ນັກຂ່າວຊ່ອງວັນ “ຈັ໊ດ” ເລົ່າຂ່າວເກີນຈິງ! ລາວບໍ່ພົບຜູ້ຕິດເຊື້ອໂຄວິດ-19 ເພາະໂຮງໝໍເກົ່າບໍ່ມີເຄື່ອງມືກວດ

0
2287

ກາຍເປັນກະແສຮ້ອນແຮງໃນໂລກໂຊຊຽວພຽງຂ້າມຄືນ ກໍລະນີ ທ້າວ ທີມະ ການຈະນະໄພລິນ ຫຼື ຈັ໊ດ ນັກຂ່າວຊ່ອງວັນ ທີ່ເລົ່າກ່ຽວກັບການລະບາດຂອງໄວຣັດໂຄວິດ-19 ພ້ອມວິເຄາະມາດຕະການປ້ອງກັນໄວຣັດຂອງ 4 ປະເທດເພື່ອນບ້ານທີ່ມີຊາຍແດນຕິດກັບປະເທດໄທ ແຕ່ເມື່ອຜູ້ປະກາດຂ່າວຄົນນີ້ກ່າວເຖິງເຫດຜົນວ່າເປັນຫຍັງ ລາວ-ມຽນມາ ບໍ່ມີລາຍງານພົບຜູ້ຕິດເຊື້ອໂຄວິດ-19 ເຊິ່ງມັນເປັນເລື່ອງທີ່ໜ້າສົງໃສ ແລະ ການຍົກເຫດຜົນກໍລະນີກ່ຽວກັບປະເທດລາວ ໂດຍຜູ້ກ່ຽວໄດ້ໃຊ້ຄຳເວົ້າໃນລັກສະນະສຽດສີ, ດູໝິ່ນທາງການແພດຂອງລາວ ໂດຍກ່າວວ່າໂຮງໝໍລາວເກົ່າ ບໍ່ມີຫ້ອງແລັບໃນການກວດເຊື້ອ ຊູດເຄື່ອງແບບທີ່ຈະໃສ່ກວດກໍ່ຍັງບໍ່ມີ ເຄື່ອງມືລ້າສະໄໝກວ່າໂຮງໝໍໃນຊຸມຊົນຂອງໄທ ສິ່ງທີ່ນັກຂ່າວຄົນນີ້ກ່າວມັນໄດ້ເຮັດໃຫ້ຄົນລາວຈຳນວນຫຼາຍເດືອດບໍ່ພໍໃຈຢ່າງແຮງ.

Posted by FileMaker Lao on ວັນພະຫັດ ທີ 19 ມີນາ 2020

ຜູ້ໃຊ້ເຟສບຸກຈຳນວນຫຼາຍອອກມາສະແດງຄວາມຄິດເຫັນທີ່ບໍ່ພໍໃຈ ແລະ ຍັງເປັນປະເດັນທີ່ຖືກແຊຣຕໍ່ໃນໂລກອອນລາຍຢ່າງວົງກວ້າງ. ປັດຈຸບັນ ນັກຂ່າວຄົນດັ່ງກ່າວຍັງບໍ່ມີການເຄື່ອນໄຫວໃດໆ ຍັງບໍ່ທັນໄດ້ອອກມາສະແດງຄວາມຄິດເຫັນກ່ຽວກັບເລື່ອງນີ້ ຫຼື ບໍ່ໄດ້ສະແດງຄຳຂໍໂທດໃດໆທັງນັ້ນ ແລະ ກໍ່ຍັງບໍ່ມີການເຄື່ອນໄຫວຈາກໜ່ວຍງານທີ່ກ່ຽວຂ້ອງຈາກທາງຝັ່ງລາວວ່າຈະມີວິທີການຕອບໂຕ້ກັບນັກຂ່າວຄົນນີ້ແນວໃດເທື່ອ

ປະເທດລາວເປັນປະເທດໜຶ່ງທີ່ຖືກອ້ອມລ້ອມດ້ວຍບັນດາປະເທດທີ່ມີການແພ່ລະບາດແລະຕິດເຊື້ອ COVID-19 ໂດຍສະເພາະແມ່ນມີຊາຍແດນຕິດກັບປະເທດຈີນທີ່ມີການລະບາດຢ່າງຮ້າຍແຮງ. ດັ່ງນັ້ນ, ປະເທດລາວຈຶ່ງເປັນປະເທດທີ່ມີຄວາມສ່ຽງສູງທີ່ຈະມີຜູ້ຕິດເຊື້ອພະຍາດດັ່ງກ່າວ ແຕ່ເຖິງແນວນັ້ນກໍຕາມ, ມາຮອດມື້ນີ້ ວັນທີ 19 ມີນາ 2020 ປະເທດລາວກໍຍັງບໍ່ພົບຜູ້ຕິດເຊື້ອດັ່ງກ່າວ ຄົງມີແຕ່ຜູ້ຕ້ອງສົງໄສວ່າຕິດຈຳນວນເກືອບ 100 ຄົນ ແຕ່ຜ່ານການເກັບຕົວຢ່າງໄປວິເຄາະຜົນອອກມາກໍເປັນລົບ ຫຼື ບໍ່ຕິດ. ດ້ວຍເຫດນີ້ມັນຈຶ່ງເປັນຂໍ້ສົງໃສຂອງຄົນລາວເອງ ແລະ ຄົນນອກປະເທດ ກ່ຽວກັບຂໍ້ເທັດຈິງຂອງການລາຍງານ ເພື່ອໃຫ້ທຸກຄົນຫາຍຄວາມສົງໃສດ້ວຍການວິເຄາະສະຖານະການທີ່ສົມເຫດສົມຜົນເຂົ້າກັບຄວາມເປັນຈິງທີ່ມີຢູ່ໃນປັດຈຸບັນ ຈຶ່ງໄດ້ຂໍ້ສະຫຼຸບດັ່ງນີ້:

1. ຍ້ອນປະຊາກອນລາວບໍ່ໜາແໜ້ນ ແລະ ຜູ້ທີ່ມີໂອກາດໃກ້ຊິດກັບຜູ້ຕິດເຊື້ອບໍ່ຫຼາຍ: ວິທີທີ່ດີທີ່ສຸດທີ່ຈະບໍ່ຕິດເຊື້ອຄືໃຫ້ຢູ່ຫ່າງຈາກຜູ້ຕິດເຊື້ອ ໃນຂະນະທີ່ປະຊາກອນລາວບໍ່ຫຼາຍ ຄວາມແອອັດບໍ່ຄ່ອຍມີ. ປະກອບກັບຄົນລາວທີ່ມີໂອກາດໄດ້ໃກ້ຊິດ ຫຼື ໄປຢູ່ໃນເຂດທີ່ລະບາດຫຼາຍຂອງຕ່າງປະເທດນັ້ນແມ່ນມີຈຳນວນໜ້ອຍ. ຈະມີສະເພາະແຕ່ນັກສຶກສາ, ນັກການທູດ, ນັກທ່ອງທ່ຽວ ແລະຜູ້ໄປອອກແຮງງານ ແຕ່ຖ້າທຽບໃສ່ບັນດາປະເທດອ້ອມຂ້າງ ເຊັ່ນ: ໄທ ແລະ ຫວຽດນາມ ແລ້ວຄົນລາວມີຈຳນວນໜ້ອຍ. (ສຳຄັນແມ່ນຍັງບໍ່ທັນມີໃຜນຳເຊື້ອເຂົ້າມາເທື່ອ).

2. ຄົນລາວເປັນຄົນຕື່ນຕົກໃຈໄວ ແລະ ບໍ່ປະໝາດ: ຄົນລາວເປັນຄົນຂ້ອນຂ້າງອ່ອນໄຫວກັບຂ່າວ ດັ່ງນັ້ນ, ຈຶ່ງເຮັດໃຫ້ເຂົາເຈົ້າຕື່ນໂຕໄວ, ຢ້ານເອົາໄວ້ກ່ອນ ແລ້ວຮີບຮ້ອນປ້ອງກັນໂຕເອງ. (ສຳຄັນແມ່ນຍັງບໍ່ທັນມີໃຜນຳເຊື້ອເຂົ້າມາເທື່ອ).

3. ລັດຖະບານລາວຮ່ວມກັບອົງການສາກົນ ມີມາດຕະການປ້ອງກັນຢ່າງທັນການ: ເລີ່ມແຕ່ເດືອນ ມັງກອນ ປີ 2020 ເປັນຕົ້ນມາ, ລັດຖະບານໄດ້ປະຕິບັດບາງມາດຕະການ ເພື່ອສະກັດກັ້ນ ແລະ ປ້ອງກັນ ແຕ່ຫົວທີ ເປັນຕົ້ນແມ່ນ ໄດ້ແຕ່ງຕັ້ງຄະນະສະເພາະກິດ ເພື່ອຊີ້ນຳການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດດັ່ງກ່າວ, ໂດຍແມ່ນທ່ານ ສົມດີ ດວງດີ, ຮອງນາຍົກລັດຖະມົນຕີ, ເປັນຫົວໜ້າຄະນະສະເພາະກິດ ດັ່ງກ່າວນັ້ນ ແລະ ປະກອບຄະນະຈາກພາກສ່ວນກ່ຽວຂ້ອງ, ຄະນະສະເພາະກິດດັ່ງກ່າວ ໄດ້ປະຕິບັດວຽກງານດ້ວຍຄວາມຮັບຜິດຊອບສູງຫຼາຍຢ່າງ, ໃນນັ້ນ ລວມເຖິງ:
– ໂຄສະນາເຜີຍແຜ່ໃຫ້ສັງຄົມ ກໍ່ຄືປະຊາຊົນເຂົ້າໃຈກ່ຽວກັບໄພອັນຕະລາຍ ແລະ ວິທີປ້ອງກັນ ເພື່ອຫຼຸດຜ່ອນຄວາມສ່ຽງໃນການຕິດເຊື້ອພະຍາດດັ່ງກ່າວ;
– ເຂັ້ມງວດກັ່ນຕອງຜູ້ເດີນທາງເຂົ້າມາໃນ ສປປ ລາວ ໂດຍການກວດອຸນນະພູມ ແລະ ຄັດແຍກຜູ້ສົງໄສຕິດເຊື້ອ ເພື່ອຫຼີກລ້ຽງຄວາມສ່ຽງຈາກການແຜ່ລະບາດຂອງພະຍາດ;
– ກວດສຸຂະພາບຂອງຜູ້ທີ່ຕົກຢູ່ໃນກໍລະນີສົງໄສ ເພື່ອຢັ້ງຢືນການບົ່ງມະຕິພະຍາດ ດ້ວຍເຄື່ອງມືທີ່ທັນສະໄໝມາດຕະຖານສາກົນ ຮ່ວມກັບອົງການອະນາໄມໂລກ ພ້ອມມີທີມແພດປະຕິບັດໜ້າທີ່ທຸກວັນ.
– ກຽມຄວາມພ້ອມຂອງໂຮງໝໍ ເພື່ອຮອງຮັບການແຍກປ່ຽວຜູ້ສົງໄສຕິດເຊື້ອ ແລະ ຄຸ້ມຄອງກໍລະນີຖ້າມີຜູ້ຕິດເຊື້ອ

4. ລັດຖະບານກຳນົດ 6 ມາດຕະການໃຫຍ່ຮັບມືໂຄວິດ-19

ເຫດຜົນທັງໝົດທີ່ຍົກຂຶ້ນມາກ່າວຂ້າງເທິງນີ້ ສະແດງໃຫ້ເຫັນວ່າ ສປປ ລາວ ກໍ່ມີມາດຕະການ ແລະ ມີຄວາມພ້ອມກັບການຮັບກັບໂຄວິດ-19 ບວກກັບປະຊາຊົນລາວໃຫ້ການຮ່ວມມື ປະຕິບັດຕາມມາດຕະການທີ່ລັດວາງອອກຢ່າງເຄັ່ງຄັດ ນັ້ນຈຶ່ງເຮັດໃຫ້ປັດຈຸບັນ ລາວຍັງບໍ່ພົບຜູ້ຕິເຊື້ອ ບໍ່ແມ່ນເປັນຄືກັບຄຳກ່າວອ້າງຂອງທ້າວ ທີມະ ການຈະນະໄພລິນ ຫຼື ຈັ໊ດ ນັກຂ່າວຊ່ອງວັນກ່າວແຕ່ຢ່າງໃດ.

 

ບົດຂ່າວໂດຍ: ພຸດສະດີ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.