ນາຊ່າເຜີຍ… ຄວັນໄຟປ່າຈາກອົດສະຕາລີຈະໄດ້ເດີນທາງຮອບໂລກ!!

0
498

ລາຍງານໂດຍອົງການບໍລິຫານການບິນ ແລະ ອະວະກາດແຫ່ງຊາດຂອງອາເມຣິກາຄາດຄະເນວ່າ: ໝອກຄວັນຈາກໄຟປ່າຂອງອົດ ສະຕາລີຈະເດີນທາງຮອບໂລກຢ່າງໜ້ອຍ 1 ຮອບແລ້ວຈຶ່ງກັບມາບ່ອນເກົ່າ.

ສຳນັກຂ່າວຕ່າງປະເທດລາຍງານຈາກປະເທດອົດສະຕາລີເມື່ອວັນທີ 14 ມັງກອນຜ່ານມາວ່າ: ນາຊ່າໄດ້ລາຍງານວ່າກຸ່ມໝອກຄວັນທີ່ມີຄວາມໜາຊຶ່ງເປັນຜົນມາຈາກໄຟປ່າທີ່ຍັງຄົງແຜ່ລາມຢູ່ໃນອົດສະຕາລີໄດ້ລອຍຂຶ້ນສູ່ຊັ້ນບັນຍາກາດໃນລະດັບຄວາມສູງເກືອບ 18 ກີໂລແມັດຈາກພື້ນໂລກ ແລະ ເດີນທາງຂ້າມມະຫາສະໝຸດຜ່ານທະວີບອາເມຣິກາໃຕ້ເມື່ອວັນທີ 8 ມັງກອນຜ່ານມາ ແລະ ກຸ່ມຄວັນຈະເຄື່ອນທີ່ຮອບໂລກຢ່າງໜ້ອຍ 1 ຮອບກ່ອນທີ່ຈະຍ້ອນກັບມາບ່ອນເກົ່າຊຶ່ງຈະສົ່ງຜົນກະທົບຢ່າງໜັກໃຫ້ກັບນິວຊີແລນຊຶ່ງເປັນປະເທດເພື່ອນບ້ານອີກດ້ວຍ.

ທັງນີ້ ລາຍງານຂອງນາຊ່າລະບຸອີກວ່າ: ສະພາບອາກາດຮ້ອນ ແລະ ແລ້ງຈັດເປັນປະຫວັດການບວກກັບອຸນຫະພູມຂອງໄຟປ່າຊຶ່ງສູງຢູ່ແລ້ວຄືປັດໄຈສຳຄັນທີ່ກໍ່ໃຫ້ເກີດພະຍຸຝຸ່ນຟ້າຄະນອງແຕ່ລັກສະນະອາກາດດັ່ງກ່າວບໍ່ແມ່ນເລື່ອງທີ່ເກີດຂຶ້ນຕາມປົກກະຕິ.

ວິກິດໄຟປ່າຂອງອົດສະຕາລີຊຶ່ງລຸກລາມຂ້າມປີຕັ້ງແຕ່ເດືອນກັນຍາ 2019 ຜ່ານມາໄດ້ເຜົາທຳລາຍພື້ນທີ່ໄປແລ້ວຢ່າງກວ້າງຂວາງ, ສິ່ງປຸກສ້າງ ແລະ ບ້ານເຮືອນເກືອບ 6.000 ຫຼັງ ໄດ້ຮັບຄວາມເສຍຫາຍ, ມີຜູ້ເສຍຊີວິດແລ້ວຢ່າງໜ້ອຍ 28 ລາຍ ຂະນະທີ່ສັດ ປ່າລົ້ມຕາຍເປັນຈຳນວນຫຼວງຫຼາຍ, ເຖິງແມ່ນວ່າທາງການລັດນິວເຊົາເວລສາມາດຄວບຄຸມກອສເປີຣ ເມົາເທນ ຊຶ່ງເປັນຊື່ຂອງໄຟປ່າຂະໜາດໃຫຍ່ທີ່ສຸດໃນພື້ນທີ່ໄດ້ສຳເລັດ ແຕ່ຍັງເຫຼືອໄຟປ່າອີກຫຼາຍກວ່າ 100 ຈຸດໃນທ້ອງຖິ່ນ. ຂະນະທີ່ລັດວິກຕໍເຣຍຊຶ່ງຢູ່ຕິດກັບລັດດັ່ງກ່າວ ແລະ ຫ່າງອອກໄປທາງຕາເວັນອອກສຽງໃຕ້ກໍໄດ້ອອກປະກາດເຕືອນປະຊາຊົນໃຫ້ຫຼີກລ້ຽງການອອກນອກເຂດທີ່ຢູ່ອາໄສ, ເນື່ອງຈາກສະຖານະການໝອກຄວັນຍັງຄົງເພີ່ມລະດັບຄວາມອັນຕະລາຍຕໍ່ເນື່ອງ.

 

 

ຮຽບຮຽງ: ເພັງສະຫວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.