່ງທົ່ວເມືອງຍັງສືບຕໍ່ມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ ເສດຖະກິດຂະຫຍາຍຕົວຢ່າງຕໍ່ເນື່ອງ ດ້ານການສຶກສາ ແລະ ວັດທະນະທໍາຕິດພັນກັບການພັດທະ ນາຊົນນະບົດ ແລະ ລຶບລ້າງຄວາມທຸກຍາກຂອງປະຊາຊົນກໍນັບມື້ດີຂຶ້ນເປັນກ້າວໆ ຈາກນັ້ນ ທ່ານນາຍົກລັດຖະມົນຕີໄດ້ສະເໜີໃຫ້ບັນດາທ່ານລັດຖະມົນຕີກະຊວງກ່ຽວຂ້ອງຊີ້ແຈງຕໍ່ບາງບັນຫາທີ່ທາງເມືອງສະເໜີ ແລະ ບາງບັນຫາພົ້ນເດັ່ນ ເປັນຕົ້ນການປ້ອງ ກັນ ແລະ ແກ້ໄຂການລະບາດຂອງພະຍາດໄຂ້ເລືອດອອກ ການສົ່ງເສີມການຜະລິດກຳສິກຳອິນຊີ ການປູກພືດປອດສານພິດຕິດພັນກັບການຊຸກຍູ້ສົ່ງເສີມການທ່ອງທ່ຽວ ການຕິດຕາມເຝົ້າລະວັງການລະບາດຂອງພະຍາດອາຫິວາໝູອາຟຣິກາ ການສ້າງ ແລະ ປັບປຸງເສັ້ນທາງເຂົ້າແຫຼ່ງທ່ອງທ່ຽວ ແລະ ການຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບຈາກທາງລົດໄຟ.

ຕໍ່ການພັດທະນາຂອງເມືອງວັງວຽງໃນປັດຈຸບັນ ທ່ານນາຍົກລັດຖະມົນຕີໄດ້ມີຄຳເຫັນວ່າ ເມືອງວັງວຽງໄດ້ຮັບການພັດທະນາ ແລະ ມີຫຼາຍອັນປ່ຽນແປງໃໝ່ ແຕ່ເຖິງຢ່າງໃດກໍຕາມ ຍັງມີບາງບັນຫາທີ່ຕ້ອງໄດ້ເອົາໃຈໃສ່ປັບປຸງແກ້ໄຂ ເປັນຕົ້ນການພັດທະນາເມືອງວັງວຽງຍັງບໍ່ທັນໄປຕາມຜັງເມືອງຢ່າງເຄັ່ງຄັດ ຂາດການວາງແຜນພັດທະນາການທ່ອງທ່ຽວທີ່ດີ ແລະ ຍືນຍົງ ບັນຫາລາຄາສິນຄ້າ ແລະ ຄ່າບໍລິການແພງ ບັນຫາຄວາມສະອາດ ຄວາມເປັນລະບຽບຮຽບຮ້ອຍ ບັນຫາການຄຸ້ມຄອງການປ່ອຍນ້ຳເສຍລົງແມ່ນ້ຳ ດັ່ງ ນັ້ນ ເພື່ອສືບຕໍ່ພັດທະນາເມືອງວັງວຽງໃຫ້ເປັນເມືອງທ່ອງທ່ຽວຢ່າງແທ້ຈິງ ທ່ານນາຍົກລັດຖະມົນຕີກໍໄດ້ໃຫ້ທິດຊີ້ນຳແກ່ການນຳຫຼັກແຫຼ່ງ ແລະ ພະນັກງານຂອງເມືອງວັງວຽງໃຫ້ເອົາໃຈໃສ່ຕື່ມ ເປັນຕົ້ນໃຫ້ເມືອງວັງວຽງກໍຄືແຂວງວຽງຈັນຊອກໃຫ້ເຫັນທ່າແຮງແທ້ຈິງຂອງເມືອງວັງວຽງ ແລະ ນຳໃຊ້ທ່າແຮງດັ່ງກ່າວຢ່າງຖືກຕ້ອງ ຍືນຍົງ ແລະ ມີປະສິດທິຜົນສູງ ໃຫ້ກະຊວງກ່ຽວຂ້ອງສົມທົບກັບແຂວງວຽງຈັນສ້າງແຜນຜັງ ແລະ ຍຸດທະສາດການພັດທະນາເມືອງວັງວຽງເພື່ອເປັນບ່ອນອີງໃນການພັດທະນາ ແລະ ພິຈາລະ ນາອະນຸມັດໂຄງການ ຫຼື ທຸລະກິດຕ່າງໆ ເອົາໃຈໃສ່ຕິດຕາມ ກວດກາ ຄຸ້ມຄອງລາຄາສິນຄ້າ ຄ່າທີ່ພັກ ລາຄາອາຫານໃຫ້ຖືກຕ້ອງເໝາະສົມ ບໍ່ໃຫ້ສູງເກີນຄວາມເປັນຈິງ ສົ່ງເສີມການຜະລິດກະສິກຳສະອາດ ແລະ ປູກພືດປອດສານພິດ ຕ້ອງເຂັ້ມງວດຕໍ່ການປົກປັກຮັກສາສິ່ງແວດລ້ອມ ການປ່ອຍນໍ້າເປື້ອນ ການຖິ້ມຂີ້ເຫຍື້ອຊະຊາຍ ຕະຫຼອດຮອດການສ້າງຮ້ານບັນເທິງທີ່ບໍ່ຖືກຕ້ອງ ບໍ່ແທດເໝາະກັບເງື່ອນໄຂຕົວຈິງ ແລະ ບໍ່ສອດຄ່ອງກັບລະບຽບການ ສົ່ງເສີມການທ່ອງທ່ຽວຕິດພັນກັບການຊຸກຍູ້ການຜະລິດ ແລະ ສ້າງວຽກເຮັດງານທຳໃຫ້ປະຊາຊົນ ໃຫ້ເອົາໃຈໃສ່ແກ້ໄຂບັນຫາທີ່ບໍ່ດີ ແລະ ເກີດຂຶ້ນຢູ່ເມືອງວັງວຽງໃນໄລຍະຜ່ານມາໃຫ້ຕົກໄປເປັນກ້າວໆ ເອົາໃຈໃສ່ຕ້ານ ສະກັດກັ້ນ ແລະ  ແກ້ໄຂບັນດາປາກົດການຫຍໍ້ທໍ້ຕ່າງໆທີ່ເປັນສິ່ງທ້າທາຍຕໍ່ການປົກປັກຮັກສາ ແລະ ພັດທະນາເມືອງວັງວຽງໃຫ້ໄດ້ຢ່າງຂາດຕົວ ເອົາໃຈໃສ່ພັດທະນາ ແລະ ປັບປຸງໂຄງລ່າງພື້ນຖານການທ່ອງທ່ຽວ ປັບປຸງຍົກລະດັບຂີດຄວາມສາມາດດ້ານການບໍລິຫານ-ບໍລິການການທ່ອງທ່ຽວໃຫ້ດີຂຶ້ນເພື່ອໃຫ້ນັກທ່ອງທ່ຽວເຂົ້າມາປະທັບໃຈ ແລະ ສາມາດດຶງດູດນັກທ່ອງ ທ່ຽວຫຼາຍລະດັບ ດ້ວຍການໄປຖອດຖອນບົດຮຽນກັບປະເທດທີ່ມີຊື່ສຽງດ້ານການທ່ອງທ່ຽວ ເພີ່ມປະສິດທິພາບ ແລະ ເພີ່ມທະວີການຄຸ້ມຄອງເມືອງວັງວຽງໃຫ້ເປັນເມືອງທຳມະຊາດ ແລະ ວັດທະນະທຳຢ່າງແທ້ຈິງ.

 

 

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.